வந்திடுமே!!!

image

வானத்தில் இருக்கிற சந்திரனும் சூரியனும்- என்
கானத்தைக் கேட்டு இப்போ மந்திரத்தில் வந்திடுமே!

மேகத்தில்  இருக்கிற மழைத்துளியும் பனித்துளியும்  என்
தாகத்தைத் தீர்க்க இங்கே தனித்தனியா வந்திடுமே!

பூமிக்கு மேலே உள்ள காற்று வெளி மண்டலமும் இந்த
சாமிக்கு மூச்சுவிட விழுந்தடிச்சு வந்திடுமே!

கடலிலே அலையடிக்கும் கருநீலத்  தண்ணியெல்லாம்
கடையிலே விக்கிற  குடிநீராய் மாறிடுமே

தோட்டத்தில் குலுங்கிவரும் பூச்செடியும் மொட்டுகளும்  நம்
வீட்டுக்கு வந்திருந்து பூஜையிலே கலந்திடுமே 

வயலிலே இருக்கின்ற நெல்மணியும் கண்மணியும் -என்
வயத்திலே நிறைகின்ற சோறாக மாறிடுமே!

நட்சத்திர கூட்டமெல்லாம் கலந்துபேசி ஓடிவந்து -என்
வீட்டு மேலே கூரையிலே ஒளிஞ்சு நின்னு பார்த்திடுமே!

வீதியிலே திரிகிற ஆடு மாடு எருமை  எல்லாம் நல்ல 
தேதி வந்து என்வீட்டில் குட்டி போட வந்திடுமே!

மரங்களில் ஒளிஞ்சுகிட்டு பாடுகிற குயில்களெல்லாம் 
சமயலறை மேடையிலே  கச்சேரி பாடிடுமே! 

மழைமேகம் பாத்து பாத்து ஆடுகிற மயில்களெல்லாம் 
ஏழை வீ ட்டு முத்தத்திலே தில்லானா ஆடிடுமே!

சாலையிலே ஓடுகின்ற பட்டுசிட்டுக்குட்டியெல்லாம்  
மாலையிலே வீடுவந்து கப்புச் சிப்புன்னு அடங்கிடுமே!

சோலையிலே கொப்பளித்து  தித்திக்கும் சுனை நீரும்  
 காலையிலே வீடுவந்து பானையெல்லாம் ரொப்பிடுமே!

கோயிலிலே இருக்கிற அப்பனும் ஆத்தாளும்  -நம்ம
வாயிலுக்கு வந்து நம்மை வாழ்த்திவிட்டு சென்றிடுமே!

பட்டியிலே  அடைத்து வைத்த பசுக்களெல்லாம் கனிவுடனே  
கெட்டிப்பாலைக்  கொடுத்து நம்மைக் குடிக்க வைத்துப் பார்த்திடுமே!

செங்கலிலே வளர்த்துவைத்த ஓமகுண்டத் தீயினிலே 
பொங்கி வந்த தேவதைகளும் நல்  வாழ்த்துக் கூறிடுமே!  

ஒரு முழம்

image

ஒருமுழக் கயிற்றில்   ஒரு பம்பரம் விடலாம்.

ஒருமுழக் கயிற்றில்  ஒரு மாட்டை அடக்கலாம்!

ஒருமுழக் கயிற்றில்  ஒரு குதிரையை ஒட்டலாம்

ஒருமுழக் கயிற்றில்  ஒரு மூட்டை  கட்டலாம்

ஒருமுழக் கயிற்றில் ஒரு இன்ஜின் ஓட்டலாம்

ஒருமுழக் கயிற்றில்  ஒரு தென்னை ஏறலாம்.

 ஒருமுழக் கயிற்றில்  ஒரு தயிரைக் கடையலாம் 

ஒருமுழக் கயிற்றில் ஒரு ராட்டை நூற்கலாம்

ஒருமுழக் கயிற்றில் ஒரு படகைக் கட்டலாம்

ஒருமுழக் கயிற்றில் ஒரு நாயை நடத்தலாம்

ஒருமுழக் கயிற்றில் ஒரு பீடி  குடிக்கலாம்

ஒருமுழக் கயிற்றில் ஒரு வித்தை செய்யலாம்

ஒருமுழக் கயிற்றில் ஒரு திருமணம் ஆகலாம்

ஒருமுழக் கயிற்றில் ஒரு பூமாலை கட்டலாம்

ஒருமுழக் கயிற்றில்  ஒரு உயிரைத் துறக்கலாம் 

ஒருமுழக் கயிற்றில்  ஒரு தூக்கை நிறைவேற்றலாம்

ஒருமுழக் கயிற்றில்  ஒரு கொலை செய்யலாம்! 

ஒருமுழக் கயிற்றில் ஒரு நோன்பு நூற்கலாம் 

ஒருமுழக் கயிற்றில் ஒரு ராக்கி கட்டலாம் 

 ஒருமுழக் கயிற்றில்  ஒரு வில்லைக் கட்டலாம்  

ஒருமுழக் கயிற்றில் ஒரு சலங்கை கட்டலாம் 

ஒருமுழக் கயிற்றில்  ஒரு பாவாடை கட்டலாம் 

 ஒருமுழக் கயிற்றில் ஒரு அரைஞாண் கட்டலாம் 

ஒருமுழக் கயிற்றில்  ஒரு கோவணம் கட்டலாம் 

ஒருமுழக் கயிற்றில் ஒரு திருடனைக் கட்டலாம் – ஏன் 

ஒருமுழக் கயிற்றில்  நம் கண்ணனையே  கட்டலாம்

image

நளபாகம் – தி. ஜானகிராமன்

image


ஜானகிராமனின் நளபாகம் ஓர் அபூர்வமான கதை அமைப்புக் கொண்ட  நாவல். தி.ஜா. வின் முத்திரைகளை அனாயாசமாகத் தாங்கி வரும் கதை இது. யாத்ரா சர்வீசில் காசி ராமேஸ்வரம் போகும் ரயிலில் சமைப்பதற்காக வந்தவர் தான் காமேச்வரன். சமையல் கலையில் ஒரு ஜீனியஸ். நல்லூரில் ஒரு வீட்டில் சமையற்காரராக ஒதுங்குகிறார். அந்த வீட்டு மாமிக்குக் குழந்தையே இல்லை. அம்பாள் உபாசனையில் இருக்கும் காமேச்வரன் அவளுக்கு அருள் பாலிக்கிறார். அவள் உண்டாகிறாள். அந்த நல்லூர் கிராமத்தில் இருக்கும் பெரிய சிறிய மனிதர்கள் எல்லாரும் அந்தக் குழந்தைக்குக் காரணம் காமேச்வரன் என்று சொல்லாமல் சொன்னார்கள்! எது உண்மை எனபது அம்பாளுக்குத் தான் தெரியும்.


அந்தக் கதையில் வரும் பாத்திரங்கள் -பெயர்களே அவருடைய  முத்திரையைப்  பொறிக்கும் !

காமேச்வரன், வத்ஸன் , ரங்கமணி, முத்துசாமி,ஜோசியர், சுலோசனாம்மா, நாயுடு,பாட்டி, பங்கஜம், துரை , பண்டா, விஸ்வேஸ்வரன், ராமாரி குறத்தி, ஐயங்கார், ஓதுவார், ஜகது,இளங்கண்ணன், பொதுவுடமை சீனுவாசன்,குப்புராவ், வெங்காச்சம், மகாதேவ குருக்கள்,வைகுண்டம் பிள்ளை, செட்டியார், மஜீது, கலியபெருமாள், மாலிங்கம், இன்ஸ்பெக்டர் 

அதில் வரும் வசனங்களைப்  படித்தால் அந்த நளபாகத்தையும் உணரலாம்.        

“என் குருநாதன் வத்சனை நினைச்சுண்டு அவருக்கு ஒரு கும்பிடு போட்டுட்டுத்தான் உலைநீர் வைக்கிறேன்.சமையல் சுயபோதினி புத்தகங்களைப் பார்த்து சமைக்கலே! அந்தப் புஸ்தககங்களைப் படிச்சு ரசம் குழம்பு வைச்சா நவத்துவாரமும் எரியும்”  

“பாரதியார் எங்க அண்ணா! அம்பாள் எங்க அண்ணாவிற்கு கவி பாடச் சொல்லிக் கொடுத்தா. என் கையில் கரண்டியைக் கொடுத்திருக்கா!உலகத்தையே மயக்கிறார் எங்க அண்ணா! நளபாகமாய்ப் பண்ணீப் போடறேன்!”

ஸ்வீகாரமா? நல்ல சம்ஸ்கிருதப் பேரு அது. சம்ஸ்கிருதத்திலே சொல்லிட்டா ஈயம் தங்கமாயிடும், பாறாங்கல்லு பத்மராகமாயிடும்.

“ஒத்திக்கு பதிமூணுக்காக இதே வேலை.  ஒத்திக்குஒண்ணுக்காக  இதே வேலை.ஒத்திக்கு வேலையே கிடைக்காமல் போயிடுத்து. ”

image

மரணந்தானி  வைரானி! மரணம் வரையில் தான் பகை. 

“பஞ்சாயத்தில தெருவிளக்கெல்லாம் அணைச்சுப்புட்டானுக! நிலாக் காயுதாம். சிக்கனம் நாய்க்கா தெரியும்?”
 

பாட்டி (பசு மாட்டிடம்): ஏண்டி கொம்பேறி மூக்கான்! என்ன வந்துடுத்து உனக்கு ரெண்டு நாளா ?நேத்திக்கு ரெண்டு சேர் பாலைக் கொடுத்துட்டு காலைக் காலைத் தூக்கினே.இன்னிக்கு ஒண்ணரை சேர் கொடுத்துட்டு மடியை மடியை எக்கிக்கறே! புல்லு வாங்கிப் போடறேன். கோவிச்சுக்காதேம்மா! படவாச் செருக்கி!
“புல்லுக்கட்டுன்னா அத்தனை ஆசையாடியாம்மா!, புல்லுன்ன   உடனே மடியை இளக்கிப்பிட்டியே !நிச்சயமா ரெண்டு கட்டு இன்னிக்கு ராத்திரி வாங்கிப் போடத்தான் போறேன். இல்லாட்டா ஏண்டீ  வேம்புன்னு கேட்கமாட்டியோ? 

அவ கூடை முடையரவ ! கொறத்தி !  வெட வெடன்னு பாக்குக் கண்ணு மாதிரி இருப்பா ! கடசல் கொடுத்து பண்ணினாப்பல இருக்கும் உடம்பு. அரச மரம் கொழுந்துவிட்டு அந்தக் கொழுந்துமேலே வெயில் பட்டாப்பல  உடம்பெல்லாம் மினுமினுங்கும்.  

திண்ணையில் சீட்டாட்டமும் மூக்கைத் தொடாமலே மூக்குச் சிந்திய ஆச்சரியமும் தான்… 

ஏண்டா ஆராமுது! ஏன் இப்படி சல்யன் தேரோட்டினாப்பல என் கட்சியில உட்கார்ந்துண்டு கழுத்தறுக்கறே !  

இந்தப் பிரபஞ்சத்தில ஸௌந்தர்யத்தில் பராகாஷ்டை- பரம உச்சம் லலிதை தான். அவள் சாயல் தான் எல்லாம் !  

பண்றதையும் பண்ணிட்டு சீமந்தத்தை யார் தலையிலோ கட்டினானே உன் சகபாடி..

இது தடிப்பய ஊருங்க.. பேரு தான் நல்லூரு 


இதில் வரும் மசக்கைப் பாட்டு கிராம மணம் கமழும்! 

image

"கரிவாயில் ஜலம் ஊற்றி தூக்கங்கள் வந்து
கண்ட இடத்தில் பள்ளி கொள்வார் பைங்கிளிமாரும்
ஏட்டோட தயிர் வேணும் உப்பரட்டி வேணும் 
கேட்டதெல்லாம் கொடுக்கத் தாயாரும் வேணும் 
ஏலம் களிப்பாக்கு ஜாதிக்காய் வேணும் 
வெட்டு வெட்டாய்ப் பாக்கு வேணும் வெத்திலை வேணும் 
முதல்தரமான முத்து சுண்ணாம்பு வேணும் 
நாலாம் மாசம் பிறந்தவுடனே மசக்கை தெளிந்து 
வளர்பிறையில் ஐந்தாம் மாதம் வளைகாப்பும் இட்டார் 
சீருடைய ஆறாம் மாதம் சீமந்தம் பண்ணி 
சிறப்புடனே நாத்தனாரும் பூவும் சூட்டினார் 
அழகான ஏழாம் மாதம் அப்பமும் கட்டி 
எட்டாம் மாதம் பிறந்ததும் தொட்டிலும் செய்தார் 
ஒன்பதாம் மாதம் பிறந்ததும் சங்கிலி பண்ணி 
ஒன்பதாம் மாதம் ஆன உடனே ஊனும் ஒழித்தாள் 
எட்டும் இரண்டும் பத்து மாதம் பூர்ணமாய் சுமந்தாள்
முத்து முத்தாய் நெற்றி வேர்க்க முகங்கள் சிவக்க 
பெத்தாளே  பாலகரை முத்து முத்தாக ”

தி.ஜா. ஒரு மண்ணின் மைந்தர்.. சந்தேகமேயில்லை!

மீனங்காடி

                                           திட்டம் 

 

image

மேரி திட்டம் தீட்டினாள் !

 எப்படி  ‘ உங்கள் எண்ணத்தைத் தேர்ந்தெடுங்கள் ‘ கருத்தை வலியுறுத்துவது ?  மீனங்காடி மக்கள் தினமும் தவறாது அதைத் தேர்ந்தெடுக்கிறார்கள்.  அதில் ஒருவன் சொன்னானே ! ‘ இந்த வேலையைச் செய்யும்போது உனக்கு ரெண்டே ரெண்டு சாய்ஸ். ஒன்று உலக நாயகன் ஆவது : இரண்டாவது  கலக நாயகன்.  ஒன்றில் விருப்பு: மற்றொன்றில் வெறுப்பு:  உலக நாயகன் ஆக வேண்டும் என்றால் அது மாதிரி வித்தியாசமாகச் செய்ய வேண்டும் “  நாம் யாராக இருக்கப் போகிறோம்? மேரி யோசித்தாள் !

 அடுத்தது ‘ ஆட்டம் கொண்டாட்டம் ‘ மீனங்காடி மக்கள் தான் எப்படி எல்லோரும் ஓடி ஆடி விளையாடுகிறார்கள்?  அதில் தான் எவ்வளவு சந்தோஷ சக்தி  ! நாமும் விளையாட வேண்டும் ! எப்படி அந்த ஜாலி, சக்தியைக் கொண்டு வருவது ? – மேரி தீவிரமாக யோசித்தாள்.!

 மூன்றாவது படி ! ‘ அந்த நாள் ஞாபகம் நெஞ்சிலே ‘ – மீனங்காடியில் தொழிலாளிகள் வாடிக்கையாளர்களுடன் விளையாடி அவர்கள் நெஞ்சில் இடம் பிடிக்கிறார்கள்.  அது நல்ல எண்ணத்தையும் மகிழ்ச்சியான சூழ்நிலையையும் உருவாக்குகிறது.  நமது வாடிக்கையாளர்கள் யார் யார் ? நாம் எப்படி அவர்கள் கவனத்தை ஈர்க்கப் போகிறோம்? நாம் எப்படி அவர்களுக்கு ‘ அந்த நாள் ஞாபகத்தை நெஞ்சில் ‘ நிறைய வைக்கிறது ?

 கடைசியா ‘ ஒண்ணா இருக்கக் கத்துக்கணும் ‘ – எவ்வளவு அருமையான கருத்து ! மீனங்காடி மக்கள் எல்லோரும் ஒருமித்து வாடிக்கையாளர்களுடன் ஒன்றிப் போய் விடுகிறார்கள்.  நாம் எப்படி நமது வேலையோடு வாடிக்கையாளர்களோடு ‘ ஒண்ணா இருப்பது ?

       இவற்றை எல்லாம் விவரித்து விட்டு மேரி தன்  டிபார்ட்மெண்ட் மக்களிடம் சொன்னாள் !

       “இவற்றைப் பற்றித் தீவிரமாக யோசியுங்கள் ! எப்படி நாம் இவற்றை நம் செயலில் கொண்டு வருவது ? என்பது பற்றி ஆழமாக யோசியுங்கள்.  திங்கட்கிழமை நாம் சந்திக்கும்போது திட்டங்களோடு வாருங்கள்.  நாம் நிச்சயம் வெல்வோம்.!”

 

                         சனி – ஞாயிறு – மீனங்காடி  

 

image

      “ டீச்சரம்மா உங்களுக்கெல்லாம் ‘ ஹோம் ஒர்க்‘ கொடுத்து இங்கே அனுப்பியிருக்காங்களா?” டோனி சிரித்துக்கொண்டே சுஜாதாவிடம் கேட்டான்.  அவள் தலைக்கு மேலே ஒரு மீன் பறந்து போய்க் கொண்டிருந்தது 

 “ ஆமாம் எங்கள் பாஸ் எங்களை ஹோம் ஒர்க் செய்யச் சொன்னார்கள்!”

 “ யாரு மேரியா?”

 “ அட! மேரி மேடத்தை உங்களுக்குத் தெரியுமா?” அதற்குள்ளே ஆரம்பித்து விட்டது ‘ போகுது பார்’ ‘ போகுது பார் ‘ – இந்த சுறாமீன் சிங்கப்பூர் போகுது.’ டோனிக்கு சுஜாதாவின் கருத்தைத் தெரிந்து கொள்ள ஆசை! சுஜாதாவிற்கும் எப்படி இந்த மக்கள் அனைவரும் மனதும் வேலையும் ஒன்றாக இருக்கிறபடி இருக்கிறார்கள் என்று டோனியிடம் கேட்க ஆசை!.

 “ போன வாரம் மேரி கூட நீங்கள் வந்தபோது பார்த்திருக்கிறேன்.  நீங்கள் தானே அந்த கவுண்டர் பின்னால் போய் வெற்றிகரமாக மீனைப் பிடித்தது?”

 “ அட! நீங்களும் பார்த்தீர்களா! அது உங்களுக்கும் ஞாபகம் இருக்கா?”

 “ நல்லா ஞாபகம் இருக்கு! ஆமாம்! ஏன் நீங்கள் கொஞ்சம் டல்லாக இருப்பது போல் இருக்கிறீர்கள்?”

 

image

சுஜாதா தான் எழுதிய நோட்டுப் புத்தகத்தைப் பிரித்தாள். “ டோனி! எனக்கு உங்கள் செயல்பாட்டில் எல்லாம் புரியுது. ஒண்ணே ஒண்ணைத் தவிர. ‘ ஒண்ணா இருக்கக் கத்துக்கணும்’ என்கிறீர்கள். இப்போ நீங்க என்னோட இருக்கீங்க! அது ஓகே!  அப்புறம் அந்த ‘ அந்த நாள் ஞாபகம் நெஞ்சிலே‘ அன்றைக்கு நான் மீன் பிடித்தது இன்றைக்கு மட்டும் அல்ல, என்றைக்கும் என் நெஞ்சில் இருக்கும்.  அதுவும் ஓகே! மூணாவது ‘ ஆட்டம் கொண்டாட்டம் ‘ விளையாட்டு எனக்கு ரொம்பப் பிடிக்கும். நிறைய பேரை கலாட்டா செய்திருக்கிறேன் !  ஆனால் இந்த ‘ உங்கள் எண்ணத்தைத் தேர்ந்தெடுங்கள் ‘ என்று சொல்கிறீர்களே! அதுதான் புரியவில்லை.  அது எப்படி நாம் எண்ணத்தைத் தேர்ந்தெடுப்பது? மற்றவர்கள் தான் நம்மீது அதைத் திணிக்கிறார்களே! “

 “ சரியான கேள்வி சுஜாதா! இதுக்கு பதில் நம்ம ஓநாய்த் தலைவர்கிட்டேதான் இருக்கு.  அவர் ஒரு பெரிய ரேஸ் கார் ஒட்டினவர்.  ஒரு நாள் பலமான விபத்தில் அடிபட்டு பிழைத்ததே பெரிய காரியமாகக் கிடந்தார்!  மீதிக் கதையை அவர்கிட்டேயே கேளுங்கள்!  ஆனால் அதுக்குக் கடைக்குப் பின்னால் வார வேண்டியிருக்கும்.  அங்கே ஐஸ் கொட்டியிருக்கும். ரொம்ப குளிராக இருக்கும்! வர முடியுமா?” டோனி கேட்டான்.

 “ நான் அங்கே வர அனுமதி உண்டா?” – சுஜாதா கேட்டாள்.

 “ நாங்களும் வரலாமா?”

 திரும்பிப் பார்த்தால் சுரேஷ்! ரமேஷ்! அவனின் அழகான பையன்.

“ வாருங்கள் “ என்று சொல்லி அனைவரையும் அழைத்துக் கொண்டு ஓநாய்த் தலைவரைப் பார்க்கச் சென்றார்கள். அவர் தன் கதையை அழகாகச் சொன்னார்.  உருக்கமாகவும் இருந்தது. “ அந்த விபத்துக்குப் பிறகு நான் ஒவ்வொரு நாளும் என் எண்ணத்தைத் தேர்ந்தெடுக்கக் கற்றுக்  கொண்டேன்! அதுதான் எனக்குத் திருப்பு முனை – வழி காட்டி !  ஒவ்வொரு நாளும் எப்படி எப்படி அவர் மாறினார் என்பதை விளக்கமாகச் சொன்னார்.  மூவரும் வாயைப் பிளந்து கேட்டுக் கொண்டிருந்தனர்.  திங்கட்கிழமை மீட்டிங்கில் இதைப் பற்றிச் சொல்ல வேண்டும் என்று முடிவு எடுத்தார்கள்.

 அதற்குப் பிறகு சுரேஷ் வெளியே போய் விட்டான்.  சுஜாதாவும், ரமேஷும் அவனுடைய குழந்தையும் அருகில் உள்ள சிற்றுண்டிச் சாலைக்குச் சென்று காபி, சாக்லேட். கேக் என்று வாங்கி சாப்பிட்டார்கள்.  சுஜாதா தான்  முதலில் ஆரம்பித்தாள். “ ரமேஷ்! நம்ம குப்பைத் தொட்டியை முதலில் சுத்தம் செய்ய ஆரம்பிக்கணும்! இந்த வேலையை விட்டு விட்டு வேறு வேலைக்குப் போனால் அதுவும் இப்படி இருக்காது என்பது என்ன நிச்சயம்?  மேரி மாதிரி ஒரு நல்ல மேனேஜர் கிடைக்குமா? சந்தேகம் தான்! எனக்கு அவங்க கிட்டே ஒரு மரியாதை தோணுது.  பிரசாத்தைக் கூட அவங்க எதிர்த்துப் பேசினார்களாம்! எந்த மேனேஜருக்கு அந்த தில் இருக்கு?’

 “ சுஜாதா! நான் நினைச்சதையே நீயும் சொல்கிறாய்!  இந்த மீனங்காடி தொழிலாளர்களால் செய்ய முடியும் என்றால் நம்மால் ஏன் செய்ய முடியாது?  அதுவும் மேரி மாதிரி ஒரு மேனேஜர் இருக்கும்போது.  ஆனாலும் அது அவ்வளவு சுலபம் இல்லை சுஜாதா! நம்ம மக்கள் சிலருக்குக் கொஞ்சம் பயமா கூட இருக்காம். நாம் அவர்களுக்குத் தைரியம் சொல்லணும்.  அப்பத்தான் நாம் நினைக்கிற – எதிர்பார்க்கிற மாறுதல் கிடைக்கும்.”

 சுஜாதா மீனங்காடியை விட்டுக் கிளம்பும்போது பார்த்தாள், – மேலும் நாலைந்து அவளது ஆபீஸ் நண்பர்கள் குழந்தை குட்டிகளுடன் மீனங்காடியில் நுழைவதை!

  

                        திட்டத்தின் முதல் கட்டம்

 

image

திங்கட்கிழமை காலை முதல் குரூப் மீட்டிங்கில் ஆரவாரம் அதிகமாகவே இருந்தது.  மேரி வழக்கம் போல் பேச்சை ஆரம்பித்தாள். 

 “ இன்று நாம் புதிய அத்தியாயத்தைத் துவக்கப் போகிறோம்! நமது குப்பைத் தொட்டியைத் தூக்கி எறியப் போகிறோம்.  திட்டத்தை எப்படி செயலாற்றுவது என்பது தான் முதல் கட்டம்.  மீனங்காடியில் நாம் கண்டதை – கேட்டதை –  கற்றதை எப்படி நாம் அலுவலகத்தில் செயல் படுத்தப் போகிறோம் என்பதைப் பற்றி உங்கள் கருத்துக்களை – ஆலோசனைகளை – யோசனைகளை தெரிந்து கொள்ள ஆசைப் படுகிறேன்.  அவற்றை எல்லாம் நாம் தீவிரமாகப் பரிசீலிப்போம்.”

 சுஜாதாவும், ரமேஷும் எழுந்து தாங்கள் ‘ ஓநாய்த் தலைவருடன் ‘ பேசியதைப் பற்றி எடுத்துச் சொன்னார்கள்.  சுஜாதா தான் ஆரம்பித்தாள்.

 “ ஓநாய்த் தலைவர் நல்ல ஜாலியான மனிதர்.  ஆளைப் பார்த்தால்முதலில் கொஞ்சம் பயமாகத்தான் இருந்தது.  அதிலும் அவர் குரல் ரொம்பவே பயமுறுத்துவது போலத் தான் இருந்தது.  ஆனால் அவர் சொன்ன அவருடைய வாழ்க்கைக் கதை எங்களை மிகவும் உருக்கி விட்டது. அவர் ரேஸ் கார் வீரராக இருந்து ஒரு பெரிய விபத்திற்குப் பிறகு வாழ்க்கையே நொந்து போய்த் தவித்துக் கொண்டிருந்தாராம்.  அவரோட காதலி அவரை விட்டு விட்டுப் போய் விட்டாளாம்.  நண்பர்கள் கூட அவரிடம் பழகுவதைக் கொஞ்சம் கொஞ்சமாக நிறுத்தி விட்டார்களாம்.  அவர்மீது அவருக்கே வெறுப்பும் கோபமும் தோன்றியதாம்.  வாழ்க்கையே இருட்டாக இருப்பதைப் போல உணர்ந்தாராம்.

அப்போதுதான் அவருக்கு அந்த இரண்டு வழித் தத்துவம் தோன்றியதாம்.  ஒரு வழி – வாழ் நாள் முழுவதும் இழந்து போனதை நினைத்து வருத்தப்பட்டுக் கொண்டே சோகமாக இருப்பது, – மற்றொன்று அதை மறந்து விட்டு சந்தோஷமாக ஜாலியாக இருப்பது.  இந்த இரண்டு வழிகளில் ஒன்றைத் தேர்ந்து எடுக்க வேண்டும். அன்றைக்கே முடிவு செய்தாராம் – இனி வரும் நாட்களில் தான் மகிழ்ச்சியாக, ஜாலியாக இருப்பது என்று.  அதுதான் ‘ உங்கள் எண்ணத்தைத் தேர்ந்தெடுங்கள் ‘ என்ற தத்துவத்தின் கருத்து என்று விளக்கினார். “

 

image

ரமேஷும் தொடர்ந்தான் . “ என் பையனுக்கும் ஓநாய்த் தாத்தாவை மிகவும் பிடித்திருந்தது.  அவர் சொன்ன பிறகுதான் என்கிட்டே –  நம் மக்கள்கிட்டே எவ்வளவு சக்தி இருக்கிறது என்பதைப் புரிந்து கொண்டேன். ‘ ஓநாய்த் தலைவருடைய அறிவுரைப்படி நாம் செயலாற்றினால் இந்த அலுவலகத்தை நாம் ஒரு சந்தோஷமான இடமாக மாற்றலாம்.  ஒவ்வொரு நாளிலும் நாம் நமது எண்ணத்தைத் தேர்ந்தெடுப்போம்.  அது நல்லதா, சிறப்பா அமையணும்! அமையும்! “

 சுரேஷும் தன் கதையைச் சொன்னான்.

“ ஓகே! சுரேஷ்! ரமேஷ்! சுஜாதா! இந்த வார விடுமுறையில் நிறைய ‘ ஹோம் ஒர்க் ‘  செய்திருக்கிறீர்கள்.  ‘ ஓவர் டைம்  ‘கேட்காததற்கு நன்றி “

 மேரி சொல்லவும் கூட்டத்தில் கசமுசவென்று சிரிப்பு தெளித்தது.

 அதற்குப் பிறகு கிட்டத்தட்ட அரைமணி நேரம் எல்லோரும் அவரவர் கருத்துக்களைக் கூற ஆரம்பித்தனர்.  கடைசியில் மேரி, “ நாம் அடுத்தது என்ன செய்ய வேண்டும் என்பதைப் பற்றி யாராவது புதிதாக ஏதாவது சொல்ல முடியுமா?” என்று கேட்டாள்.

 இதுவரை வாயையே திறக்காமல் இருந்த ஒருவன் கூறினான்.

 “ நாம் ஏன் நான்கு டீம் தயார் செய்து அந்த மீனங்காடியின் நான்கு ஐடியாக்களையும் எப்படி உபயோகப் படுத்துவது என்று திட்டம் தீட்டக் கூடாது ?”

 மற்ற எல்லோரும் அதை ஆமோதித்தனர்.  அதைத் தொடர்ந்து மேரியும் “ ரொம்ப சரி! எனக்கும் இந்த யோசனை நன்றாகவே படுகிறது! எதற்கும் அடுத்த குரூப்பையும் கலந்து கொண்டு முடிவைச் சொல்கிறேன்”.

 மீட்டிங் முடிவில் ஒரு பேப்பரைக் கொடுத்து யார் யார் நான்கு டீமில் எதில் சேர ஆசைப்படுகிறார்கள் என்று கையெழுத்து வாங்கினாள்.  இரண்டாவது குரூப்பும் முதல் குரூப்பின் யோசனையை அப்படியே ஏற்றுக் கொண்டது.  அவர்களும் அவர்களுக்குப் பிடித்த டீமில் சேரக் கையெழுத்துப் போட்டுக் கொடுத்தனர்.

 முதல் கட்டம் தயார் ! செயலாற்ற வேண்டியதுதான் !

                         அணியில் சிறு சிறு மாறுதல்கள்

image

 ‘ ஆட்டம் கொண்டாட்டம்’ அணியில் சேர நிறையப்பேர் பெயர் கொடுத்திருந்தார்கள்.  மேரி அவர்களுடன் கலந்து பேசி ‘ எண்ணத்தைத் தேர்ந்தெடுங்கள் ‘  அணிக்குச் செல்பவர்களுக்கு மீனங்காடியில் இலவச ‘ டீ ஷர்ட் ‘ கிடைக்கும் என்றதும் சிலர் தாவினர்.  அணிகள் சரியாக அமைந்ததும் அதை ஆபீஸ் ஆர்டராகப் போட்டு நோட்டீஸ் போர்டில் ஒட்டினாள் மேரி!  அணிகள் எப்படி செயலாற்றுவது என்பதற்கான அறிவுரைகளையும் தயார் செய்தாள்.

                         அணிகளுக்கான அறிவுரைகள்

 ஒவ்வொரு அணிக்கும் ஆறுவார நேரம் தரப்படும்.  அதில் அவர்கள் மீட்டிங் போடுவது, வேண்டிய தகவலைச் சேகரிக்கிறது, கலந்து ஆலோசிப்பது எல்லாம் அடக்கம்!  கடைசியில் எல்லாவற்றையும் சேர்த்து ஒரு ‘ விளக்கப் படமாக ‘ – ‘ பிரஸன்டேஷன் ‘ தயார் செய்து மக்கள் முன் காட்ட வேண்டும்.

 விளக்கப் படங்களைத் தொடர்ந்து திட்டங்களை எப்படி நிறைவேற்றுவது என்ற குறிப்புகளையும் தர வேண்டும்.

 அணிவேலைக்கென்று வாரத்தில் ஒவ்வொருவருக்கும் இரண்டு மணி நேரம் அலுவலக நேரத்திலேயே சௌகரியப்படி ஒதுக்கித் தரப்படும்.  மற்றவர்கள் அந்த வேலையைப் பகிர்ந்து கொள்ள வேண்டும்.

 ஒவ்வொரு அணிக்கும் கைச் செலவிற்காக ஆயிரம் ரூபாய் தரப்படும்.

 அணிகள் அவரவர்களுக்கான மீட்டிங்கைத் தாங்களே தயார் செய்து கொள்ள வேண்டும்.

 எந்தப் பிரச்சினை வந்தாலும் அதைத் தீர்த்து வைக்க நான் எப்போதும் தயார்.  இருந்தாலும் அணிகள் தங்கள் பிரச்சினைகளைத் தாங்களே தீர்த்துக் கொள்வது தான் நல்லது.

   நாம் வேலை செய்யும் இடத்தை

  நாம் விரும்புகிற இடமாக மாற்றுவோம் !

  குட்லக்  –   மேரி 


(தொடரும்)

ரசித்த படைப்புகளும் படைப்பாளிகளும்                    (எஸ். கே. என்)

தமிழ்ச்செல்வன்

image

தானறிந்த பழகிய கிராமிய மக்களைப்பற்றிய, அவர்கள்உள்ளுணர்வுகளைத் தெளிவாகப் படம்பிடிக்கும் கதைகளை எழுதி வரும் திரு.தமிழ்ச்செல்வன் 

image

– பூ திரைப்படத்தின் மூலக் கதையான ‘வெயிலோடு போய்’ சிறுகதையைஎழுதியவர், 

– தமிழ்நாடு முற்போக்கு எழுத்தாளர் கலைஞர்கள் சங்கத்தின்பொதுச்செயலாளர். 

–   முன்னாள் இராணுவ வீரர்,

–  அறிவொளிஇயக்கத்தில் முன்னணித் தொண்டர், 

–  தொழிற்சங்கவாதி,

–  தபால்துறை ஊழியர் மற்றும்பண்பாட்டுத்தளத்தில் தொடர்ந்து பணியாற்றும் செயல்வீரர் 

என வாழ்வில் பன்முகங்கள்கொண்டவர் தமிழ்ச்செல்வன். 

                                           பதிமூன்றில் ஒன்று…..

“மனிதர்கள் கை கொடுக்காதபோது தெய்வத்தின்துணையை நாடும் நம்ம ஊர் வழக்கப்படி நடராஜன் பிள்ளையார் கோவில் வாசலில் கிடந்த ஒரு பாறையின்மேல் உட்கார்ந்திருந்தான்” என்று ’பதிமூன்றில் ஒன்று’ கதை தொடங்குகிறது

பெரிய நாயக்கர் வீட்டில் வேலைக்கு நிற்கும் ஒருவரின் மகனாக,பள்ளிக்கு சென்றாலும் விடுமுறைகளில் ஆடுமேய்க்க வேண்டிய சிறுவன் நடராஜன். முனைந்து
படித்தாலும் பள்ளியில் கணக்கும் ஆங்கிலமும் மூளையில் ஏற மறுக்கின்றன.

image

பெயிலாகிப் பெயிலாகித்தான் அடுத்த வகுப்புக்குப் போவான்.
பெயிலானதும் நல்லதுக்குத்தான் என்று அப்பா நாயக்கர் வீட்டு வேலைகளுக்குக் கூட்டிப்போவார்.
பட்டாளத்தில் இருக்கும் தாய் மாமன், லீவில் வந்தபோது கூப்பாடு போட்டு திரும்பவும்
பள்ளியில் சேர்ப்பார். நடராஜன் படித்தே ஆகவேண்டும் என்று தீர்மானத்துடன்
இருந்தார். இவன் மட்டுமல்ல, தெருப்பிள்ளைகள் யாரேனும்கூட பள்ளிக்குப்போகவில்லை
என்றால் அவர்கள் வீட்டிற்குச் சென்று சண்டைபோடுவாராம்.  ஒழுங்காக ஆடு மேய்க்கவிடாமல் மச்சினர் அழும்பு
செய்வதாக அப்பாவின் எண்ணம். அம்மா தன் அண்ணனின் கட்சி.

கதாசிரியரின் வார்த்தைகளில்:- “மகனின் படிப்பை
முன்னிட்டு ரெண்டு பேருக்கும் அடிக்கடி சண்டை நடக்கும். அதெல்லாம் நடராஜனை ஒருபோதும்
பாதிப்பதில்லை. அவன் பிரச்னை எல்லாம் அதமப் பொது மடங்கு, பின்னப் பெருக்கல், பிளஸ்
மைனஸ்கள், ஸ்டோரிகள், பாரகிராபுகள், ஆக்டிவ் வாய்ஸ், பேசிவ் வாய்ஸ்கள், கணக்கு
வாத்தியார் கந்தசாமி மற்றும் ஆங்கில ஆசிரியர் அழகேசன் சார்  இவ்வளவுதான்”  

நடராஜன் கணக்கு, ஆங்கிலம் தவிர எல்லாப் பாடங்களிலும் 70-80
வாங்கினாலும் கணக்கிலும் ஆங்கிலத்திலும் 20-30 க்கு கீழேதான்.

பரீட்சை பேப்பர்கள் கொடுக்கும்போது  எந்தப்பாடத்திலும் இருபது மார்க் வாங்கும்
பயல்களை ஒன்றும் சொல்லாமல், இவனைத்தான் கந்தசாமி சார் புளியம்விளாறால் விளாசுவார்.
–(“ஏம் பாடம்னா இளக்காரமா?)

"வேண்டுமென்று நான் கணக்கில் பெயிலாகவில்லை. தன்
குற்றம் எதுவுமில்லை. வச்சிக்கிட்டு நான் வஞ்சகம் செய்யவில்லை” என்று
மனமுருகி  கணக்குப் பேப்பரில் ஒருமுறை
எழுதியும் அவர் ஆவேசம் குறையவில்லை. மாறாக அதிகரித்தது.

ராவும் பகலும் புஸ்தகமும் நோட்டும் கண்ணீருமாய் கிடக்கும்
மகனைக்கண்டு பொறுக்காமல், இரண்டு வருசமாய் கொடை கொடுக்காததுதான் குத்தமோ என்று
இந்தவருடம் கிடா வெட்டிப் பொங்கலிடுவதாய் வேண்டிக்கொள்கிறாள் அம்மா.

மீசை, அருவா, நீட்டிய நாக்கு, சுற்றிலும் கறிக்குழம்பு
வாசனையுடன் ஆவேசமாக நிற்கும் மாடனுக்கும் கல்விக்கும் என்ன தொடர்பு இருக்கும்
என்கிற யோசனை இவனுக்கு. ஆனால் பானையில் கிழக்கு திசையில் பொங்கல் வழிந்ததாலும் ஒரே
வெட்டில் கிடாவின் தலை வேறானதாலும் அவன் அம்மாவுக்கு எந்த சந்தேகமும் இல்லை.

நடராஜனுக்கு தர்க்க ரீதியாக ஞானம் விரிந்துகொண்டு போனது. ‘நம்ம
சாமிகள் எல்லாம்  கிடாவும் கறியுமாக
படிப்பு வாசனை இல்லாமல்  இருக்க மேலத்தெரு
சாமியெல்லாம் சர்க்கரைப்பொங்கல், நாமக்கட்டி என்று இருக்கிறதே. நம்ப ஆளுங்க ஏன்
இப்படி சாமிக கிட்ட மாட்டிக்கிட்டாங்க?’

மறுநாள் காலையிலிருந்து
ஆளே மாறிவிட்டான். மூன்று தெரு தாண்டி பிள்ளையார் கோவிலுக்குப்போய் தினம்
108 தோப்புக்கரணம் போட ஆரம்பிக்கிறான். கோரிக்கை இரண்டு (1) ஆங்கிலத்திலும்,
கணக்கிலும் பாஸாக வேண்டும் (ஜஸ்ட் பாஸ்) (2) கந்தசாமி சாரை வேறு ஊருக்கு
மாற்றிவிடவேண்டும்.

கந்தசாமி சாரை  மாற்றுவதாகத்
தெரியவில்லை. ஆனால் மாதம் ரூ 40ல் (அவரிடமே ட்யூஷன்) பிரச்சினை தீர்கிறது.          

கணக்கிற்கு பிள்ளையார் சரியாக இருந்தாலும், ஆங்கிலத்திற்காக
சர்ச்சில் மண்டியிடத் தொடங்குகிறான். (அதிலும் ஒரு குழப்பம் – ஏசுவிற்கு
தாய்மொழி  ஹீப்ருவாமே ஆங்கிலம் அல்லவே?)

மாமா லீவிற்கு
வீட்டிற்கு வந்திருந்த சமயம் ஒன்பதாம் வகுப்பு முடிவுகள் வருகிறது.
நிச்சயம் பெயில்தான். ஆங்கிலமும் கணக்கும் கவிழ்த்தே தீரும் என்று இருந்தவனுக்கு
பாஸான அதிர்ச்சி தாங்கமுடியவில்லை.

ஆனாலும், புதிதாக வந்த ஹெட் மாஸ்டர், கிரேஸ் மார்க் போட்டு
பாஸ் ஆன பதிமூன்று பேரை பத்தாவதில் சேர்க்கமுடியாது என்று வெளியில் நிறுத்தி
விடுகிறார். அதில் இவனும் உண்டு.

வேறு பள்ளியில் முயற்சித்தும் அந்தப்பள்ளி பிடிக்காமல் இவன்
மட்டும் மாமாவுடன் திரும்பவும் ஹெட் மாஸ்டரைப் பார்க்கக் காத்திருக்கையில், எந்தச்
சாமியை  வேண்டிக்கொள்ள வேண்டும் எனத்
தெரியவில்லை.

‘ஹெட் மாஸ்டர் உள்ளே வரச் சொன்னதாகக் ப்யூன் வந்து
அழைத்தார்’ என்றுகதை முடிகிறது.  

ஒரு நீதிபோதனையாகவோ, இதனால் அப்படியாகி இப்படி முடிந்தது
என்னும் சம்பவக்கோர்வையாகவோ இல்லாமல் கதைகளை யதார்த்த இலக்கியப் படைப்புகளாக மிளிர
வைப்பவை அவற்றின் நடையும், உரையாடல்களும்.

இவரது ‘சிவராணி’,  ’…மற்றும்
மைனாக்கள்" மனதை ஈர்க்கின்றன. இணையத்தில் படிக்கக் கிடைக்கும் மற்றுமிரு
கதைகள்  


தமிழ்ச்செல்வனின் இரண்டு அருமையான கதைகளைப் படிக்க விரும்பினால் இந்த லிங்கை கிளிக் செய்யவும். ———–>

வெயிலோடு போய்        

கருப்பசாமியின் அய்யா

இதயக் கோளாறு! உயிர் காக்கும் மருந்து! 

நாற்பது ரூபாய்க்கும் குறைவான இந்த மூன்று மருந்துகளையும் உங்கள் பாக்கெட்டில் கிரெடிட் கார்ட். மொபைல் மாதிரி வைத்திருங்கள்! ஹார்ட்அ ட்டாக் உங்களுக்கோ மற்றவர்களுக்கோ வரும் போல இருந்தால் உபயோகப் படுத்துங்கள்! 

அவை என்னென்ன ? 

1. DISPIRIN

2. ATARVASTATIN

3,CLOPIDOGREL 


உங்கள் டாக்ட ரைக் கேட்டு இந்த உயிர் காக்கும் மருந்துகளை எப்போதும் உங்கள் பாக்கெட்டில் வைத்திருங்கள்! 

அனுபவம் புதுமை!!

image

பிறப்பின் வருவது யாதெனக் கேட்டேன்
பிறந்து பாரென இறைவன் பணித்தான்!


படிப்பெனச் சொல்வது யாதெனக் கேட்டேன்
படித்துப் பாரென இறைவன் பணித்தான்!


அறிவெனச் சொல்வது யாதெனக் கேட்டேன்
அறிந்து பாரென இறைவன் பணித்தான்!


அன்பெனப் படுவது என்னெனக் கேட்டேன்
அளித்துப் பாரென இறைவன் பணித்தான்!


பாசம் என்பது யாதெனக் கேட்டேன்
பகிர்ந்து பாரென இறைவன் பணித்தான்!


மனையாள் சுகமெனில் யாதெனக் கேட்டேன்
மணந்து பாரென இறைவன் பணித்தான்!


பிள்ளை என்பது யாதெனக் கேட்டேன்
பெற்றுப் பாரென இறைவன் பணித்தான்!


முதுமை என்பது யாதெனக் கேட்டேன்
முதிர்ந்து பாரென இறைவன் பணித்தான்!


வறுமை என்பது என்னெனக் கேட்டேன்
வாடிப் பாரென இறைவன் பணித்தான்!


இறப்பின் பின்னது ஏதெனக் கேட்டேன்
இறந்து பாரென இறைவன் பணித்தான்!


‘அனுபவித்தேதான் அறிவது வாழ்க்கையெனில்
ஆண்டவனே நீ ஏன்’ எனக் கேட்டேன்!


ஆண்டவன் சற்றே அருகு நெருங்கி
‘அனுபவம் என்பதே நான்தான்’ என்றான்!


கவிஞர் கண்ணதாசனின்  அனுபவ வரிகள்!! 

நண்பரின் facebook பக்கத்தில் படித்தது!! 

image

1917 ஜனவரி 17 இல் பிறந்த எம்‌ஜி‌ஆர் , தமிழகத்தை – தமிழ்த் திரைத் துறையை – தமிழக மக்கள் மனத்தை பல ஆண்டுகளாக ஆண்டவர். 

அவர் பேசுவது நீண்ட சொற்கள் என்பார்கள்!

அவர் நடிப்பது நாட்டிய நாடகம் என்பார்கள்!

அவர் பழகுவது தன் இமேஜை வளர்க்க என்பார்கள்!

அவர் அரசியலில் முதிர்ச்சி அடையாதவர் என்பார்கள்!

ஆனால் பேசுவதில், நடிப்பதில் , பழகுவதில், அரசியலில் மாபெரும் வெற்றியாளராக இருந்தார் என்பதில் சந்தேகமேயில்லை!!! 

67இல் குண்டடிபட்ட  பிறகு அவர் தொட்டதெல்லாம் வெற்றி! 

வெற்றி மீது வெற்றி வந்து என்னைச் சேரும் 
அதை வாங்கித் தந்த பெருமை எல்லாம் உன்னைச் சேரும் 

என்று நம்மைப் பார்த்துப் பாடியவர். 

டாக்டர் , பொன்மனச் செம்மல், மக்கள் திலகம், புரட்சி நடிகர், புரட்சித் தலைவர், பாரத், பாரத ரத்னா என்று பட்டங்களுக்குப் புகழ் சேர்த்தவர்.  

அவர் ஒரு சகாப்தம்!