ஒரு காலத்தில தமிழ் சினிமாவில் டுவிஸ்ட் டான்ஸ் தான் இருக்கும். இப்போ கதையில விதவிதமான டுவிஸ்ட்.
நாமும் கொஞ்சம் டுவிஸ்ட் பார்க்கலாமா?

டாக்டர் கதாநாயகன் கதாநாயகியிடம்

‘ஐ  லவ் யு’ என்று சொன்னதும்  அவள் மயங்கிச்

சாய்கிறாள். செக் பண்ணினால் அவள்

பிரக்னண்ட். இது காதலுக்கு முன் கர்ப்பம்

டுவிஸ்ட்!

ஹீரோ வில்லனைத் துரத்த அவன் மலை, ஆறு , பின்னி இரும்புக்கடை தாண்டி பில்டிங்- மால் என்றெல்லாம் சுத்தி கடைசியில் டாஸ்மார்க் பாருக்கு வருகிறார்கள்! இருவர் கையிலும் பீர் பாட்டில். வா மச்சி சண்டை போட்டது போதும்! பீர் அடிக்கலாம் என்று டேபிளில் உட்காருகிறார்கள்! ‘மது உடலுக்கு தீது ‘என்று டைட்டில் கார்ட்’

கதாநாயகி கதாநாயகனுக்கு  கிஸ் அடித்துவிட்டுத் திரும்பினால் ஹீரோ டிராகுலாவா மாறி நிற்கிறான்.

ஹீரோ வில்லனை அடித்துவிட்டு கதாநாயகிக்குத் தாலி கட்டும் போது தான் தெரிகிறது அவள் வில்லனின் அம்மாவென்று!

படத்தில் சந்தானம் சென்சார் போர்டு அதிகாரியா வருகிறார். யார்  டபிள் மீனிங்லே வசனம் பேசினாலும் அவர் அதை ஒருமுறை திருப்பிச் சொல்லிவிட்டு கத்திரி எடுத்து  அந்த சீனைக் கட் செய்கிறார். 

 டிரையினில் ஹீரோவும் வில்லனும் சண்டைபோடும் போது வில்லன் ஹீரோவை அடித்துத் தள்ளி விட முயலும் போது சந்தானம் டி.டி.ஆர். வேடத்தில் வந்து டிக்கட் கேட்க ஹீரோவிடம் டிக்கட் இருக்க வில்லனிடம் டிக்கட் இல்லாததால் அவனை இறக்கி விடுகிறார். படம் இப்படி முடிகிறது! எப்படி கிளைமாக்ஸ் டுவிஸ்ட்!

வில்லன் ஹீரோயினைக்  காரில் கடத்திக் கொண்டு ஓடும் போது டிராபிக் போலீஸ் ஓவர் ஸ்பீடுக்காக அவனை அரெஸ்ட் செய்ய ஹீரோயின் தப்பிக்கிறாள். இது எஸ்கேப் டுவிஸ்ட்!