அம்மா கை உணவு (15) – ஊறுகாய் – சதுர்புஜன்

 

 

 

 

 

 

 

 

 

நம் வீடுகளில் அன்றாடமோ அல்லது விசேஷ நாட்களிலோ தயாரிக்கும் உணவு வகைகளை வரிசைப்படுத்தி அவற்றின் மகிமைகளை வியந்து எளிய தமிழில் பாடப்படும் கவிதைப் பாடல்கள் இவை. இது ஒரு அறுசுவைத் தொடர். ஒவ்வொரு மாதமும் ஒரு கவிதைப் பாடலை வாசகர்களுக்கு வழங்கி மகிழ்கிறேன்.

 

  1. கொழுக்கட்டை மஹாத்மியம் – மார்ச் 2018 .
  2. இட்லி மகிமை – ஏப்ரல் 2018
  3. தோசை ஒரு தொடர்கதை – மே 2018
  4. அடைந்திடு சீசேம் – ஜூன் 2018
  5. ரசமாயம் – ஜூலை 2018
  6. போளி புராணம் – ஆகஸ்ட் 2018
  7. அன்னை கைமணக் குறள்கள் – செப்டம்பர் 2௦18
  8. கலந்த சாதக் கவிதை – அக்டோபர் 2018   
  9. கூட்டுக்களி கொண்டாட்டம் – நவம்பர் 2018
  10. சேவை செய்வோம் – டிசம்பர் 2018
  11. பஜ்ஜி பஜனை – ஜனவரி 2019
  12. பருப்புசிலி பாசுரம் – பிப்ரவரி 2019
  13. வெண்பொங்கல் வேண்டுதல் – மார்ச் 2019
  14. பாயசப் பாமாலை – ஏப்ரல் 2019

 

 

ஊறுகாய் உற்சாகம் !

 

ஊறுகாய் என்றாலே ஏதோ ஊறுதே !

ஏதேதோ ஞாபகங்கள் வந்து சேருதே !

தொட்டுக்க ஒன்றிருந்தால் எதுவும் இறங்குமே !

தொடத் தொடத் தொடரும் ஊறுகாய் பந்தமே !

 

தயிர் சாதம் என்றாலே ஊறுகாய் வேண்டும் !

சளக் பொளக்கென்று உள்ளே செல்லுமே !

உப்புமா பொங்கல் என்று அனைத்திற்குமே

ஊறுகாய் தொட்டுக் கொண்டால் ருசியும் கூடுமே !

 

அப்பப்பா எத்தனை வகை ஊறுகாய்களே !

அன்னை கையால் நானும் உண்ட ஊறுகாய்களே !

சின்ன வயதில் தின்று தீர்த்த கவளம் எத்தனை ?

கூடவே துணைக்கு சென்ற ஊறுகாய்கள் எத்தனை !

 

எண்ணெய் மாங்காய் என்ற ஒரு எளிய ஊறுகாய் !

எந்த கல்யாண விருந்தென்றாலும் இருக்கும் ஊறுகாய் !

சின்னச் சின்ன துண்டாக சுவைத்து உண்ணுவோம் !

சிறு பிள்ளை போல் கடித்து ரசித்து தின்னுவோம் !

 

வடு மாங்காய் என்றால் நாவில் எச்சில் ஊறுமே !

வெடுக்கென்று கடித்துக் குதைத்து சாப்பிடுவோமே !

தொக்கு மாங்காய் என்றால் கண்ணில் நீரும் ஊறும் !

சுவைக்க சுவைக்க கூட இரண்டு கவளம் போகும் !

 

மாகாணி என்ற ஒரு மகா ஊறுகாய் !

மாகாளி வந்தாலும் எங்கே என்பாள் !

போகாத ஊருக்குப் போக வேண்டாம் !

மாகாணி இருந்தால் வேறு எதுவும் வேண்டாம் !

 

நெல்லி ஊறுகாய் நாவில் ஊறும் ஊறும் !

உடல் மனதில் உற்சாகம் சேரும் சேரும் !

கோங்குரா சட்னி என்று ஆந்திரம் சொல்லும் !

புளிப்பும் உரப்பும் சேர்ந்த சுவை அள்ளும் அள்ளும் !

 

கிடாரங்காய் ஊறுகாய் என்று சொன்னால் போதுமே –

அடங்காது போகும் என் ஆசைத் தீயுமே !

நார்த்தங்காய் சாதாரண காயல்லவே !

உப்பு உரப்பு என்று பற்பல சுவை காட்டுமே !

 

வேப்பிலைக் கட்டி சிறிதளவு இருந்தால் போதும் !

தட்டு நிறைய சாதம் கூட காலியாகுமே !

பச்சை மிளகு ஊறுகாய் பாட்டிலைக் கண்டால்

பக பகவென அடி வயிற்றில் பசியைக் கிளறுமே !

 

எத்தனை வித மனிதர்கள் இந்த உலகினில் உண்டோ –

அத்தனை வித ஊறுகாய்கள் நம் ஊரினில் உண்டு !

அன்னை போல ஒரு தெய்வம் உலகில் உள்ளதோ !

அவளின் கை உணவு நமக்கு அமிர்தம் அல்லவோ !

 

     

 

 

 

     

எங்க ஊர் எம்.எல்.ஏ – எஸ் கே என்

Image result for எம் எல் ஏ கார்ட்டூன்

ஒரு வித்தியாசமான சூழ்நிலையில் அய்யாச்சாமி எங்க ஊர்  எம்.எல்.ஏ ஆனார். அது குருட்டு அதிர்ஷ்டமா, தற்செயலா விதியா என்று நீங்களே சொல்லுங்கள்.

மாநிலம் முழுவதும் இயங்கிவந்த அதிகப் பிரபலமில்லாத  வெண்புறா மக்கள்  இயக்கம் என்னும் அமைப்பில்  அவர் நெடுநாளைய அங்கத்தினர். அவரது ஊர் ஒரு சிறு நகரம். நகரப் பஞ்சாயத்து என்று சொல்வார்கள்.  நகரசபை என்று அழைக்கப்படுவதற்கான ஜனத்தொகையோ வரிவசூலோ இல்லாத சிறிய நகரம் அல்லது சற்றுப் பெரிய கிராமங்கள் இந்த வகையில் சேரும்.

ஊரில் வீரப்பன் என்று ஒரு டீ கடைக்காரர் இருந்தார். அவர் ஒரு கட்சியில் அங்கத்தினராக இருந்தார். கட்சி நடத்தும் பொதுக் கூட்டங்களில்  முக்கியமான தலைவர்கள் வரும்வரை பேசுவதற்கென்றே சிலர் இருப்பார்கள். இந்த வட்டாரத்தில் அது வீரப்பன்தான். அரசியல் நடப்புகள் பெரிதாகத் தெரிந்திருக்கவேண்டிய  அவசியம் இல்லை. கட்சி ஆதரவு பத்திரிகைகளில் வரும்  செய்திகளைப் படித்துவிட்டுச் சற்று ஏற்றஇறக்கங்களோடு கொஞ்சம் அடுக்குச் சொற்கள் சேர்த்து அடித்து விடவேண்டியதுதான்.

ஒரு முறை சட்டசபைத் தேர்தலில் மாற்று வேட்பாளராக மனுத்தாக்கல் செய்யச்சொன்னார்கள்.  இவரும் செய்தார். அதிகாரபூர்வ வேட்பாளரின்  மனு  ஏற்கப்பட்டபிறகு வாபஸ் வாங்கியிருக்கவேண்டும். சரியாக அந்த சமயத்தில் இவரது மாமனார் இறந்துபோனார். ஓட்டுச் சீட்டில் வீரப்பன் – சுயேச்சை – தையல் இயந்திரம் சின்னம் என்று   அச்சடிக்கப்பட்டு இருந்தது. இவரே தனக்கு ஓட்டுப்போடவில்லை. அதிகாரபூர்வ வேட்பாளருக்குத்தான் ஓட்டுப்போட்டார். அனாலும் இவருக்கு அறுபத்தி ஏழு ஒட்டு கிடைத்தது. தேர்தல் எல்லாம் முடிந்தபிறகு ஓட்டுச் சாவடியில் ஒட்டியிருந்த வேட்பாளர்கள் பட்டியல் அறிவிப்பை எப்படியோ உரித்து எடுத்துக்கொண்டு வந்துவிட்டார். இன்னும் அவரிடம் அது இருக்கிறது.

நண்பர்கள் சிலர் இவரை உசுப்பிவிட்டார்கள். கட்சியில் ஏதேனும் பொறுப்பை எடுத்துக்கொண்டு ‘முன்னேற’ ஆலோசனை சொன்னார்கள். கட்சி நடத்திய அந்த வட்டச் செயலாளர் தேர்தலில் போட்டியிட்டார். தோற்றுப்போனார். தனது ஆதரவாளர்கள் தன்னைக் கைவிட்டுவிட்டார்கள் என்கிற வருத்தத்தில் கட்சியிலிருந்து விலகினார். சில நாட்கள் தானுண்டு தன் கடையுண்டு என்று இருந்தார். அப்போதுதான் வெண்புறா மக்கள்  இயக்கத்தின் தலைவர் இவர் ஊருக்குத் தன் உறவினர் வீட்டுத் திருமணத்திற்கு  வந்திருந்தார்.   இவர் கடையில் டீ சாப்பிட்டுக் கொண்டிருக்கும்போது  வீரப்பன் மேடையில் நன்றாகப் பேசுவார் என்று யாரோ சொல்லியிருக்கிறார்கள்.

தன் இயக்கத்திற்கு  இந்த ஊருக்கு ஒரு கிளை அமைக்க வீரப்பனையும் சில நண்பர்களையும் சேர்த்தார். வீரப்பன்தான் தலைவர். மாதம் ஒரு கூட்டம் நடத்துவார்கள். பொதுவாக குடிநீர், குப்பைவண்டி, பேருந்து நிழற்குடை என்று ஒரு கோரிக்கையைத் தீர்மானமாக நிறைவேற்றுவார்கள். தாசில்தார், கலெக்டர் என்று பார்த்து மனுக்கொடுப்பார்கள்.

Image result for எம் எல் ஏ கார்ட்டூன்அய்யாச்சாமி வீரப்பனின் பள்ளித் தோழர். இவருக்கும் பொதுவாழ்விற்கும் காததூரம். அவருக்கு இரண்டு மகன்கள். இருவரும் சென்னையில் வேலை பார்த்துக்கொண்டு இருந்தார்கள். இவருக்கு இருந்த விவசாய நிலத்தை எல்லாம் விற்றுத்தான் மகன்களை படிக்கவைத்தார்.   மனைவியை இழந்து சில ஆண்டுகள் ஆகியிருந்தது. மகன்கள் அனுப்பும் பணத்தில் வாழ்க்கையை நடத்திக்கொண்டு இருந்தார். பிள்ளைகள் இருவரும் பணம் அனுப்பத் தவறவே மாட்டார்கள்.

ஆனாலும், பணம் கைக்கு வர தாமதம் ஆனால் வீரப்பனிடம் அவ்வப்போது கைமாற்று வாங்க நேரிடும். வீரப்பன் மனுக்கொடுக்கப் போகும்போது வேறு ஆளில்லை என்றால்  அய்யாச்சாமியும் நண்பரோடு கூடப்போக நேரிடும். கைமாற்றுக் கொடுக்கிறாரே அந்த நன்றி உணர்ச்சியாகக்கூட இருக்கலாம்.

வெண்புறா மக்கள்  இயக்கம் கூட்டங்கள் என்பது பொதுக் கூட்டம்போல இருக்காது. அவர்கள் ஊரில் மொத்த அங்கத்தினரே இருபது நபர்தான் தேறும். அதில் செயற்குழு என்று பத்துபேர். சந்தா எல்லாம் பெயருக்குத்தான். மூன்றே செலவுகள்தான். கூட்டத்தில் அனைவருக்கும் டீ.  இது வீரப்பன் உபயம்.  போக்குவரத்து செலவு – இதுவும் மாவட்ட அல்லது தாலுக்கா நகரில் வேலையிருக்கும் யாராவது அழைத்துப் போய்விடுவார். பஸ் சார்ஜ் யார் கொடுக்கிறார்கள் என்று யாரும் கவனிப்பதுகூடக் கிடையாது. மூன்றாவது செலவு இயக்கத்தின் தலைமை அலுவலகத்திற்கு மாதம் ஒருமுறை நடவடிக்கைகள் குறித்து அறிக்கை அனுப்பும் தபால் செலவு.

அரசியல் சார்பற்று இயங்கிவந்த  அந்த  இயக்கத்தில் நாகேந்திரன் என்ற ஒரு அரசியல்வாதி தலைமை அலுவலகத்தில் ஒரு பொறுப்பு ஏற்றார். ஒவ்வொரு தேர்தல்போதும் தங்கள் ஆதரவை போட்டியிடும் இரண்டில் ஒரு கூட்டணிக்கு என்று இயக்கம் அறிவிக்கத்தொடங்கியது. (ஒரு சௌகரியத்திற்காக இரண்டு கூட்டணிகளுக்கும் ஒரு பெயர் வைத்துக்கொள்வோம். ஆளும் கூட்டணி, மக்கள் மகேசன் கட்சியின் தலைமையில் உழக்குக் கூட்டணி. எதிர்கட்சிக் கூட்டணி- ஜனநாயகக் குடிமக்கள் கட்சி தலைமையில் ஆழாக்குக் கூட்டணி)

சென்னையிலும் மாவட்டத் தலைநகரங்களிலும் பொதுக் கூட்டங்கள் நடத்த ஆரம்பித்தது. பல மாவட்டங்களில் சொல்லத் தகுந்த அளவிற்கு அங்கத்தினர்கள் சேர்க்கப்பட்டார்கள். அந்த அந்த ஊரின் முக்கியஸ்தர்கள் இயக்கத்தில் சேர்ந்தார்கள். கொஞ்சம் கொஞ்சமாக அது ஒரு அரசியல் சார்பு இயக்கம் ஆகியது.

ஆனால் அய்யாச்சாமி ஊரில் மட்டுமின்றி அவர்கள் மாவட்டத்திலும் இயக்கம் பெரியதாக வளரவில்லை. இவர் ஊர் தவிர இன்னும் வெகுசில இடங்களிலேயே கிளைகள் இருந்தன. அவையும் பெரியதாகச் செயல்பட்டன என்று சொல்ல முடியாது.

ஆளும் கட்சியில் பிளவு ஏற்பட்டது. பெரும்பான்மை ஒரு கேள்விக்குறியானது.  எதிர்கட்சிகளுக்குள்ளும் ஒற்றுமை இல்லை. அரசியல் நிலவரம் குழப்பமாக இருந்தது. இந்நிலையில் எதிர்கட்சிகளில் ஒரு கட்சி ஆளும் கட்சியோடு ஒரு மறைமுக ஒப்பந்தம் செய்துகொண்டது. நம்பிக்கை ஓட்டெடுப்பில் வெளிநடப்பு செய்ய ஒரு நிபந்தனையோடு  ஒப்புக்கொண்டது.  நம்பிக்கை ஓட்டெடுப்பு வெற்றியடைந்தால்   சட்டசபையைக் கலைத்துவிட்டு தேர்தல் நடத்தவேண்டும். தேர்தலில் ஆளும்கட்சியின் உழக்குக் கூட்டணியில்   இந்தக் கட்சியும் சேர்ந்துகொள்ளும்.

மேலெழுந்தவாரியாகப் பார்க்கும்போது இதனால் என்ன லாபம் என்று கேட்கலாம். இப்போது ஏழு  சட்டசபை உறுப்பினர்கள் கொண்ட கட்சிக்கு புதிய ஏற்பாட்டில் எண்ணிக்கை  குறைந்தது இரட்டிப்பாகும்  என்கிற நம்பிக்கை. கட்சித் தலைவரின் மகனுக்குப் போட்டியிட வாய்ப்புக்கிடைக்கும் என்றுதான் இந்த ராஜதந்திரம் என்று சிலர் அபிப்பிராயப்பட்டார்கள்.

திட்டப்படி எல்லாம் நடந்து தேர்தல் வந்தது. எந்தக் கட்சி  எந்தக் கூட்டணியில் என்று நாளொரு செய்தி  வந்தவண்ணம் இருந்தது.  இந்தமுறை ஆதரவு மட்டுமே தெரிவித்துவந்த வெண்புறா மக்கள்  இயக்கம் இரண்டு கூட்டணிகளுடனும் பேச்சுவார்த்தை நடத்தியது. பத்து தொகுதிகள் கொடுத்தால்தான் கூட்டணியில் சேருவோம் என்று பேரம் நடந்தது. இரண்டு கூட்டணிகளும் அவ்வளவு தொகுதிகள் கொடுக்கத் தயாராக இல்லை.

வேட்புமனு தாக்கல் செய்ய கடைசி நாளுக்கு இரண்டே நாட்கள் இருந்தன.  வெண்புறா இயக்கம் எல்லாத் தொகுதியிலும் வேட்புமனுத் தாக்கல் செய்ய  முடிவெடுத்தது. இரண்டு கூட்டணிகளுக்கும் அழுத்தம் கொடுக்கும் முயற்சி இது. அய்யாச்சாமி, வீரப்பன் அவர்களின் தொகுதியில் வீரப்பன் மனுத் தாக்கல்செய்ய முடிவெடுத்தார்கள். அவர் பெயரை முன்மொழிய என்று ஊரிலிருந்து சிலரையும் அழைத்துக்கொண்டு மாவட்டத் தலைநகர் போனார்கள். அய்யாச்சாமியும் அதில் ஒருவர்.

வேட்புமனு தாக்கலின்போது ஒரு விஷயம் தெரியவந்தது. வீரப்பன் சென்ற தேர்தல் முடிந்ததும் செலவுக் கணக்கு தாக்கல் செய்திருக்க வேண்டும். அந்த விவரமே அவருக்குத் தெரியாது. அவர் மனு நிராகரிக்கப்பட்டது.. வேறு வழியில்லாமல் அய்யாச்சாமியை வேட்புமனு தாக்கல் செய்ய வைத்தார்கள். எப்படியும் வாபஸ் வாங்கத்தானே போகிறோம் என்று இவரும் வேட்புமனு தாக்கல்செய்தார்.

Image result for எம் எல் ஏ கார்ட்டூன்சென்னையில் பேரம் மும்மரமாக நடந்தது. கடைசியில் உழக்குக் கூட்டணி வெண்புறா இயக்கத்திற்கு எட்டு தொகுதிகள் என்று ஒப்புக்கொண்டது. தொகுதிகளும் வெண்புறா இயக்க மற்றும் மகேசன் கட்சி வேட்பாளர்களின் வெற்றிவாய்ப்பை வைத்து ஏழு தொகுதிகள் முடிவாயின.

வாபஸ் வாங்க சில மணி நேரமே  இருக்கும்போது  ஒரு பெரிய அதிசயம் நடந்தது. அய்யாச்சாமி வாபஸ் வாங்கப் போயிருக்கிறார். அவருக்கு தலைமை அலுவலகத்திலிருந்து வாபஸ் வாங்க வேண்டாம் என்று போன் வந்தது.

உழக்குக் கூட்டணி சார்பில் போட்டியிட இருந்த மகேசன் கட்சி வேட்பாளரான அய்யாக்கண்ணு வாபஸ் வாங்கிவிட்டாராம். செல்வாக்கான குடும்பத்தைச் சேர்ந்தவர் அய்யாக்கண்ணு.  குடும்பத்தில்  ஏதோ பிரச்சனை. அய்யாக்கண்ணுவின் மூன்று அண்ணன்களும் இவரை போட்டியிடக்கூடாது என்று அதட்டியிருக்கிறார்கள்.  இவரும் யாருக்கும் தெரியாமல் ஓசைப்படாமல் வாபஸ் வாங்கிக்கொண்டு போய்விட்டார். உழக்குக் கூட்டணிக்கு இந்தத் தொகுதிக்கு சரியான வேட்பாளர் இல்லாமல் போனது.

வெண்புறா இயக்கத்திற்கு என்று முடிவாகாமல்  இருந்த எட்டாவது தொகுதியாக அய்யாச்சாமியின் தொகுதி முடிவானது. வெண்புறா மக்கள் இயக்க வேட்பாளர்கள் மகேசன் கட்சியின் சின்னத்தில்தான் போட்டியிட்டார்கள்.  மகேசன் கட்சியின் அதிகாரபூர்வ சின்னம் அய்யாச்சாமிக்கு ஒதுக்க அனுமதிக் கடிதம் மகேசன் கட்சி தலைமை அலுவலகத்திலிருந்து இரவு முழுதும் காரில் பயணம் வந்துசேர்ந்தது.

தேர்தலில் அய்யாச்சாமி சில ஆயிரம் வாக்கு வித்தியாசத்தில் வெற்றியும் பெற்றார். எல்லாக் குழப்பத்தாலும்- வீரப்பன் தகுதி இழந்தது, அய்யாக்கண்ணு வாபஸ் வாங்கியது, அதிகார பூர்வ சின்னம் கிடைத்தது மேலும் அய்யாச்சாமிக்கும்  அய்யாக்கண்ணுவிற்கும் வாக்காளர்    பலருக்கு வித்தியாசம் தெரியாமல் போனது- பலனடைந்தவர் அய்யாச்சாமிதான்.

தேர்தல் பிரச்சரத்தின்போது தனது  அனுபவங்கள்ற்றி அய்யாச்சாமி ஒரு புத்தகம் எழுதிவருகிறார் என்பது ஒரு கூடுதல் செய்தி.

எஸ்.கே.என்

 

 

ஆஸ்காருக்குச் செல்லும் “கமலி” குறும்படம்

 

 

இப்போது குறும்படங்கள் சமூக வலைதளத்தில் வெளியாகி நல்ல வரவேற்பை பெற்றுவருகின்றன. தமிழகத்தை சேர்ந்த ஒன்பது வயது சிறுமி கமலியை பற்றிய குறும்படம் 2020ம் ஆண்டுக்கான ஆஸ்கர் விருது பரிந்துரை பட்டியலில் இடம்பெற்றுள்ளது .தமிழகத்தில் இருக்கும் மகாபலிபுரத்தை சேர்ந்தவர் ஒன்பது வயதான கமலி மூர்த்தி. ஸ்கேட்போர்டை சர்வ சாதாரணமாக பயன்படுத்தும் திறன் கொண்டவர் இவர் . கமலி கவுன் அணிந்து ஸ்கேட்போர்டை பயன்படுத்தியபோது எடுத்த புகைப்படம் பிரபல ஸ்கேட்போர்டரான டோனி ஹாக்கின் பார்வையில் பட்டது.

காலில் செருப்பு கூட இல்லாமல் ஒரு சிறுமி அசாத்தியமாக ஸ்கேட்போர்டை பயன்படுத்தியதை பார்த்து ஆச்சரியப்பட்ட டோனி அந்த புகைப்படத்தை பகிர கமலி உலக அளவில் பிரபலமானார். இதனையடுத்து நியூசிலாந்தை சேர்ந்த ஷஷா ரெயின்போ என்கிற இயக்குநர் தமிழகத்திற்கு வந்து கமலியை குறித்து 24 நிமிட குறும்படத்தை இயக்கினார். அந்த குறும்படம் கடந்த மாதம் நடைபெற்ற அட்லாண்டா திரை விழாவில் சிறந்த ஆவணப் படத்திற்கான விருதை தட்டிச் சென்றுள்ளது.

( நன்றி: தின செய்தி மற்றும் இந்தியா டு டே ) 

 

சுகந்தி என்ற தாய் தான் மகள் கமலி தன்னைப்போல் வீட்டுச்சிறையில் மாட்டிக்கொள்ளும் பறவையாக இருக்கக்கூடாது என்பதற்காக அவளுக்குக் கற்றுத்தரும் பாடம் ஸ்கேட் போர்ட் ( SCATE BOARD) 

தாய் மகளுக்குத் திறந்த வேலி ! திறந்தவெளி !!

அதன் டீசரைப் பாருங்கள் !

 

 

 

 

பாண்ட்ய குமாரன் ஐயப்பன் -பதினெண் பாடல்- சு.ரவி

 
Image result for பாண்டிய குமாரன் ஐயப்பன்
பாண்ட்ய குமாரன் ஐயப்பன் பற்றி 18 பாடல்கள் !
சுந்தரகோபாலம் உரவன மாலம்
நயன விடலாம் துக்கஹரம்….

பஜ நந்தகுமாரம் சர்வஸுக சாரம் நத்வவிசாரம் ப்ரம்மபரம்” என்ற

நந்தகுமார அஷ்டகம்  போல அமைத்த பாடல் வரிகள் !
இசை அமைத்துப் பாடியவர் திருமதி க்ருபா ரமணி !
பாடலைக் கீழே கொடுத்துள்ள  இணைப்பில்  ( கண்ட்ரோல் கிளிக் செய்யுங்கள் )கேளுங்கள். மெய் மறந்து போவீர்கள்!  

 சுந்தர  வடிவாகும் சின்மயரூபம் சபரிகிரீசம் சாந்திமயம்

சங்கரனரிகூடும் சங்கமநேரம் பம்பைக் கரையினில் அவதாரம்

சந்தனமணம் சூழும்கானகமாளும் தெய்வம் அருளும் கவிதைவரம்!

பஜபாண்ட்யகுமாரம் தத்வமஸிசாரம் ஜோதிஸ்வரூபம் ப்ரம்மபரம்!

 

தண்மதிவதனம் செந்தாமரைநயனம் தவரூபம் சிவவைராக்யம்!

தண்மதிசூடும் சிவம் மோஹினி இணையும் தருணம் பாலன் அவதாரம்!

மண்டலவ்ரதம்கேட்கும் மன்னவன்காட்டில் அவனருளால் முள்மலராகும்!

பஜபாண்ட்யகுமாரம் தத்வமஸிசாரம் ஜோதிஸ்வரூபம் ப்ரம்மபரம்!

 

சின்முத்ரைக்கரம் சிவனம்சம்என்றால் மோஹினி போலவன் நளினகரம்!

சிந்தனைகள் இணையும் அரனும்அரியும்அருளும் அற்புத தெய்வாம்சம்!

கன்மத்திரைவிலகும்    மாயைமறையும் கடைவிழிநோக்கில் ஞானம்வரும்!

பஜபாண்ட்யகுமாரம் தத்வமஸிசாரம் ஜோதிஸ்வரூபம் ப்ரம்மபரம்!

 

அம்புவிஈதும் ஏழ்தலம்யாவும் ஒளிர்மீன்களும் கோள்களும் அரசாங்கம்!

அம்புலிசூடும் அம்பலவாணன் திருமாலுடன்அருளும் அவதாரம்!

வன்புலியேறும் அவன்வில்லேந்தும் கரம்வல்வினை மாய்க்கும் வரமருளும்!

பஜபாண்ட்யகுமாரம் தத்வமஸிசாரம் ஜோதிஸ்வரூபம் ப்ரம்மபரம்!

 

அச்சன்கோவில் அவன்அரசாங்கம் எழில்ஆரியன்காவினில் அருளம்சம்!

அச்சன்சிவன்மோஹினி அம்மைஇருவரும் ஒன்றாய்அருளும் அவதாரம்!

மெச்சும்குளத்தூரின்பாலகன்வடிவம் அன்பர்க்கருளும்மழலைவரம்!

பஜபாண்ட்யகுமாரம் தத்வமஸிசாரம் ஜோதிஸ்வரூபம் ப்ரம்மபரம்!

 

விண்ணவர்குலம்வாட்டும் வ்யாகுலம்போக்கிடும் வ்யாக்ராரூடம் சபரியுறும்!

வெண்பிறைபுனையும் யோகியும்மோஹினியும் ஒன்றாய்அருளும் அவதாரம்!

பண்ணொடுபனுவல்கள் வேட்கும்பந்தள ராஜகுமாரம் சுகமருளும்!

பஜபாண்ட்யகுமாரம் தத்வமஸிசாரம் ஜோதிஸ்வரூபம் ப்ரம்மபரம்!

 

செஞ்சரணம்புகலெனும் அடியார்மனதில்   கோவில்கொள்ளும் மணிகண்டம்!

செஞ்சடைமீதோர் அரவம்சூடும்  இறைஅரியோடருளும் சிவபாலம்!

அஞ்சிடும்அமரர்தம் அச்சம்போக்கும் மஹிஷிஸ்ம்ஹாரம் அமைதிதரும்!

பஜபாண்ட்யகுமாரம் தத்வமஸிசாரம் ஜோதிஸ்வரூபம் ப்ரம்மபரம்!

 

அந்தமும்ஆதியும் அதுவாகும் அதுவேநீயெனும் மறையந்தம்மந்த்ரம்!

அரனெனும் மின்னல்அரியெனும்மேகம் இவைதொடும்நேரம் அவதாரம்

செந்தழலெழும்நேரம் சரணம்சூழும் ஐயன்அருளும் பரமபதம்!

பஜபாண்ட்யகுமாரம் தத்வமஸிசாரம் ஜோதிஸ்வரூபம் ப்ரம்மபரம்!

 

உய்யும்வழிகாட்டும் உன்னதமார்கம் உம்பரின்உலகினில் சேர்த்துவிடும்

உத்திரநக்ஷத்ரம் பரமபவித்ரம்  ஹரிஹர்புத்ரன் அவதாரம் 

நெய்யபிஷேகம் நம்நெஞ்சைநிறைக்கும்  இதமருளும்நற்பதமருளும்

பஜபாண்ட்யகுமாரம் தத்வமஸிசாரம் ஜோதிஸ்வரூபம் ப்ரம்மபரம்!

 

சத்தியமாகும்படி பத்துமோரெட்டும் பரவசமூட்டும் முக்திதரும்!

சங்கரசாரங்கரின் சங்கமம் அருளால் சாந்தஸ்வரூபம் அவதாரம்

நித்தியமுத்தர்சிரம் இருமுடிதாங்கும் நிர்மலரூபம் சுமைஏற்கும்!

பஜபாண்ட்யகுமாரம் தத்வமஸிசாரம் ஜோதிஸ்வரூபம் ப்ரம்மபரம்!

 

திண்டிமம், பறைவாத்யம்அழுதாதீரம் அழகன்நடனம் அரங்கேறும்!

திண்ணியமேனியில் திருவாபரணம் தரிசனம்நல்கும் நிஸ்சலனம்!

வண்டினம்முரலும் பூங்காவனம்வாழும் வனதேவதைமார் வந்துதொழும்!

பஜபாண்ட்யகுமாரம் தத்வமஸிசாரம் ஜோதிஸ்வரூபம் ப்ரம்மபரம்!

 

தென்பொதிகைக்குறுமுனி தவமும் கலையும்வண்ணம் ஆங்கோர்ஜோதியெழும்!

தென்முகத்தெய்வம்மாலுடன்அருளும்தேசிதுவென்றேதன்மனம்தெளியும்!

பொன்சொரிமுத்தையனும்பரிவாரங்களும்அருளும்தலம்மூலாதாரம்!

பஜபாண்ட்யகுமாரம்தத்வமஸிசாரம்ஜோதிஸ்வரூபம் ப்ரம்மபரம்!

 

நச்சரவின்விடமும் அச்சங்கோவிலின் எல்லையில் ஏறாதிறங்கிவிடும்

நஞ்சுண்டோனும் கருடத்வஜனும்  அருள்மன்னன் நிழலே அமுதவரம்!

அச்சம்விலகும் மலைஅவனருள்பொழியும் ஸ்வாதிஷ்டானத் தலமாகும்!

பஜபாண்ட்யகுமாரம் தத்வமஸிசாரம் ஜோதிஸ்வரூபம் ப்ரம்மபரம்!

 

அம்புலிவதனம் வெம்புலிஇவரும் சித்பரம்ஆரியங்கா உறையும்

அச்சுதனும்அரனும் இணையும்நேரம் ஹரிஹரபுத்ரம் அவதாரம்

நம்பிடுமடியார் நலம்கூட்டும்க்ஷேத்ரம் மணிபூரகமாய் மலர்ந்திருக்கும்!

பஜபாண்ட்யகுமாரம் தத்வமஸிசாரம் ஜோதிஸ்வரூபம் ப்ரம்மபரம்!

 

சின்னஞ்சிறுரூபம் செவ்விதழ்மலரும் குளத்துப்புழையில் கோவிலுறும்

சிற்றம்பலமாடும் சிவமரியோடருள் சிறுபாலன் இங்கவதாரம்!

மின்னற்கொடியாய்ச் சுடர் மேவு மநாஹதசக்ரக்ஷேத்ரம் இதுவாகும்!

பஜபாண்ட்யகுமாரம் தத்வமஸிசாரம் ஜோதிஸ்வரூபம் ப்ரம்மபரம்!

 

அல்லிருள்மேனியும் வில்ஏந்தியகரமும் கிராதரூபம் காட்சிதரும்

வண்ணம்பலபூசும் பேட்டைதுள்ளல் முழவொடு பக்தர்தம் நடனம்வரும்

நல்எருமேலியிலே வாபரன்காவல் விசுத்திக்ஷேத்ரம் பொலிவுதரும்!

பஜபாண்ட்யகுமாரம்தத்வமஸிசாரம்ஜோதிஸ்வரூபம் ப்ரம்மபரம்!

 

தற்பரயோகினி சபரிபீடமும், சரங்குத்திஆலும் சன்னிதியும்

தம்நிலைமறந்தே இருமுடிசுமந்தேறும் பக்தர்வாழ்வை மாற்றிவிடும்

பொற்றளிஒளிரும்  தலம்ஆக்ஞாசக்ரம் ப்ரூமத்யவாசம் நிறைவருளும்!

பஜபாண்ட்யகுமாரம் தத்வமஸிசாரம் ஜோதிஸ்வரூபம் ப்ரம்மபரம்!

 

தங்கத்தாமரைகள் ஆயிரம்மலரும் பொன்னம்பலமே ஸஹஸ்ராகாரம்!

தைம்முதல்நாளில் வான்மீதெழும் மகரஜோதியில் ஐயன்காட்சிதரும்

கங்காதரனும் கனகாம்பரனும் மகிழ்பாலகனே பாதம்சரணம்!

பஜபாண்ட்யகுமாரம் தத்வமஸிசாரம் ஜோதிஸ்வரூபம் ப்ரம்மபரம்!

 

 

 

வாழ்க்கை !  நிழல் !!  – கவிஞர் பொன்விலங்கு பூ. சுப்ரமணியன்

Image result for வாழ்க்கை

 

மனிதர்களே ….

பல வண்ணங்கள்

வேண்டுமெனில்

பட்டாம்பூச்சியிடம்

கேட்டுப் பெறுங்கள்

பச்சோந்தியிடம்

கேட்காதீர்கள்!

 

மனிதர்கள் அழுவதே

வாழ்க்கை இல்லை

மனிதன் அழாமல்

இருந்தாலும்

வாழ்க்கை இல்லை !

 

நிழலும் அரசியல்வாதிகளும் !

 

 

நிழல் ….

 

காலையில் நம் முன்னே

சென்று வணங்குகிறது !

 

தேர்தல் சமயத்தில் 

நம்மையெல்லாம்

அரசியல்வாதிகள்

வணங்குவதைப் போல.

 

நிழல்…

பிற்பகலில் பின்னே

நம்மை தொடர்கிறது !

 

தேர்தல் நாளன்று

தங்கள்  ஓட்டுக்காக.

நம் பின்னே வரும்

அரசியல்வாதி போல.

 

நிழல் …

இரவில் அது

இருக்கும் இடம்

தெரியாமல் மறைகிறது !

 

வெற்றி அடைந்து

பதவி சுகம் கண்டபின் 

தொகுதிப் பக்கமே

வராத அரசியல்வாதி போல. 

                                                 

 

                                     

சிறுகதை எழுத்தாளர்கள் சிறுகுறிப்பு – இரண்டாம் பத்து – என் செல்வராஜ்

Image may contain: 1 person

சிறுகதை எழுத்தாளர்களில் சிறந்த ஐம்பது எழுத்தாளர்களின் குறிப்புகளை திரட்டி இதில் தொகுத்திருக்கிறேன். அந்த எழுத்தாளர்களின் சிறந்த சிறுகதைகளையும் குறிப்பிட்டு இருக்கிறேன். இந்த தொகுப்புக்காகத் தகவல்களை திரட்டும்போதுதான் இன்னும் நிறைய எழுத்தாளர்களின் தகவல்கள் திரட்ட வேண்டியிருக்கிறது என்பது புரிகிறது. இணையத்தில் எல்லாம் இருக்கிறது என்பர். அப்படியெல்லாம் இல்லை என்பது நன்றாக புரிகிறது. பல எழுத்தாளர்களைப்பற்றிய தகவல் இணையத்தில் இல்லாமல் இருப்பதை பெரும் குறையாகவே நினைக்கிறேன். இந்த கட்டுரை அந்த குறையை சிறிதளவாவது குறைக்கும் என்பது என் எண்ணம். இன்னும் இதில் இல்லாத சிறந்த சிறுகதை எழுத்தாளர்களை வேறொரு கட்டுரையில் காணலாம். –

-என். செல்வராஜ்

 

Bs ramaiah.jpg

பி எஸ் ராமையா

வத்தலகுண்டு கிராமத்தில் பிறந்த ராமையா எழுதிய ” மலரும் மணமும் “என்ற சிறுகதைக்கு ஆனந்த விகடன் பரிசு பெற்றார். அவர் மணிக்கொடி இதழ் பற்றி எழுதிய மணிக்கொடி காலம் என்ற கட்டுரை நூலுக்காக 1982 ல் சாகிதய அக்காடமி விருது பெற்றார். அவர் மணிக்கொடி இதழை சிறுகதைகளுக்கென்றே மாதமிருமுறை இதழாக சில காலம் நடத்தினார். இவரது சிறுகதை தொகுதிகள் மலரும் மணமும், பாக்யத்தின் பாக்யம், ஞானோதயம், புதுமைக்கோயில், பூவும் பொன்னும் ஆகியவற்றை அல்லயன்ஸ் பதிப்பகம் வெளியிட்டுள்ளது.இவரது தேரோட்டியின் மகன் என்ற நாடகம் புகழ் பெற்றது. இவரின் சிறந்த சிறுகதைகள் நட்சத்திரக் குழந்தைகள், கார்னிவல், மலரும் மணமும்.

Image result for கு அழகிரிசாமி

கு அழகிரிசாமி

இடைச்செவல் கிராமத்தில் பிறந்தவர். எழுத்தாளர் கி ராஜநாரயணனின் இளமைக்கால நண்பர். இலக்கிய உலகில் இவரது சிறுகதைகள்

புகழ் பெற்றவை. 1970 ல் அன்பளிப்பு என்னும் சிறுகதை தொகுப்புக்காக சாகித்ய அக்காடமி விருது பெற்றவர். மலேசிய தமிழ் நேசன் பத்திரிக்கையில் பணியாற்றியவர். நவசக்தி நாளிதழில் பணியாற்றியபோது அவர் கவிச்சக்கரவர்த்தி என்ற நாடகத்தை எழுதினார். அது அவருக்குப் பெயரும் புகழும் பெற்றுத் தந்தது. இவரது முழு சிறுகதைத் தொகுப்பை கு அழகிரிசாமியின் சிறுகதைகள் என்ற பெயரில் காலச்சுவடு வெளியிட்டுள்ளது. இவரது ” ராஜா வந்திருக்கிறார்” என்ற கதை இந்திய மொழிகளிலும் ரஷ்ய மொழியிலும் மொழி பெயர்க்கப்பட்ட சிறந்த கதை. இவரின் சிறந்த கதைகள் அன்பளிப்பு, ராஜா வந்திருக்கிறார், காற்று, சுயரூபம், திரிவேணி, இருவர் கண்ட ஒரே கனவு.

Related image

ஜெயகாந்தன்

மக்கள் கவனத்தை பெரிதாகக் கவராத அடித்தட்டு மக்களின் வாழ்க்கையை, அவர்களுடைய உணர்ச்சிகளை, வாழ்வின் மேன்மை, அவலம்

அனைத்தையும் தன் கதைகளின் பேசு பொருளாக்கியவர். சிறந்த நாவலாசிரியர் மற்றும் சிறுகதை எழுத்தாளர். சில நேரங்களில் சில மனிதர்கள் நாவலுக்காக சாகித்ய அக்காடமி விருது பெற்றவர். 2005 ஆம் ஆண்டில் ஞானபீட பரிசு பெற்றவர். ஒரு வீடு ஒரு மனிதன் ஒரு உலகம் இவரது புகழ் பெற்ற நாவலாகும்.இவரது சிறுகதைகளின் முழுத் தொகுப்பை கவிதா பதிப்பகம் வெளியிட்டுள்ளது. ஆனந்த விகடனில் தொடர்ந்து பல முத்திரைக் கதைகளை எழுதினார். அவை முத்திரைக் கதைகள் என்ற பெயரில் கவிதா பதிப்பகம் வெளியிட்டுள்ளது. இவரின்சிறந்த சிறுகதைகள் அக்னிப்பிரவேசம், யுகசந்தி,நான் இருக்கிறேன், குருபீடம், மௌனம் ஒரு பாஷை, நான் என்ன செய்யட்டும் சொல்லுங்கோ, ட்ரெடில், பிணக்கு.

Image result for ஆ மாதவன்

ஆ மாதவன்

திருவனந்தபுரத்தில் வசிக்கும் தமிழ் எழுத்தாளர் இவர். திராவிட எழுத்துக்களால் ஈர்க்கப்பட்டு எழுத்தாளராக ஆனார். திருவனந்தபுரத்தில் உள்ள சாலைத்தெருவை பிண்ணனியாகக் கொண்டு பல சிறுகதைகளை எழுதியுள்ளார். இலக்கியச்சுவடுகள் என்ற நூலுக்காக 2015 ஆம் ஆண்டு சாகித்ய அக்காடமி விருது பெற்றார். இவருடைய கிருஷ்ணப் பருந்து நாவல் சிறந்த நாவல் ஆகும். இவரது கடைத்தெருக் கதைகள் என்ற சிறுகதைத் தொகுதி தமிழிலக்கிய உலகில் பெரும் கவனத்தை ஈர்த்தது. ஆ மாதவன் கதைகள் என்ற முழு தொகுப்பை நற்றிணை பதிப்பகம் வெளியிட்டுள்ளது. இவரின்சிறந்த சிறுகதைகள் நாயனம், பறிமுதல், தண்ணீர்.

Image result for ச தமிழ்ச்செல்வன்

ச தமிழ்ச்செல்வன்

அறிவொளி இயக்கத்தில் பங்கேற்று பல கிராமங்களுக்குச் சென்று கல்விப் பணியாற்றியவர். தமிழ்நாடு முற்போக்கு எழுத்தாளர் சங்க நிர்வாகி.

குறைவாகவே சிறுகதைகளை எழுதி உள்ளார். இவரின் சிறுகதைகளின் முழு தொகுப்பு “ச தமிழ்ச்செல்வன் சிறுகதைகள் ” என்ற பெயரில் பாரதி புத்தகாலயம் வெளியிட்டுள்ளது. சிறுகதைக் களத்தை தேர்ந்துகொண்டு யதார்த்த தளத்தில் இயல்பான மொழி, பிரச்சாரமற்ற தன்மை சிறுகதைக்குரிய சாதுர்யம்கொண்டு இயங்கியவர். இப்போது கதைகள் எழுதுவது இல்லை. எழுத்தாளர் கோணங்கி இவரின் சகோதரர்.வெயிலோடு போய், வாளின் தனிமை ஆகிய கதைகள் சிறப்பானவை. தீப்பெட்டி தொழிற்சாலயில் கருகும் பிஞ்சுகளும் , அத்தொழிற்சாலைகளில் பணிபுரியும் கரிசல் மக்களும் இவரது கதைகளில் ஆழமாக வெளிப்படுகின்றனர். இவரின் சிறந்த சிறுகதைகள் வெயிலோடு போய், வாளின் தனிமை,பாவணைகள்.

Image result for பிரபஞ்சன்

பிரபஞ்சன்

புதுச்சேரி தந்த புகழ் பெற்ற படைப்பாளர். இவரது இயற்பெயர் சாரங்கபாணி வைத்தியலிங்கம். பிரபஞ்சன் என்ற புனை பெயரில் எழுதி வருகிறார். சிறந்த சிறுகதை எழுத்தாளர். வானம் வசப்படும் நாவலுக்காக 1995ல் சாகித்ய அக்காடமி விருது பெற்றவர். மானுடம் வெல்லும் நாவலும் சிறந்த நாவலாகும். குமுதம், ஆனந்த விகடன் மற்றும் குங்குமம் ஆகிய வாரப் பத்திரிக்கைகளில் பணிபுரிந்தார். இவரது முதல் சிறுகதை “என்ன உலகமடா?” பரணி என்ற பத்திரிக்கையில் 1961ல் வெளியானது. இவர் சுயமரியாதை இயக்கத்தில் ஈடுபாடு கொண்டிருந்தார்.இவரது சிறுகதைத் தொகுப்பான “நேற்று மனிதர்கள்” பல கல்லூரிகளில் பாடப்புத்தகமாக்கப்பட்டுள்ளது. இவரது மகாநதி புதினம் கோவை கஸ்தூரி ரங்கம்மாள் நினைவுப் பரிசு பெற்றுள்ளது. இவரது சந்தியா புதினம் 1997- ஆம் ஆண்டு ஆதித்தனார் நினைவுப் பரிசு பெற்றுள்ளது. இவரது பிருமம் சிறுகதை இலக்கியச் சிந்தனையால் ஆண்டின் சிறந்த கதையாகத் தெரிவு செய்யப்பட்டுள்ளது. இவரது சிறுகதைகளின் முழுத் தொகுப்பை கவிதா பதிப்பகம் பிரபஞ்சன் சிறுகதைகள் என்ற பெயரில் இரண்டு தொகுதியாக வெளியிட்டுள்ளது. இவரின் சிறந்த சிறுகதைகள் அப்பாவின் வேஷ்டி, மீன், மரி என்கிற ஆட்டுக்குட்டி, மனசு.

Image result for கி ராஜநாராயணன்

கி ராஜநாராயணன்

கோவில்பட்டிக்கு அருகில் உள்ள இடைச்செவல் கிராமத்தில் பிறந்தவர். தமிழ் எழுத்துக்கு வட்டார இலக்கியம் என்ற புது வகைமையை உருவாக்கிக் கொடுத்ததில் முன்னோடியாக இருந்தவர் கி ரா. கோபல்லபுரத்து மக்கள் என்ற நாவலுக்காக 1991ல் சாகிய அக்காடமி விருது பெற்றவர்,. இவரது கோபல்ல கிராமம் சிறந்த நாவல். கரிசல் வட்டார எழுத்தாளர்களின் கதைகளை கரிசல் கதைகள் என்ற தொகுப்பாக தொகுத்திருக்கிறார். கரிசல் வட்டார வழக்கு அகராதியை தொகுத்துள்ளார். இவரது சிறுகதைகளை கி ராஜநாராயணன் கதைகள் என்ற தொகுப்பாக அன்னம் பதிப்பகம் வெளியிட்டுள்ளது. வானம் பார்த்த பூமியான கரிசல் மக்களின் வாழ்க்கை, ஆசாபாசங்களை நயமான கிண்டலுடன் எடுத்துரைப்பவை இவரது கதைகள். இவரின் சிறந்த சிறுகதைகள் கன்னிமை, கதவு, நாற்காலி, கோமதி

Image result for கந்தர்வன்கிக்

கந்தர்வன்

தமிழ்ச்சூழலில் முற்போக்கு இடதுசாரி எழுத்தாளராக நன்கு அறிமுகமானவர் நாகலிங்கம் என்ற இயற்பெயர் கொண்ட கந்தர்வன். தமிழ்ச் சிறுகதை வரலாற்றில் கந்தர்வனுக்கும் முக்கிய இடம் உண்டு. முற்போக்கு கருத்து நிலை சார்ந்து வெளிப்படும் எழுத்து நடைக்கு, கதை சொல்லும் மரபுக்கு செழுமையான வளம் சேர்த்தவர் கந்தர்வன்.வறண்ட பிரதேசமான பிற படைப்பாளிகளால் ஒதுக்கப்படும் தொழிற்சங்க வாழ்வின் வாஞ்சை மிகு மனிதர்களை தமிழ்க்கதைப் பரப்புக்குக் கைபிடித்து அழைத்துவந்த படைப்பு முன்னோடி அவர். கந்தர்வன் கதைகள் முழுத் தொகுப்பை வம்சி பதிப்பகம் வெளியிட்டுள்ளது.

இவரின் சிறந்த சிறுகதைகள் சாசனம், தராசு, மங்கலநாதர், காளிப்புள்ள.

Image result for சா கந்தசாமி

சா கந்தசாமி

மயிலாடுதுறையில் பிறந்த இவர் சாயாவனம் என்ற நாவல் மூலம் புகழ் பெற்றவர். இந்நாவலை தேசிய புத்தக அறக்கட்டளை நவீன இந்திய

இலக்கியங்களுள் ஒன்றாக அறிவித்தது. 1998 ஆம் ஆண்டு விசாரணைக் கமிஷன் என்ற நாவலுக்காக சாகித்ய அக்காடமி விருது பெற்றார். இவரின் சிறுகதைகளின் முழு தொகுப்பை கவிதா பதிப்பகம் சா கந்தசாமி கதைகள் என்ற பெயரில் இரண்டு தொகுதிகளாக வெளியிட்டுள்ளது. கந்தசாமியின் படைப்புலகம் அனுபங்களின், வாழ்க்கையின் அடிநாதமாக தொழிற்படும் மனித உணர்வுகளின் சிக்கல்களின் முரண்பாடுகளின் களமாக உள்ளது. இவரின் சிறந்த சிறுகதைகள் தக்கையின் மீது நான்கு கண்கள், உயிர்கள், ஹிரண்ய வதம்

Image result for இராஜேந்திர சோழன் எழுத்தாளர்

இராஜேந்திர சோழன்

மயிலத்தில் வசித்து வரும் இவர் அஷ்வகோஷ் என்ற பெயரில் செம்மலரில் பல கதைகளை எழுதி இருக்கிறார். படைப்பு வாசகனைச் சிந்திக்க

தூண்டுவதாய் இருப்பதுடன், அவனுடைய சமுதாயப் பார்வையில் மேலும் வெளிச்சம் பாய்ச்சுவதாகவும் இருக்கவேண்டும் என்ற சமூக அக்கறையுடன் செயல்பட்டு வருபவர். இவரது சிறுகதைகளின் முழு தொகுப்பை இராஜேந்திர சோழன் கதைகள் என்ற பெயரில் தமிழினி வெளியிட்டுள்ளது. இவரின் சிறந்த சிறுகதைகள் புற்றில் உறையும் பாம்புகள், எதிர்பார்ப்புகள்,கோணல் வடிவங்கள்

இன்னும் வரும்

என்வினவி அல்லது புலனம் என்றால் என்ன ?

Image result for தூய தமிழ் சொற்கள்

சமீபத்தில் whatsapp க்கு தமிழில் என் வினவி என்று தமிழில் ஒரு கட்டுரையில் கூறப்பட்டது. 

அதைப்பற்றித் தேடும்போது  மலேசியாவில் நடந்த மாநாட்டில் அன்றாடம் உபயோகிக்கும் கணிணி சம்பந்தப்பட்ட கலைச் சொற்களுக்கு  இணையான தமிழ்ச் சொற்களைக்  குறிப்பிட்டுள்ளனர்.  

அந்த மாநாட்டில்  அறிவிக்கப்பட்ட தொழில்நுட்பப் பெயர்களுக்குத் தமிழாக்கம் : 

1. WhatsApp – புலனம்

2. YouTube – வலையொளி

3. Instagram – படவரி

4. WeChat – அளாவி

5.Messenger – பற்றியம்

6.Twitter – கீச்சகம்

7.Telegram – தொலைவரி

8. Skype – காயலை

9.Bluetooth – ஊடலை

10.WiFi – அருகலை

11.Hotspot – பகிரலை

12.Broadband – ஆலலை

13.Online – இயங்கலை

14.Offline – முடக்கலை

15.Thumb Drive – விரலி

16.Hard Disk – வன்தட்டு

17.GPS – தடங்காட்டி

18.CCTV- மறைகாணி

19.OCR – எழுத்துணரி

20 LED – ஒளிர்விமுனை

21.3D – முத்திரட்சி

22.2D – இருதிரட்சி

23.Projector – ஒளிவீச்சி

24.Printer – அச்சுப்பொறி

25.Scanner – வருடி

26.Smart Phone – திறன்பேசி

27.Simcard – செறிவட்டை

28.Charger – மின்னூக்கி

29.Digital – எண்மின்

30.Cyber – மின்வெளி

31.Router – திசைவி

32.Selfie – தம் படம் – சுயஉரு

33 Thumbnail – சிறுபடம்

34.Meme – போன்மி

35.Print Screen – திரைப் பிடிப்பு

36.Inket – மைவீச்சு

37.Laser – சீரொளி

அந்த மாநாட்டைப் பற்றித் தேடியபோது கிடைத்த தகவல்கள்: 

 

1964ம் ஆண்டு புதுடில்லியில் 26வது கீழைத்தேயவியல் மாநாடு நடைபெற்றது.

1968ல் இரண்டாவது தமிழாராய்ச்சி மாநாடு சென்னையில் நடைபெற்றது. அறிஞர் அண்ணாதுரை முதலமைச்சராகக் கொண்ட தமிழ்நாடு இந்த மாநாட்டை சிறப்பாக நடாத்தியது.

மூன்றாவது மகாநாடு 1970ல் பிரெஞ்சு தலைநகரான பாரிசில் நடைபெற்றது.

நான்காவது மாநாடு இலங்கையில் 1974 ல் நடத்தப்பட்டது.

1981ம் ஆண்டு தமிழக முதலமைச்சர் எம்.ஜி.ஆர்.தலைமையில் தமிழ்நாட்டில் மதுரையில் ஐந்தாவது மகாநாடு நடத்தப்பட்டது.

ஆறாவது மகாநாடு மலேசியாவில் 1987ஆம் ஆண்டு நடைபெற்றது.

ஏழாவது மகாநாடு 1989ம் ஆண்டு மொரிசியஸ் தீவில் நடைபெற்றது.

எட்டாவது மகாநாடு 1995 இல் தமிழகத்தில் முதலமைச்சர் செல்வி ஜெயலலிதா தலைமையில் தஞ்சாவூரில் நடைபெற்றது.

2015ல் மலேசியாவில் ஒன்பதாவது மகாநாடு நடைபெற்றது.

தற்போது அமெரிக்காவில் சிகாகோவில் 10 வது மாநாடு 2019 ஜூலை 3-7 தேதிகளில் நடைபெற இருக்கிறது. 

 

இதுதான் உலகம்– கோவை சங்கர்

Image result for today's world

உலக மென்னடா பாழு முலகம்
உறவு என்னடா பாசமில் லுறவு
உயிர்க ளென்னடா நஞ்செனு முயிர்கள்
நட்பு என்னடா புறத்தின் நட்பு?

பணமெனும் பேயை இறைவன் படைத்தான்
பசிக்கும் மாதை கூடவே வைத்தான்
‘பணமா நெறியா’ போட்டி போட
பணமே வெல்லும் பாழும் உலகம்!

உற்றார் என்னும் எண்ணமும் இல்லை
உரியவர் என்னும் பந்தமும் இல்லை
துன்புறு முற்றார்க் குதவியும் செய்யா
தன்னலங் கொண்ட பாசமில் லுறவு!

இருப்பதை வைத்து மகிழ்வான் இல்லை
இணைந்து சென்று வாழ்வான் இல்லை
திறனைப் பார்த்து வஞ்சம் கொள்ளும்
உயிர்க ளென்னடா நஞ்செனு முயிர்கள்!

செல்வம் கண்டால் வாயைத் திறப்பான்
செல்வம் இலையேல் தூரவே நிற்பான்
நட்பின் உயிராம் உள்ளன் பில்லா
நட்பு என்னடா புறத்தின் நட்பு!

 

கடைசிப்பக்கம் – டாக்டர் ஜெ.பாஸ்கரன்.

அசோக் நகர் கோடைப் புத்தக விழாவும்நானும்!

வருடா வருடம் அஸ்லி நகரில் உள்ள அரசு நூல்நிலைய வளாகத்தில் ஒரு புத்தகக் கண்காட்சி நடைபெறும். இவ்வருடமும் நடந்துகொண்டிருக்கிறது – ஒரு ஞாயிற்றுக்கிழமை மதியம், சுட்டெரிக்கும் வெயிலில் நண்பர் ஆர் கேயுடன் சென்றேன்.

காம்பவுண்ட் சுவருக்கும், மத்திய நூலகக் கட்டிடத்துக்கும் இடையே சுமாராக 15அடி அகலம், 50-60 அடி நீளத்திற்கு ஒரு பந்தல் – ஃப்ரில் வைத்த வெள்ளைத் துணியில் சீலிங், “ப” வடிவில் ஒற்றை அரங்கம், மூன்று பக்கங்களிலும் புத்தகங்கள், அரங்கின் நடுவில் நீளமான பெஞ்சில், அட்டைப் பெட்டிகளில் புத்தம்புதிய புத்தகங்கள் (50% தள்ளுபடி விலையில்)! சந்தியா பதிப்பகம் மற்றும் ஓரிரண்டு பதிப்பகங்கள் மட்டுமே பங்கு கொண்டிருந்த புத்தகக் திருவிழா – ஆனாலும், நல்ல புத்தகங்கள் இருந்தன.

சிறுகதைத் தொகுப்புகள், நாவல்கள், கட்டுரை நூல்கள், சிறுவர்களுக்கான அறிவியல் மற்றும் கதைகள், கார்ட்டூன்கள், மு.வ. நூல்கள், கல்கியின் பொ.செ.. வண்ணதாசன், கலாப்பிரியா, லா ச ரா, க நா சு என நூல்கள் – வாசலில் ஒருவர் பில் மெசினுடன்; அருகில் ஒரு ஃப்ள்க்ஸ் போர்டு, சில புத்தகப் படங்களுடன்…

ஜம்பரும் வேஷ்டியும் (சிறுகதைத் தொகுப்பு – ந.பிச்சமூர்த்தி), ஹாஸ்ய வியாசங்கள் (பம்மல் சம்பந்த முதலியார்), கல் சிரிக்கிறது (நாவல் – லா ச ரா), இலக்கியச் சாதனையாளர்கள் (க நா சு) – இவை நான்கும் (சந்தியா பதிப்பகம்) நான் வாங்கிய புத்தகங்கள். வெயில், டி.வியில் கிரிக்கெட் போன்ற காரணங்களால், இரண்டு, மூன்று பேர்கள் மட்டுமே புத்தகம் ‘பார்த்துக்’ கொண்டிருந்தனர்.

20% டிஸ்கவுண்டில் புத்தகங்கள் வாங்கிக்கொண்டு, வெளியே ஒரு செவ்விளநீர் (கிட்டத்தட்ட தள்ளுபடி செய்த ஒரு புத்தக விலை!) சீவி, காகித உறிஞ்சு குழல் உதவியுடன் நாக்கையும், தொண்டையையும் சிறிது நனைத்துக்கொண்டு, வீடு வந்துசேர்ந்தேன்!

போன வாரம் இதேபோல் டிஸ்கவரி புக் பேலஸில் ஒரு தள்ளுபடி விற்பனை – க்ளியரன்ஸ் சேல் என்றார்கள். போயிருந்தேன். அவ்வளவு புத்தகங்கள், எழுத்தாளர்கள், பதிப்பாளர்கள் – வாங்குபவர்களும் இருந்தார்கள். மகிழ்ச்சி. ஆனாலும் புத்தகம் குறித்து, இன்னும் ஏதோ ஒன்று குறைகிறது……… ஒரு வேளை வாசிப்போ?

வாங்கிய புத்தகங்களை வாசித்த வரையில் …….

“1937 ல் முதற் பதிப்பு – சென்னை ‘பியர்லெஸ்’ அச்சுக்கூடத்தில் அச்சிடப்பட்டது – ஹாஸ்ய வியாசங்கள் – தமிழில் ராவ் பஹதூர் ப.சம்பந்த முதலியார், பே.,பி.எ.ல்., அவர்களால் இயற்றப்பட்டது”. என்ற குறிப்புடன் தொடங்குகிறது இந்தப் புத்தகம். சென்னை விநோதங்களில், நீர் இல்லாத நீச்சல் குளம் உள்ள கட்டிட விவரணை, பழம் தவிர மற்ற எல்லாம் விற்கும் கார்ப்பொரெஷன் பழக்கடை, ‘பீஸ் – கூட்ஸ் – மார்கெட்’என்ற பெயருடைய ஜவுளிக் கடை கட்டிடத்தில் உள்ள சவுக்கு மரக் கடைகள் என நகைச்சுவயுடன் விவரிக்கிறார். “வயது” என்ற வியாசத்தில், 90 வயதுக்கும் மேலாக இருக்கும் ஒரு ஆரோக்கியமான கிழவர் ” சாஸ்திரங்களில் ஒருவனுடைய பொருள், ஒருவனுடைய வயது, ஒருவனுடைய ஆசாரியார் பெயர், இன்னும் இரண்டொரு விஷயங்களை வெளியில் கூறக்கூடாது ” என்று கூறி, வயதைச் சொல்ல மறுத்துவிட்டாராம்.
இப்படி சுவாரஸ்யமான 12 வியாசங்களைக் கொண்ட சின்ன  ஆனால் சிறப்பான நூல்!

‘ஜம்பரும் வேஷ்டியும்’ – சிறு கதையில் இரண்டு நண்பர்கள், தன் மனைவிகளின் சந்தேகம், சண்டைகளால் எப்படி வீடு மாற்ற முடிவு செய்கிறார்கள் என்பதை தன் பாணியில் சொல்கிறார் ந.பிச்சமூர்த்தி. 8 சிறுகதைகள் கொண்ட சிறிய தொகுப்பு.

க நா சு அவர்களின் இலக்கியச் சாதனையாளர்கள், நான் வாசித்த மட்டில், மிகச் சிறந்த நூலாக, சுவாரஸ்யமான வாசிப்பானுபவமாக இருக்கிறது. நான்கைந்து பக்கங்களில், தமிழின் மிகச் சிறந்த இலக்கிய ஆளுமைகளின் குணாதிசயங்கள், படைப்புகள், விருப்பு வெறுப்புகள் எனப் பிழிந்துகொடுக்கிறார். ராஜாஜி தொடங்கி விசுவநாத சத்திய நாராயணா வரை 41 ஆளுமைகள் பற்றி எழுதியிருக்கிறார். (நான் 11 வரை வாசித்திருக்கிறேன்!). புதிதாக வாசிக்கவும், எழுதவும் முனைவோருக்கு, அனுகூலமான, பயன்மிகு படைப்பு, ‘இலக்கிய சாதனையாளர்கள்’ என்கிறார் சந்தியா நடராஜன் – உண்மைதான்!

(‘கல் சிரிக்கிறது’ – இன்னும் வாசிக்கவில்லை!)