தமிழின்அழகேஎழில் ழகரம்
ழகரம் ழகரம் தமிழகரம்
தமிழின் அழகே எழில் ழகரம்
- விழியில் வழியும் அமிழ்தே ழகரம்
- ஆழியில்பொழியும் மழையே ழகரம்
- மகிழ்ச்சியில் பழுக்கும் பழமே ழகரம்
- நெகிழ்ச்சியில் தழைக்கும் நிழலே ழகரம்
- உழவும் தொழிலும் கமழ்ந்திடும் ழகரம்
- மழுவும் கழிவும் கழிந்திடும் ழகரம்
- வாழ்வும் தாழ்வும் பிறழும் ழகரம்
- பழுதும் விழுதும் ஒழியும் ழகரம்
- தொழுகையும் அழுகையும் வாழ்வின் வழக்கம்
- எழுகையும் முழுகையும் முழவின் முழக்கம்
- வாழையும் தாழையும் செழிப்பின் பழக்கம்
- கோழையும் மோழையும் அழிவின் புழுக்கம்
- வாழ்வென்னும் வழியில் குழிகள் பழிகள்
- காழ்ப்பென்னும் சுழியில் பழுதுகள் விழுதுகள்
- தாழ்வென்னும் தகழியில் தழைகள் பிழைகள்
- வீழ்கென எழும்பும் வேழமும் சூழுமும்
- தாழ்ப்பாழ் அழுந்திட நழுவிடும் பொழுதினில்
- கொழுந்தென எழுந்திடும் விழியின்பொழில்கள்
- தழுவிடத் தழுவிட அவிழ்ந்திடும் எழில்கள்
- வழிந்திடும் விழியில் அமிழ்ந்திடும் அமிழ்து
- வாழைப் பழச்சாறோ இதழின் உமிழ்ச்சாறோ
- தாழைப் புழையூரில் பொழியும் கூழாறோ
- தாழப் பழுவூரில் இழையும் குழலேறோ
- ஆழப் புகழூரில் தழையும் மழை ஊற்றோ
- நிகழும் பொழுதெல்லாம் உழைப்பின் இழையன்றோ
- திகழும் செழுப்பெல்லாம் மழையின் பொழிவன்றோ
- மழலைச் சிமிழ்எல்லாம் மகிழ்வின் விழையன்றோ
- தமிழின் புகழ்எல்லாம் செம்மொழி வழியன்றோ
குவிகம் குழுமம் - குவிகம் மின்னிதழ் 