மதுக்கூடத்தில்
தற்செயலாய் எதிர்ப்பட்ட
பால்ய நண்பனை
வீட்டிற்கு அழைத்தேன்

அவனும் விபரம் கேட்டவன்
மறுப்பேதுமில்லாமல்
பின்னால் ஏறிக்கொண்டான்

பால்ய மேகங்கள்
தலைக்கு மேலேயே பயணிக்க
வீடடைந்தோம்

தவறவிட்ட கணங்களெல்லாம்
தொட்டுப் பிடித்து விளையாடிக்கொண்டன
மறைந்துவிட்ட தழும்புகளையும்கூட
தேடித்தேடி மருந்து தடவிக்கொண்டோம்

மூளை மடிப்புகளே
மறந்துவிட்ட நிகழ்வுகளைக் கூட
உறிஞ்சி எடுத்து ஊதித்தள்ளினான்
குமிழி ஊதும் சிறுபிள்ளையாய்

என்னை அப்பாவியென
நம்பிக்கொண்டிருக்கும் மனையாட்டி
தேனீர் கொடுக்கும் சாக்கில்
முறைத்துவிட்டுப்போனாள்

கல்லூரிக் காலத்தைத் துவங்கியபோது
சுதாரித்தேன்…
அவன் அவ்வளவு சாமர்த்தியன் அல்லன்
கவனமாகப் பேசி அனுப்பிவிட வேண்டும்
எந்த நேரத்திலும்
எந்த ரகசியத்தையும்
போட்டு உடைத்துவிடக்கூடும்