புத்தகக் கண்காட்சி 2024 – ராஜாமணி & நாகேந்திர பாரதி

வேள்பாரி நாவல் நண்பர்களின், ‘பாணர்கள் குழு ‘ வின் சிறுகதைத் தொகுப்பு ‘இராவெரி ‘ புத்தகம் எஸ் ராமகிருஷ்ணன் அவர்களால் வெளியிடப்படும் நேரம் நெருங்கி விட்டதால் கண்காட்சியில் நுழைந்ததும் நேராக அந்தப் ‘ பொன்னி ‘ ஸ்டாலுக்கே போய் விட்டாகி விட்டது. ‘ வாங்க அண்ணா ‘ என்று அன்புடன் வரவேற்று , என்னை நண்பர்களிடம் அறிமுகப்படுத்தினார் டாக்டர் நந்தினி . சுரேஷ் ,சுகேஷ் , மகேஷ் என்று பாணர்கள் பலர் அறிமுகம் .அவர்களைத் தொடர்ந்து மதுரை மண்ணுக்கே உரிய வேகமும் விறுவிறுப்புமாக இயங்கிக் கொண்டிருந்த அருள் அவர்களுடனும் . அமைதியும் ஆற்றலும் நிரம்பிய டேனியல் அவர்களுடனும் சந்திப்பு . முக நூலில் மட்டுமே சந்தித்திருந்த பாணர்களுடன் நேரடிச் சந்திப்பு . கிண்டலும் சண்டையாக , அந்த வாட்ஸப் குழுவே அங்கே காட்சி அளித்தது .

அதிக உற்சாகம் அளிக்கும் இந்தியன் வங்கி நண்பர் தலைவர் தர்மராஜ் வெளியூர் சென்று விட்டதால் வர இயலவில்லை என்ற விபரமும் தெரிய வந்தது . புத்தக அமைப்பில் பெரும் பங்கு வகித்த தங்கராஜ் அவர்களும் மதுரையில் இருந்து வர இயலாத சூழ்நிலை.

பக்கத்தில் இருந்த தேசாந்திரி பதிப்பகம் சென்ற நண்பர்களுடன் சேர்ந்து சென்று எஸ் ராமகிருஷ்ணன் அவர்களை அழைத்து வரும்போது , அவரது பதிப்பகப் புத்தகங்கள், கொடும் மழையால் பெருத்த சேதமடைந்ததற்கு வருத்தம் நிறைந்த விசாரிப்புகள். மற்றும் சில இலக்கிய அளவளாவல் . அப்போது ராகம் சம்பந்தப்பட்ட புத்தகங்கள் பற்றி விசாரித்தபோது ‘ சாருகேசி ‘ என்ற பழம்பெரும் எழுத்தாளர் , ஐம்பது ,அறுபதுகளில் எழுதியவர் , முன்பு தொடர்ந்து எழுதி வந்த இசை பற்றிய கட்டுரைகள் விபரம் தெரிய வந்தது. அது புத்தகமாகக் கிடைக்கவில்லை. இது போன்று ப்ரிண்டில் வெளிவராமல் மறைந்து போன பல இலக்கியப் பொக்கிஷங்களில் ஒன்றாக இருக்கலாம். குவிகம் பசுபதி சார் அவர்களின் ப்ளாக்கில் தேடினால் கிடைக்கலாம் சில பொக்கிஷங்கள் என்றும் தோன்றியது .

தொடர்ந்த பொன்னி அரங்க புத்தக வெளியீட்டு விழாவில் , எஸ்ரா அவர்களை வரவேற்றுப் பேசிய பாணர் குழுவின் நித்யா அவர்களின் வரவேற்புரை ஒரு இலக்கிய உரை. தொடர்ந்து புத்தகத்தை வெளியிட்டுப் பேசிய எஸ் ரா அவர்களின் வாழ்த்துரை இளம் எழுத்தாளர்களுக்குச் சிறந்த அறிவுரை . ‘தொடர்ந்து எழுதுங்கள் , வித்தியாசமான தலைப்பு வையுங்கள். திரும்பப் படித்துத் திருத்தம் செய்யுங்கள் . மூத்த எழுத்தாளர்கள் கதைகளைப் படியுங்கள், உங்கள் கதையைப் பற்றிய காரசார விமரிசனங்களை அலசுங்கள்’. என்று பல அறிவுரைகள். நமது பாணர் குழுவில் நடக்கும் காரசார விமர்சனங்கள் நம்மைப் புண்படுத்தாமல் பண்படுத்தும் நினைவும் நமக்கு ஞாபகம் வந்தது. இந்த நிகழ்வுக்கு எஸ் ரா அவர்களுடன் அவரது துணைவியாரும் வந்து சிறப்பு செய்வித்தது பாணர்களுக்கு மகிழ்ச்சி அளித்தது .

முன்பதிவு செய்த அனைவர்க்கும் நந்தினி மேடம், அருள் , டேனியல் மூவர் குழு உடனே புத்தகக் கட்டுகளைப் பிரித்து , புத்தகங்களைக் கொடுத்தது சிறப்பு. முன் பதிவு செய்து தேவையான அளவு புத்தகங்களை பிரிண்ட் செய்த பாணர்களின் பதிப்பக யுக்தி அருமை. முன்பதிவிலே ஒரே வாரத்தில் இருநூறு புத்தகங்கள் ஆர்டர் ஒரு சாதனை. வாழ்த்துகள் .

தொடர்ந்து பாணர் நண்பர்கள் சிலரை அழைத்துக் கொண்டு நவீன விருட்சம் ஸ்டால் சென்று அறிமுகம், புகைப்படங்கள். அழகியசிங்கரின் நவீன விருட்சம் இதழ் அளிப்பு . மற்றும் அவரது இலக்கிய வாட்சப் குழுக்கள் மூலம், பல கதைஞர்கள், கவிஞர்கள், பாடகர்கள் போன்றோரை உருவாக்கியும் , உற்சாகப்படுத்தியும் அவர் செய்து வரும் இலக்கிய சேவை பற்றிய கருத்துப் பரிமாறல் . இந்த இலக்கிய சேவை அழகியசிங்கரின் பெயரை இலக்கிய உலகில் என்றும் நிலைத்து இருக்கச் செய்யும் .

தொடர்ந்து விருட்சம் ஸ்டாலிலும் வேறு சில ஸ்டால்கள் சென்றும் புத்தகம் வாங்கல். தேசாந்திரி பதிப்பகத்தில் ‘ தேசாந்திரி-எஸ்ரா ‘ . நியூ செஞ்சுரி ஸ்டாலில் ‘இலக்கியத்தில் மேலாண்மை-இறையன்பு ‘ . விருட்சம் ஸ்டாலில் ‘ ‘வேதம் புதுமை செய்த பாரதி-ஸ்ரீரங்கம் மோகனரங்கன் ‘, தொ.பரமசிவன் படைப்புகள் ‘ . சென்ற வாரம் வந்தபோதே விருட்சம் ஸ்டாலில் பத்துப் புத்தகங்கள், கதைகள், கவிதைகள், கட்டுரைகள் வாங்கியாயிற்று. இந்தப் புத்தகங்களும் அந்த அலமாரியில் அவற்றோடு சென்று சேரும். படிக்கும் போது படிக்கப்படும்.

கண்காட்சியில் கால் நடந்தபோது கண் பார்த்த நண்பர் சொல்வேந்தர் மில்டன் அவர்களுடன் அளவளாவால் . அடுத்துப் பார்த்த கவிஞர் விக்ரமாதித்யன் அவர்களை நவீன விருட்சம் அழைத்து வந்து உரையாடல், அவரது ‘ உத்தரகோசமங்கை ‘ கவிதை புத்தகம் பற்றிய விசாரிப்பு. அவர் எனது சொந்த ஊரான உத்தரகோசமங்கை சென்று வந்த விபரம் தெரிந்து கொள்ளுதல். திரும்ப அவரை அவர் விரும்பிய மற்றுமொரு ஸ்டாலில் சென்று விட்டு விட்டு , அவரது உடல் நலம் பேண வாழ்த்துச் சொல்லி விட்டுத் திரும்ப ‘ நவீன விருட்சம் ‘.

இளைப்பாற ஒரு சென்டர் பாயிண்ட் நவீன விருட்சம். பொருத்தமான பெயர் தான். . அழகியசிங்கருக்கு உதவியாக எப்போதுமே அங்கே இருக்கும் கிருபானந்தன், ராஜாமணி அவர்களுடன் உரையாடல். கிருபானந்தன் அவர்களின் நகைச்சுவையும் கிண்டலும் தனி. அப்போது அங்கு வந்து சேர்ந்த ‘ தளம் ‘ பா ரவி அவர்களின் சமுதாய இலக்கியம் பற்றிய கண்ணோட்டம் , சந்தியா நடராஜன் அவர்களின் கலகலப்பான பேச்சு, ‘இராவெரி ‘புத்தகத்தில் உள்ள எனது சிறுகதையை உடனே படித்து விட்டு நண்பர் ராஜாமணி அவர்கள் நெகிழ்ந்து பாராட்டி , கிராம மக்களின், காலரா நோய்க்கால ஒற்றுமை உணர்வை நினைவு படுத்திப் பேசியது, எல்லாமே சிறப்பு .

இப்போது இன்னும் சில நண்பர்கள் நவீன விருட்சம் ஸ்டாலில்.கதை புதிது யாஸ்மின் பேகம் மேடம் , குவிகம் பிரேமா மேடம், சொல்வேந்தர் அருண்மொழி மேடம் ,காந்தீய நண்பர் நித்தியானந்தம் அவர்களுடன் சந்திப்பு . தொடர்ந்த அட்டகாசமான சந்திப்பு நமது இசை புதிது ‘ கேள்விக்காரன் ‘ அவர்களுடன். அந்த சிரிப்பும் பேச்சும் அவருக்கே உரிய மகிழ்ச்சியும் நம்மையும் தொற்றிக் கொள்ளும். மற்றும் ஒவ்வொரு வருடமும் அழகியசிங்கரின் ஸ்டாலில் வந்து உதவிசெய்யும் கோவை இளைஞர்கள் இருவருடனும் பேச்சு.

விருட்சம், குவிகம் , பறம்பின் பாணர்கள், கவிதை வனம் , சொல்வேந்தர் மன்றம் என்று பல குழுக்களைச் சேர்ந்த நண்பர்களை ஒரே இடத்தில் ஒரே நேரத்தில் சந்தித்த மகிழ்ச்சி இது போன்று இனி அடுத்த வருடம் தான்.

கடைசி நாள் என்பதால் அதிகக் கூட்டம். மாலை நெருங்க நெருங்க வேகத்தோடு கூடிய ஒரு சோகமும் தெரிந்தது. ஸ்டால் அமைத்து ஒவ்வொரு நாளும் வந்து சென்ற பதிப்பாளர்களுக்கும் எழுத்தாளர்களுக்கும், அன்று ஒரு விழா முடியும் நாள் என்ற வருத்தம் இருப்பது தெரிந்தது. இரண்டே முறை வந்த நமக்கே கொஞ்சம் வருத்தமாகத்தான் இருந்தது விடை பெற்று வரும்போது .

முகப்பை ஒரு போட்டோ எடுத்து திரும்பிப் பார்த்தபடி திரும்பியபோது ஆட்டோவில் வரும்போது எனது போனில் ‘ க்ளிக் சப்தம். மெசேஜ் ஒன்று வந்து விழுந்த சப்தம். , குவிகம் வாட்சப் குழுவில் , பிரேமா மேடம் அவர்கள், இராவெரி புத்தகத்தில் எனது சிறுகதை படித்து நெகிழ்ந்து எழுதி இருந்த வாழ்த்துச் செய்தி .புத்தக வெளியீட்டுக்கு விழாவுக்குப் பொருத்தமான முடிவுரை.

இதற்கு முன்னுரையாகப் போன வாரம் போன் செய்து ‘ நீங்க எழுதி அனுப்பிய கதை, இராவெரி புத்தகத்தில் வருகிறது அண்ணா, அடுத்த வாரம் வெளியீட்டு விழா, வாருங்கள் ‘ என்று அழைத்த டாக்டர் நந்தினி மேடம் நினைவு வந்தது. தனிப்பட்ட முறையில் நூறுக்கு மேல் மின்புத்தகங்கள் வெளியிட்டு இருந்தாலும் நண்பர்களோடு சேர்ந்து எழுதி வெளிவரும் புத்தகங்களுக்குக் கிடைக்கும் மதிப்பு அதிகம்தான், ஆர்டரும் அதிகம்தான். கூட்டமும் அதிகம் தான், மகிழ்ச்சியும் அதிகம்தான். அனைவர்க்கும் நன்றி .