இன்னும் சில படைப்பாளிகள் – பெருமாள் முருகன் – எஸ் கே என்

Image result for perumal murugan

சில வருடங்களுக்கு முன்னால் ‘மாதொருபாகன்’ என்னும் நாவல் பற்றிய சர்ச்சை அரசியல், நீதிமன்றம் என்று பலவித குழப்பங்ககளுக்குப் பிறகு ஓரளவிற்கு அடங்கியது. மனிதர்களைப் பற்றி எழுதாமல் ஒரு ஆட்டுக் குட்டியைப் பற்றி எழுதுகிறேன் என்று இவர் எழுதிய “பூனாச்சி- ஓரு வெள்ளாட்டின் கதை” மிகவும் பிரபலமானது.

இவரது பல நாவல்கள் கொங்குநாட்டு மணத்துடன் , அந்த மண்ணின் மற்றும் மக்களின் பிரச்சினைகளை எதார்த்தமாக எடுத்துரைக்கும். உதாரணம் ‘கங்கணம்’ என்னும் புதினம்.
———–

இவரது ஒரம்பரை என்னும் கதை

“வா கண்ணு”
சீராயியின் முகத்தில். மகிழ்ச்சி கொப்பளித்தது. வெற்றிலைச் சாற்றை நீட்டித் துப்பிவிட்டுச் சிரித்தாள். அவன் ‘டிவிஎஸ் 50’யை வாதனாராம் மர நிழலில் நிறுத்திவிட்டு வந்தான். என்று தொடங்குகிறது.

அவன் என்று சொல்லப்பட்ட சிங்கான் கொட்டகையை அண்ணாந்து செலவு எவ்வளவு ஆகியிருக்கும் என்று கணிக்கிறான். ‘வராதவன்’ வந்திருக்கின்றான் என்று சீராயி தன் மருமகளை அழைக்கிறாள். வீட்டில் எல்லோரும் நலமா என்று விசாரிக்கிறாள் சீராயி.
மகனுக்கு உடல் நலம் இன்றி ஆஸ்பத்திரியில் சேர்த்து அதிகமாகச் செலவானது பற்றிச் சொல்கிறான் சிங்கான். பார்க்க வரவேண்டும் என எண்ணம் இருந்தாலும் ஒழியவில்லை என்கிறாள் சீராயி. (மருமகள் வந்தும் நேரம் கிட்டுவதில்லை என்று ஒரு இடைச் செருகல்)

“எங்கீங்க அத்தெ.. ஆரோ ஒரம்பர வந்திருக்குன்னீங்க?”

என்று கேட்டபடியே மருமகள் ரோசா சாணிக்கையோடு வருகிறாள்.
சிங்கான் ரோசாவை குசலம் விசாரிக்கிறான், வளையல் புதுசு போல என்றும் கேட்கிறான். “சித்தப்பன் புள்ளைக்கு நீங்கதான் செஞ்சுபோடறீங்களா?” என்று கேலி பேசுகிறாள் ரோசா.

சிங்கானுக்கு ‘ஒப்பிட்டு’ என்கிற பதார்த்தம் கொண்டுவந்து கொடுக்கிறாள் ரோசா. இரண்டு போதும் என்று சொல்லும் சிங்கானை உரிமையோடு உபசரிக்கிறாள் சீராயி.

“எடுத்துக்க கண்ணு… எங்கூட்டுக்கு ஆடிக்கு ஒருநா அம்மாவசைக்கு ஒருநா வர.. நல்லது பொல்லாதது எதும் செஞ்சாலும் ஆவும்…”
பேச்சு சீராயியின் மகன் பற்றித் திரும்புகிறது. ஒழுங்காக லாரி வேலைக்குப் போகிறானா என்று விசாரிக்கிறான் சிங்கான். போகிறான் ஒரு கிறுக்கு வந்தா படுத்துக்குவான் என்கிறாள் சீராயி.

சிங்கான் சிகரெட் பத்தவைக்க, அந்தக் கருமாந்திரத்தை எதுக்கு குடிக்கிரே என்று உரிமையோடு கடிந்து கொள்கிறாள் . வண்டி வாங்கினப்புறம் இந்தப் பழக்கம் வந்துவிட்டது என்று சிங்கான் பதில் சொல்கிறான். (வண்டி என்று சொல்லப்படுவது உழவுக்குப் பயன்படும் பவர் டில்லரோ டிராக்ட்டரோ என்று புரிந்துகொள்கிறோம்.)

உழவிற்கு ஓட்டியதற்கு வாடகை வாங்கத்தான் சிங்கான் வந்திருக்கிறான். பதினைந்து நாட்களாக கொண்டுவந்து கொடுக்கவேண்டும் என்று நினைத்திருந்தாலும் பணம் சேராமல் போய்விட்டதாம். யாரிடமோ கேட்டிருப்பதாகச் சொல்லி வெளியே போகிறாள் சீராயி.
பணம் வருகிறது. எண்ணிக்கொண்டே எவ்வளவு ஆயிற்று என்று கேட்கிறாள் சீராயி. ஐந்து மணிநேரம் முன்னூற்றி எழுபத்தி ஐந்து ரூபாய் என்கிறான் சிங்கான்.

அப்போதுதான் பிரச்சினை உருவாகிறது.

ஐந்து மணிநேரம் என்றால் வேறு யாருடைய கணக்காக இருக்கும். தங்களுக்கு எப்போதும் நாலு மணி நேரம்தான் தான் ஆகும் என்கிறாள் சீராயி.
அதெப்படி ஒட்டிய டிரைவர் நோட்டுல எழதி பதிவு செய்திருக்கிறானே என்கிறான் சிங்கான். எப்பவும் மூன்றே முக்கால் அவர் தான் ஆகும் என்று சீராயி சொல்ல, எழுதியதுதான் கணக்கு என்று சிங்கான் சொல்ல, அதெப்படி ஒன்னேகால் மணி ‘எச்சா’ ஆவும் என்று சீராயி வாதம் செய்ய..

முன்னூற்று எழுபத்தி ஐந்து கொடுக்கத்தான் வேண்டும் என்று சிங்கான் கண்டிப்பாகச் சொல்கிறான். நாலு மணிநேரம்தான் டிரைவர் சொன்னான் என்கிறாள் ரோசா. அறுபது ரூபாய்க்கு ஓட்ட சிலர் தயாராக இருப்பதாகவும் எழுபத்தி ஐந்து ரூபாய் வாங்குவதோடு நேரக்கணக்கு வேறே கூடுதலாகச் சொல்கிறாயே என்று சீராயி கேட்கிறாள்.

“ஒரு மணி நேரம் எச்சா சொல்லிப் பணம் வாங்கிட்டுப் போயித்தான் கோட்ட கட்டுற நான்”

“உங்க வண்டவாளம் எங்களுக்குத் தெரியாததான் கிடக்குதா? நாலு மூட்டை கொட்டமுத்து கொண்டோயிட்டுப் போய் பக்கத்தல இருந்தவனது ஒன்னையும் இழுத்துப்போட்டு அஞ்சுன்னு சொல்லி அடி வாங்கிக்கிட்டு வந்ததப்பதான் எழூருஞ் சிரிச்சுதே..” என்றாள்.

“போதும் போதும். உம் பையன் மணக்கிறானா.. தண்ணியைப் போட்டுகிட்டு என்னென்ன கூத்தடிக்கிறான்னு என் வாயல சொல்லோணுமா கருமத்த..

அதான் ஊரே சொல்லுதே.. மொதொ பணத்தை எடு..”

“போனப்போகுது குடுத்துடு அத்த. எடுபட்ட நாயி ஏமாத்தி சம்பாரிக்கங்காட்டியும்தான் இழப்பு நோவுக்கு கொண்டோயிக் கொட்டறான்…”

“நா நாலு மணி நேரத்துக்குத் தாண்டி குடுப்பன்..”

“அஞ்சு மணி நேரத்துக்குன்னா குடு. இல்லீன்னாப் பணமே வேண்டாம். வாங்குற வழியில வாங்கிக்கிறேன்”

ஐந்து மணி நேரப் பணத்தையும் கட்டிலில் வீச சிங்கான் எடுத்து டிராயரில் திணித்துக் கொள்கிறான்.

அவன் வண்டியை ஸ்டார்ட் செய்தான். மண்ணள்ளித்தூற்றி நெஞ்சில் அடித்துக்கொண்டாள்.

“அவனே கேக்கட்டும்..”

“ஆரக் கேக்கறான்னு பாப்பம்.”

“அடப்போடா நாயே”

என்று முடிகிறது கதை.

ஒரு சிறுதொகைத் தகராற்றில் உறவுமுறை என்னபாடு படுகிறது என்பதுதான் கதை. கரிசனம் கோபமாகி, சாபமாக மாறுகின்ற ரசவாதம் தெளிவாகப் படம் பிடிக்கப்பட்டுள்ளது.

இவரது படைப்புகள் பல மொழிகளிலும் மொழிபெயர்க்கப்பட்டு வெளிவந்துள்ளன.

இவர் சிறுகதைகளின் முழுத்தொகுப்பு 2016 காலச்சுவடு வெளியிட்டிருந்தது. ஒட்டு மொத்தமாகப் படிக்கும்போது ஒரு வித்தயாசமான அனுபவம் கிடைக்கிறது.

சேத்துப்பட்டு வரலாறு

Related image Related image

 

Image may contain: 1 person

ஆச்சரிய செய்தி, அதிசய மனிதர்.

இன்று இவர் சார்ந்த சாதியினர் எண்ணிக்கை அதிகமிருக்கும் பட்சத்தில், இவர் பெயர் கட்டி பறந்திருக்கும்.

இன்றைய , ” சென்னை சேத்துப்பட்டு ” பகுதியின் வரலாறு யாருக்காவது தெரியுமா?

தனியாக காரோ, பஸ்ஸோ வைத்திருந்தவர்களைப் பார்த்திருப்பீர்கள். , அட அதுகூட பரவாயில்லை. அந்தக்காலத்து கே.ஆர் விஜயாவின் கணவர் வேலாயுதம் தனி விமானமே வைத்திருந்தார் என்பார்கள்.

ஆனால் தனியாக ரயில் வைத்திருந்தவர் ஒருவர் சென்னையில் இருந்தார்.

அவர்தான்  நம்பெருமாள் செட்டியார் !

சென்னையிலுள்ள பல பிரசித்தி பெற்ற, சிவப்பு நிறத்திலுள்ள பல கட்டடங்களை உருவாக்கிய கட்டட மேதை, ‘ தாட்டிகொண்ட நம்பெருமாள் ‘ செட்டியார்.

பாரிமுனையில் உள்ள உயர் நீதிமன்றம், சட்டக்கல்லூரி, எழும்பூரில் உள்ள சிற்பக் கலை கல்லூரி, மியூசியம், கன்னிமாரா நூலகம் போன்றவை இவரால் கட்டப்பட்டவை.

18-ம் நூற்றாண்டின் மத்தியில் ஆங்கிலேயர்களுக்கு கிடைத்த பில்டிங் கான்ட்ராக்டர் .

இவர் வாழ்ந்த வீடு, ‘ வெள்ளை மாளிகை ‘ என்ற பெயருடன், சேத்துப்பட்டு மேம்பாலம் அருகில், டாக்டர் மேத்தா மருத்துவமனையின் பின் உள்ளது.

இதில், மூன்று மாடிகள், 30 அறைகள் உள்ளன. இது அருங்காட்சியகமாக மாற்றப்பட்டுள்ளது.

சீனா, ஜப்பான், இத்தாலி, இங்கிலாந்து போன்ற நாடுகளில், பீங்கானில் செய்யப்பட்ட அரிய கலைப் பொருட்கள் அங்கு வைக்கப்பட்டுள்ளன.

எழும்பூர் பாந்தியன் சாலையிலிருந்து, ஹாரிங்டன் சாலை வரை உள்ள நிலப்பரப்பு அவருக்குச் சொந்தமாக இருந்தது.

அதனால் அது ‘ செட்டியார் பேட்டை ‘ என அழைக்கப்பட்டது.

நாளடைவில், ” செட்டிபேட்டை ‘ என மருவி, இன்று, ” செட்பெட் ‘ என மாறிவிட்டது. ஆங்கிலேயர் பலருக்கு வீடு கட்டித் தந்தவர்.

கணித மேதை ராமானுஜம் தம் இறுதி நாட்களை செட்டியார் வீட்டில் கழித்தார்.

இங்கிலாந்திலிருந்து திரும்பிய ராமானுஜருக்கு, காசநோய் பாதிப்பு அதிகமாகிவிட்டதால், அவரது உறவினர்கள் பயந்துபோய், திருவல்லிக்கேணியில் இருந்த அவர்களது வீட்டில் வைத்துக் கொள்ளவில்லை.

அப்போது, நம்பெருமாள் செட்டியார் அவரை அழைத்து வந்து, தனி அறை, தனி சமையல், சிறப்பு வைத்தியம் முதலிய ஏற்பாடுகள் செய்து, அவரைக் காப்பாற்ற எல்லா முயற்சிகளையும் செய்தார்.

ஆனால், ராமானுஜம் முட்டை முதலியவற்றை சாப்பிட மறுத்ததால், காசநோய்க்கு இளம் வயதில் மறைந்தார்.

அவர், கடல் கடந்து வெளிநாடு சென்றதால், அவரது உடலைக் கூட ஏற்றுக்கொள்ள உறவினர்கள் மறுத்தனர். ஆதலால், நம்பெருமாள் செட்டி அவர்களே அவரது ஈமச் சடங்குகளை செய்தார்.

ராமானுஜத்தின் மரணச் சான்றிதழ், இன்றும் செட்டியார் வீட்டில் வைக்கப்பட்டுள்ளது.

சென்னை பல்கலைக்கழகத்தில் பி.ஏ., பட்டம் பெற்றவர் நம்பெருமாள்.

முன்னாள் இம்பீரியல் வங்கி ( தற்போது SBI ) நியமனம் செய்த முதல் இந்திய டைரக்டர். சென்னை மாகாணத்தின் மேல் சட்டசபைக்கு நியமிக்கப்பட்ட முதல் இந்தியர். முதன் முதலாக வெளிநாட்டு கார் ( பிரெஞ்ச் டிட்கன் ) வாங்கிய முதல் இந்தியர்.

தற்போது இந்த கார் விஜய் மல்லையாவிடம் உள்ளது. தன் வின்டேஜ் கலெக்‌ஷன் கார்களில் ஒன்றாக அதை வைத்திருக்கிறார்.

தான் ஈட்டிய பணத்தில் பெரும் பகுதியை, சமஸ்கிருத வளர்ச்சி, வைணவ கோயில்களின் திருப்பணி, ஏழைகளின் கல்வி, மருத்துவம் போன்றவற்றிற்கு கொடுத்து உதவினார்.

வடசென்னையில் பல பள்ளிகளும் சேத்துப்பட்டிலுள்ள சேவா சதனம் வளாகத்தில், தாட்டிகொண்ட நாச்சாரம்மா மருத்துவமனையும் இவருடை அறக்கட்டளை சார்பில் நடைபெறுகின்றன. சென்னையின் வளர்ச்சியில் இவரது சேவை சிறப்பானது.

இந்த நம்பெருமாள் செட்டியார்தான் தன் சொந்த உபயோகத்துக்காக, நான்கு பெட்டிகள் கொண்ட தனி ரயில் வண்டி வைத்திருந்தார்.

தம் குடும்பத்தினரோடு திருவள்ளூர் வீரராகவ பெருமாள் கோவிலுக்குச் சென்று வர இந்த ரயிலை உபயோகித்தார்.

மற்ற நேரங்களில் சென்னை சென்ட்ரல் ரயில் நிலையத்தில்தான் இவருடைய ரயில் நிறுத்திவைக்கப்பட்டிருந்தது.

இவரது பெயரையே இன்று, ” செட்பட் ” தாங்குகின்றது.

(முகனூல் தகவல் : திரு ராஜசேகரன்)

இம்மாத எழுத்தாளர் – இந்திரா பார்த்தசாரதி

Image result for indira parthasarathy

( நன்றி விக்கிபீடியா)

இந்திரா பார்த்தசாரதி தமிழகத்தின் கும்பகோணத்தைச் சேர்ந்த ஒரு தமிழ் எழுத்தாளர் ஆவார்.

இந்தியாவின் உயரிய இலக்கிய விருதுகளில் ஒன்றான சாகித்ய அகாதமி விருது பெற்ற தமிழ் எழுத்தாளர்களில் ஒருவர்.

இவர் 40 ஆண்டு காலம் டெல்லி பல்கலைக்கழகத்தில் பேராசிரியராகப் பணியாற்றியாவர். இது தவிர போலந்து நாட்டில் வார்சா நகரில் அமைந்துள்ள வார்சா பல்கலைக்கழகத்தில் ‘இந்தியத் தத்துவமும் பண்பாடும்’ கற்பிக்கும் ஆசிரியராகவும் இருந்தார். 17 புதினங்கள், 6 சிறுகதைத் தொகுப்புகள் எனப் பல படைப்புக்கள் படைத்துள்ளார். சில நாடகங்களும் படைத்துள்ளார். சாகித்திய அகாதமி விருது தவிர தமிழக அரசு விருது, சரஸ்வதி சம்மான் போன்ற பல விருதுகளைப் பெற்றவர்.

இந்திரா பார்த்தசாரதி கும்பகோணத்தில் தன்னுடைய பள்ளிப் படிப்பை நிறைவுசெய்தார். அப்பள்ளியில் ஆங்கில ஆசிரியராகப் பணியாற்றிய எழுத்தாளர் தி. ஜானகிராமனிடம் இவர் பயின்றார்.

தில்லி பல்கலைக்கழகத்தில் தமிழ்த்துறையில் 1960ஆம் ஆண்டு முதல் பணியாற்றி வந்தார். பின்னர் பாண்டிச்சேரி பல்கலைக்கழகத்தில் உள்ள சங்கர்தாஸ் சுவாமிகள் நாடகப் பள்ளியில் நிகழ்கலைத் துறைத் தலைவராகவும் பேராசிரியராகவும் பணியாற்றி ஓய்வுபெற்றார்.

இவர் முதலில் ஆனந்த விகடன் போன்ற கிழமை இதழ்களில் (வார இதழ்களில்) எழுதத்தொடங்கினார். பின்னர் தீபம், கல்கி, கணையாழி ஆகிய இதழ்களில் எழுதிவந்தார். ‘மழை’ நாடகம் இவர் படைத்த முதல் நாடகம் ஆகும். நிலம் என்னும் நல்லாள் எனும் தலைப்பில் நாவலாக எழுதிப் பின்னர் நண்பர் ஒருவர் நாடகமாக எழுதச்சொன்னதால் நாடகமாக எழுதினார். பிற்காலத்தில் இவர் எழுதிய “நந்தன் கதை”, ராமானுஜர், ஔரங்கசீப் என்னும் நாடங்களும், “ஏசுவின் தோழர்கள்” போன்ற படைப்புகளும் நல்ல வரவேற்பைப் பெற்றன.

நாடக நூல்கள்

மழை
போர்வை போர்த்திய உடல்கள்
கால எந்திரம்
நந்தன் கதை
ஒளரங்கசீப்
ராமானுஜர்
கொங்கைத்தீ
பசி
கோயில்
இறுதியாட்டம் – சேச்சுபியர் எழுதிய கிங் லியர் நாடகத்தின் தமிழாக்கம்
புயல் – சேச்சுபியர் எழுதிய டெம்பஸ்ட் நாடகத்தின் தமிழாக்கம்
இந்திரா பார்த்தசாரதி நாடகங்கள் (இரு தொகுப்புகள்)

புதினங்கள்

ஏசுவின் தோழர்கள்
காலவெள்ளம்
சத்திய சோதனை
குருதிப்புனல்
தந்திர பூமி
சுதந்தர பூமி
வேதபுரத்து வியாபாரிகள்
கிருஷ்ணா கிருஷ்ணா
மாயமான் வேட்டை
ஆகாசத்தாமரை
கிருஷ்ணா கிருஷ்ணா
அக்னி
தீவுகள்
வெந்து தணிந்த காடுகள்
வேர்ப்பற்று
திரைகளுக்கு அப்பால்
ஹெலிகாப்டர்கள் கீழே இறங்கி விட்டன

கட்டுரைத் தொகுதிகள்

இந்திரா பார்த்தசாரதி கட்டுரைகள் 
கடலில் ஒரு துளி

 

தமிழகத்தின் சிறந்த ஆவணப்பட இயக்குனர்களில் ஒருவரான ரவி சுப்பிரமணியன் அவர்களால் தயாரிக்கப்பட்டது

” இந்திரா பார்த்தசாரதி என்னும் கலைஞன்

 

 

குட்டீஸ் லூட்டீஸ் – வளையல் – சிவமால்

Image result for வளையல்

என் மகள் மிதிலாவிற்கு காதுக்கு ஜிமிக்கி வாங்குவதற்காக அவளை-
யும் கூட்டிக் கொண்டு நகைக் கடைக்குப் போயிருந்தேன்.

‘ஏன்பா… ரெண்டு மாசத்திற்கு முன்னால்தான் இந்த ஜோடி வளை-
யல்களை வாங்கிக் கொண்டு போனேன். இரண்டு, மூன்று முறைதான்
யூஸ் பண்ணி இருப்பேன். அதற்குள் எப்படி கன்னா பின்னா என்று
வளைஞ்சிருக்கு பார்… ‘ என்று ஒரு அம்மாள் பக்கத்துக் கவுண்டரில்
கோணாமாணா என்று வளைந்திருந்த அந்த ஜோடி வளையல்களைக்
காட்டி விவாதித்துக் கொண்டிருந்தாள். அந்தக் கடைச் சிப்பந்தியும்
வெவ்வேறு காரணங்களைக் கூறி அவளைச் சமாதானப் படுத்த
முயன்று கொண்டிருந்தான்.

அவர்களையே ஐந்து நிமிடங்கள் பார்த்துக் கொண்டிருந்த மிதிலா
மெதுவாக அந்த அம்மாவிடம் போய், ‘ஆன்டி.. வளையல் யூஸ்
பண்ணினா வளையத்தானே செய்யும்… அதனால் தானே அதன் பெயர்
வளையல்.. இதுக்குப் போய் அந்த அங்கிளைக் கோவிச்சுக்கறீங்க..’
என்றாளே பார்க்கலாம்.

சில விநாடிகள் என் பெண்ணையே பார்த்துக் கொண்டிருந்த அந்த
அம்மாளும் கடைச் சிப்பந்தியும், விவாதத்தை நிறுத்தி விட்டு சிரிக்கத்
துவங்கி விட்டார்கள்.

 

புது யூ டியூப் சானல் எப்படிக் துவங்குவது? – தமிழ் டெக்

கதை  எழுதியாச்சு! கவிதையும் எழுதியாச்சு!

கட்டுரை கேட்கவே வேண்டாம், எழுதிக் குவிச்சாச்சு !

பத்திரிகை ஆரம்பிக்கலாம் என்றால் கையைக் கடிக்குமோ என்ற பயம்! 

வெப் பத்திரிக்கை ஆரம்பிக்கலாம் என்றால் டிசைன் கொஞ்சம் கஷ்டம்!!

பேசாம ஒரு ய டியூப் சானல் ஆரம்பிங்களேன் !

தமிழ் டெக் இதோ ஆலோசனை சொல்கிறார். கேளுங்கள் !!

 

( விரைவில் குவிகம் சானல் யூ டியூபில் வரப்போகிறது.) 

 

பெரியவர்களுக்கான பந்துக் குளியல் ..

வீடியோவைப் ப்பாருங்கள்! 

இந்தப் பந்துக்குளியல் அருமையாக இருக்கிறதல்லவா?

இந்தியாவில் நம் சென்னையில் இது எங்காகிலும் இருக்கிறதா?

அம்மா கை உணவு – சதுர்புஜன்

Image result for sambar

 

நம் வீடுகளில் அன்றாடமோ அல்லது விசேஷ நாட்களிலோ தயாரிக்கும் உணவு வகைகளை வரிசைப்படுத்தி அவற்றின் மகிமைகளை வியந்து எளிய தமிழில் பாடப்படும் கவிதைப் பாடல்கள் இவை. இது ஒரு அறுசுவைத் தொடர். ஒவ்வொரு மாதமும் ஒரு கவிதைப் பாடலை வாசகர்களுக்கு வழங்கி மகிழ்கிறேன்.

 

 

  1. கொழுக்கட்டை மஹாத்மியம் – மார்ச் 2018
  2. இட்லி மகிமை – ஏப்ரல் 2018
  3. தோசை ஒரு தொடர்கதை – மே 2018
  4. அடைந்திடு சீசேம் – ஜூன் 2018
  5. ரசமாயம் – ஜூலை 2018
  6. போளி புராணம் – ஆகஸ்ட் 2018
  7. அன்னை கைமணக் குறள்கள் – செப்டம்பர் 2௦18
  8. கலந்த சாதக் கவிதை – அக்டோபர் 2018   
  9. கூட்டுக்களி கொண்டாட்டம் – நவம்பர் 2018
  10. சேவை செய்வோம் – டிசம்பர் 2018
  11. பஜ்ஜி பஜனை – ஜனவரி 2019
  12. பருப்புசிலி பாசுரம் – பிப்ரவரி 2019
  13. வெண்பொங்கல் வேண்டுதல் – மார்ச் 2019
  14. பாயசப் பாமாலை – ஏப்ரல் 2019
  15. ஊறுகாய் உற்சாகம் – மே 2019
  16. பூரி ப்ரேயர் – ஜூன் 2019
  17. இனிக்கும் வரிகள் – ஜூலை 2019
  18. வடை வருது ! வடை வருது ! – ஆகஸ்ட் 2019
  19. வதக்கல் வாழ்த்து -செப்டம்பர் 2019
  20. சுண்டலோ சுண்டல் ! அக்டோபர் 2019
  21. அவியல் அகவல் நவம்பர் 2019

 

 

சாம்பார் சக்தி !

 

வாய் மணக்கும் கை மணக்கும்

சாம்பாரடி சாம்பார் !

வாசல் மணக்கும் கொல்லை மணக்கும் !

சாம்பாரடி சாம்பார் !

எட்டூரு எட்டிப் பார்க்கும் !

சாம்பாரடி சாம்பார் !

எங்கும் பார்க்க முடியாதெங்கள்

சாம்பாரடி சாம்பார் !

 

சந்தி வந்தனம்  நடுவினிலே

காயத்ரி இருக்குது !

வேதங்களின் வித்தாய் மகா

வாக்கியம் இருக்குது !

ஓம் எனும் ஒலி மந்திரத்தின்

உயிராய் இருக்குது !

சாம்பார் பொடியில் இருக்குது

எங்கள் சாம்பார் சக்தியே !

 

ஒவ்வொரு வீட்டு சாம்பாருக்கும்

தனிச் சுவை உண்டு !

எங்கள் வீட்டு சாம்பாரில்

அன்னை கை மணம் உண்டு !

நாக்கில் ஒரு சொட்டு போதும் –

நரம்பெலாம் பரவும் !

அன்னை சக்தி அன்பாய்ப் பாய்ந்து

நாடியில் ஓடும் !

 

கத்திரிக்காய், வெங்காயம் என்று

எதனையும் போடு !

சௌ சௌ, காரட், மற்றும்

அவரையும் போடு !

வெண்டை, தக்காளி, ஏன்

கீரையும் சேரு !

கிளறிக்குழம்பு கொதிக்கும் போது 

தாளம் போடு !

 

பெருங்காயத்தில் இருக்குதடா

சாம்பார் பெருமை !

உப்பு, உரப்பு, ஏறிய கை

சப்ப வைக்குமே !

எத்தனை  சுவை இருக்குதடி

பதார்த்தங்களிலே !

சாம்பார் போல் சுவை வருமோ !

சிந்தித்திடுவாய் !

 

சோற்றினிலே சாம்பார் விட்டு

சுழற்றி அடிக்கலாம் !

தோசையோடு சேர்த்தடித்து

தேவலோகம் போகலாம் !

சாம்பாரில்லா இட்லி என்றால்

கேலி பேசுவார் !

சரியான சாம்பார் என்றிடுவார்

அறியாதவரே !

 

எத்தனைதான் எழுதினாலும்

புரியாதம்மா !

எங்கள் வீட்டு சாம்பார் புகழ்

முடியாதம்மா !

அன்னை நினைவு இருக்கும் வரை

அகிலம் உண்டம்மா !

அனைத்தினிலும் பெரிது அவள்

அன்பே அம்மா !  

 

 

         ***********************************************

                                                                 ஜி.பி. சதுர்புஜன்

                        E Mail: kvprgirija@gmail.com                                                            Ph: 98400 96329

 

 

 

 

கடைசிப்பக்கம் – டாக்டர் ஜெ பாஸ்கரன்

 

 

 

 

 

 

 

 

 

 

இது வெறும் ‘பிரமை’ அல்ல!

 

வைர மூக்குத்தி பளிச்சிட, சிரித்தபடி வந்தமர்ந்த பாட்டிக்கு வயது 72.ஏற்கனவே, இரத்தக் கொதிப்பு, சர்க்கரை, உப்பு, கொழுப்பு என எல்லாவற்றுக்கும் மாத்திரைகள் – தூக்கம் சரியாக இல்லையென என்னிடம் வந்தார். ஏதோ மன அழுத்தம், சிறிது நேரம் பேசிவிட்டு, மருந்துகளுடன் சென்று விட்டார். சென்றவர், மீண்டும் வந்து, ‘முக்கியமான ஒன்றைச் சொல்ல மறந்துவிட்டேன், இப்போது நேரமிருக்கிறதா?’ என்றார்.

‘ம்.., இருக்கிறது, சொல்லுங்கள்’ என்றேன். மூளையின் ஓரத்தில் மினுக் என்று ஒரு பல்ப் ஒளிர்ந்தது!

“கொஞ்ச நாள் முன்னாடி, நடுராத்திரி முழிப்பு வந்தாப்பல இருந்தது. அறையில் மூலையிலிருந்த பீரோவைத் திறந்து இவர் ஏதோ அடுக்கி வைத்துக் கொண்டிருந்தார். இந்த நேரத்துல என்ன பண்றார் என்று புரியாமல் பக்கத்தில் கை வைத்தால், அங்கே அவர் தூங்கிக் கொண்டிருந்தார் – தூக்கிவாரிப் போட்டது. அப்போது அங்கே நிற்பது யாரு? மெதுவாக அவரைத் தட்டி எழுப்பினேன். அருகில் சென்று ‘பீரோகிட்ட யாரோ நிக்கறா’ என்று ரகசியமாய்ச் சொன்னேன். ‘டக்’ கென்று அவர் சுவிட்சைப் போட, அறை முழுவதும் வெளிச்சம். பீரோ மட்டும் தனியாக நின்றுகொண்டிருந்தது. ‘யாருமில்லையே, கனவு ஏதானா கண்டயான்ன? பிரமையா இருக்கும். தூங்கு’ . திரும்பிப் படுத்துக்கொண்டேன், பீரோ பக்கம் பார்க்கத் துணிவில்லை”

“தெளிவாகப் பார்த்தீர்களா?”

“ஆமாம், சந்தேகமே இல்லை. இவரைப் போலவே ஒரு மனிதர் நிற்பதைப் பார்த்தேன்”

“ம்… அப்புறம்?”

“திரும்பவும் இரண்டு வாரம் முன்னாலெ, எனக்குப் பக்கத்துல குழந்தை ஒண்ணு, புல்லாங்குழல் வெச்சுண்டு சிரிச்சிண்டு இருந்தது. கண்ணை மூடித் திறந்தாலும் சிரிச்சிண்டே அங்க நின்னுண்டு இருக்கு. விளக்கைப் போட்டதும் அங்கே யாருமில்லை. ‘அன்று மாலை கேட்ட கிருஷ்ண லீலா தரங்கிணி பாட்டு இப்படி பிரமையா இருக்கும்’ என்று தேற்றிக்கொண்டு தூங்கினேன்”.

பாட்டி சொல்வதைக் கேட்டுக்கொண்டே, அவரது மருந்துகள் லிஸ்டைப் பார்த்தேன் – எல்லோரும் உபயோகிக்கும் யூஷுவல் மருந்துகள்தான்.

“சமீப காலமாக உங்களுக்கு மறதி அதிகமாகிவிட்டதா?” என்றேன்.

“இல்லே சார். எனக்கு வேற ஒரு ப்ராப்ளம் கிடையாது – BP, சுகர் எல்லம் கூட கன்ட்ரோல்லதான் இருக்கு” என்றவரின் முகத்தில் கலவரம் இல்லை – வியப்பு தெரிந்தது.

“போன வாரம் என் தலைமாட்டுல லண்டன் போலீஸ் – கருப்பு,சிவப்பு டிரஸ், கூடை மாதிரி கருப்பு தொப்பி, கையில் துப்பாக்கி – ஒர்த்தன் நிக்கறான். இவன் ஏண்டா இங்க வந்தான்னு பார்த்தா, விளக்கு வெளிச்சத்துலே மறைஞ்சு போய்ட்டான்!”

“விளக்க வெளிச்சத்துலேயே தூங்கிப் பாருங்களேன்” என்றேன் நான்.

“தூக்கம் வராதுன்னு, சின்ன நைட் லாம்ப் போட்டுத் தூங்கினேன் – நேத்திக்கு, ரூம் மூலைல போட்டிருந்த ஸ்டூல் மேல உட்கார்ந்து, அழகா ஒரு பொண்ணு வீணை வாசிச்சிண்டிருக்கா! எங்கே என்னைப் பார்த்துடுவாளோன்னு, தலைய தலைகாணிக்குள்ள பொதச்சிண்டு, தூங்கிப் போனேன். எனக்குப் பைத்தியம் புடிச்சிடுமா டாக்டர்?” என்றார் பரிதாபமாக.

நான் சிறிது நேரம் பாட்டியைப் பார்த்தவாறு இருந்தேன். “இல்லைம்மா, இது ஒரு பிரமை – இல்லாத ஒன்றை இருப்பதாக மூளை நினைத்து, கண்கள் பார்க்கின்றன. சிலருக்கு வெளிச்சம் இருந்தாலும் இப்படி உருவங்கள் தெரியும். உங்களுக்குப் பரவாயில்லை, கிருஷ்ணன், சரஸ்வதி என்று வருகிறார்கள். வேறு சிலருக்கு, பாம்பு, புலி, கணவன், மனைவி, உருவமில்லாத நிழல்கள், இறந்து போன உறவினர்கள் என வந்து பயமுறுத்துவார்கள்! இது ஒரு வகை ‘ஹாலூசினேஷன்’ – (visual hallucination) என்றேன்!

இந்த வார்த்தையைக் கேட்டு, இரவில் வந்த ‘பிரமை’யே பரவாயில்லை என்ற முக பாவத்துடன் என்னைப் பார்த்தார். சில, பரிசோதனைகள், ஸ்கான் எல்லாம் எழுதிக் கொடுத்து, மருந்தினையும் சொல்லி, ‘சரியாகிவிடும், பயப்படத் தேவையில்லை’ என்று அனுப்பி வைத்தேன்.

ஹாலூசினேஷன் – இல்லாத ஒன்றை இருப்பதாகக் காட்டும் மூளையின் தந்திரம் -சில மருந்துகளினால் (போதை மருந்துகள், ஆல்கஹால்) வரக்கூடும். டிமென்ஷியா, பார்க்கின்ஸன் நோயின் பகுதியாகவோ அல்லது அதற்கு கொடுக்கப்படும் மருந்துகளாலோ வரலாம்! பொதுவாக இம்மாதிரியான விசுவல் ஹாலூசினேஷன் மூளையின் பின் பகுதியாகிய ‘ஆக்ஸிபிடல்’ லோப் (பார்வை, உருவங்களை அனலைஸ் செய்து, நம்மைப் பார்க்க வைக்கும் பகுதி) பாதிக்கப் படும்போதும் (ஸ்ட்ரோக், வலிப்புகள்) வரலாம். சில மனநோய்களிலும் – முக்கியமாக ஸ்கீசோஃப்ரீனியா மற்றும் பைபோலார் மன வியாதிகள் – இவ்வகை பிரமைகள் வரும் வாய்ப்புகள் அதிகம்.

இதுபோலவே சிலருக்கு குரல்கள், சப்தங்கள் கேட்கும் – ஆடிடரி ஹாலூசினேஷன் – எம் வி வெங்கட்ராமின் காதுகள், இதனை மையப் படுத்தி எழுதப் பட்ட நாவல்! காதுகளில் பிரச்சனை, செவிடு போன்றவைகளுக்குக் காதில் இரைச்சல் இருக்கும். சிலருக்கு சுசீலா, எஸ் பி பி போன்றவர்கள், பாடிய நல்ல பாடல்கள் கேட்கும்! (அன்பே வா வில். நாகேஷ் சொல்வது போல், ‘வியாதி வரக் கூட மனுஷனுக்குக் கொடுத்து வெச்சிருக்கணும்பா’).

மனநிலை பிறழ்வு உள்ளவர்களுக்கு ஆடிட்டரி ஹாலூசினேஷன் அதிக அளவில் வரும்.எனக்குத் தெரிந்த நண்பர் ஒருவர் காதில் எப்போதும் கேட்ட குரலின் தொந்திரவினால், மாடியிலிருந்து குதித்துத் தற்கொலை செய்து கொண்டார். இதை மையமாகக் கொண்டு, மோஹன்லால் நடித்த மலையாளப் படம் ஒன்று – பெயர் நினைவில் இல்லை – மனைவியின் குரல் சொல்கிறது என்று கொலைகள் செய்வார், சர்ச் மணியில் தூக்குப் போட்டு தற்கொலை செய்து கொண்டு விடுவார். ஸ்கீசோஃப்ரீனியா மனோ வியாதியைப் பற்றிய நல்ல படம் அது. நம் சுஜாதா கூட ஒரு சிறுகதையில் இது பற்றி எழுதியிருப்பார்!

தோல் மேல் பூச்சிகள் ஊர்வதைப் போல (தொடு உணர்ச்சி (tactile) ஹாலூசினேஷன், மூக்கில் வித்தியாசமான வாசனை அல்லது துர்நாற்றம் (olfactory) ,(முக்கியமாக டெம்பொரல் லோப் வலிப்புகளுக்கு முன், ஒரு முன்னெச்சரிக்கையாக ‘ஆரா’ இது ஏற்படலாம்!) வருவதைப் போல ஹாலூசினேஷன் எனப் பலவகை பிரமைகள் மனம் மற்றும் மூளையின் தந்திரத்தால் ஏற்படும்!

பிரமைகள் குறித்த அச்சம் தேவையில்லை – அநேகமாக எல்லா ஹாலூசினேஷன் களுக்கும் மருந்துகள், தீர்வுகள் உண்டு. தற்கொலைக்கு வாய்ப்புகள் இருப்பதால், மருத்துவ கவனிப்பு அவசியமாகிறது!

நல்ல அழகுடன் ஒரு யுவதியோ, பிடித்த பாடலோ ஹாலூசினேஷனாக வந்தால், உயிருக்கு ஆபத்தில்லாத பட்சத்தில் வரவேற்கலாம்தானே!

Image result for மன்னவனே அழலாமா