வெற்றிலைச் சிவப்பை

பார்க்கச் சொல்லி

வேலாய்க் கூரிய நாக்கை

வெளி நீட்டிக் காட்டுகிறான்

சிலிர்க்கிறது உள்ளுக்குள்

 

அவசர அவசரமாய்

உடை திருத்தி

வெளிவருகையில்

திடுக்கிடச் செய்தது

பயந்து ஓடிய

திருட்டுப் பூனை  

 

எக்கணத்திலும்

வாசல் நுழையக்கூடும்

விளையாடப் போன சின்னவன்

பாதி உரித்த பழங்களை

மூடிக்கூட வைக்கவிடாமல்

என்ன அவசரம் இந்த மனுசனுக்கு

 

சுரோனிதக் கனவுகளில்

பிசுபிசுக்கத் துவங்குகையில்

நாசியேறித் தொல்லை செய்கிறது

நன்கு பழகிய

முதுகுவலித் தைலத்தின் நெடி

 

மனப் பிறழ்விலிருந்து

மீள முயல்கிறேன்

மனம் பிறழ்வையே விரும்புகிறது

மதுரக் கோப்பைக்குள்விரும்பி விழுந்த

சிற்றெரும்பாய் நானும்

மலகோப்பைக்குள்

தவறி விழுந்த

பல்லியாய் அவளும்