Advertisements

தலையங்கம் –                                 ஆ.ஆ. – ஆச்சரியம்

image
image

No wonder BROOM sweeps!  It is meant for sweep! 

டெல்லியில்  நடைபெற்ற தேர்தலில்  ஆம் ஆத்மியின் அமோக வெற்றி அனைத்துப் பிரிவினரையும் ஆச்சரியப்பட வைத்துள்ளது. 

இதன் சிறப்புகள் : 

  • ஊழலுக்கு எதிரான கட்சி வென்றுள்ளது- நல்ல காலம் பிறக்குது.. 
  • எழுபதில் 67 இடங்கள் வெற்றி! உண்மையில் வரலாறு காணாத வெற்றி!
  • தேர்தல் ஜோதிடர்கள், கருத்துக் கணிப்புக்கள் அனைத்தையும்   (மேலே காண்க) இது பின் தள்ளி விட்டது. . 
  • பிஜேபியை வெறும் 3 சீட்டுக்குத் தள்ளி- காங்கிரசுக்கு முட்டை கொடுத்து மீதம் 67 ஐயும் எடுத்துக் கொண்டது!
  • மோடி அலையைக் கட்டுப் படுத்தியது!   


ஆ..ஆ..வின்  ஆர்ப்பரிப்புக்குக்  காரணம் என்ன?

 . உறுதியான  வாக்குறுதிகளை வழங்கியது

  •      டெல்லி தனி மாகாணம் 
  •       எல்லோரும் உட்பட்ட ஜன் லோக் பால் சட்டம் 
  •       2 லட்சம் கழிப்பறைகள்
  •       பாதி விலையில் மின்சாரம்
  •       எல்லோருக்கும் 700 லிட்டர் தண்ணீர்  
  •       சி‌சி‌டி‌வி கேமராக்கள் -பெண்கள் பாதுகாப்பு படை 
  •       500 பள்ளிகள் , 20 கல்லூரிகள் 
  •       உதவி மையங்கள்   டெல்லி முழுவதும் இலவச  WIFI வசதி 


வெற்றிக்கான மற்ற காரணங்கள்: 

  1. சாதாரண மக்களுடன் தன்னை ஐக்கியப் படுத்திக் கொண்டது      ( பத்து ரூபாய் மப்ளர் vs  பத்து லட்சம் சூட்)  
  2. திட்டமான பிரசாரம் 
  3. வாக்காளர்களிடம் மன்னிப்புக் கேட்டது (இதுவரை யாரும் செய்யாதது!) 
  4. முஸ்லிம் ஓட்டுக்கள் மொத்தமாக வந்தது 
  5. மற்ற எதிர்க்கட்சிகளும் இவர்களை ஆதரித்தது
  6. பி ஜே பியை விவாதத்திற்கு அழைத்தது   
  7. கிரண் பேடியை  முதல்வராக அறிவிக்க வைத்தது 
  8. ஓட்டுக்குக் காசு கொடுக்காதது 
  9.  காங்கிரஸின் படு  வீழ்ச்சி 
  10. காங்கிரஸ்-பிஜேபிக்கு ஒரு மாற்று    

இனி மோடி,

  •  ஆகாய விமானத்திலிருந்து தரைக்கு வரவேண்டும்!
  •  பாலம் விமான நிலையத்திற்குப்  போவதற்குப் பதிலாக    பாலங்கள் கட்டவேண்டும்! 
  • மற்ற நாட்டை விட்டு நம் நாட்டைக் கவனிக்க வேண்டும் 

இனி காங்கிரஸ், 

  • பெருமளவில் தன்னை மாற்றிக் கொள்ள வேண்டும்!

இனி ஆ.ஆ. 

  • செயல்.. செயல்.. இது தான் தாரக மந்திரமாக இருந்து  நல்ல மாற்றுக் கட்சியாக மலரவேண்டும்.

நடக்குமா?  நடக்கவேண்டும்! 

——————————————————————–

ஆண்டு : 2                                                                   மாதம் : 2 

image

Editor and Publisher’s office address:

S.Sundararajan
B-1, Anand Flats,
50 L B Road, Thiruvanmiyur
Chennai 600041
போன்: 9442525191   
email : ssrajan_bob@yahoo.com

ஆசிரியர் & பதிப்பாளர்  : சுந்தரராஜன்
துணை ஆசிரியர்     : விஜயலக்ஷ்மி
இணை ஆசிரியர்    :அனுராதா 
ஆலோசகர்              :அர்ஜூன் 
தொழில் நுட்பம்    : ஸ்ரீநிவாசன் ராஜா 
வரைகலை             : அனன்யா


ஒபாமாவின் இந்தியா விஜயம் –  அதுவும் நமது குடியரசு விழாவில் கலந்து கொண்டது பெருமையான செய்தி தான். 

தொடரட்டும் இந்தியா அமெரிக்கா நல்லுணர்வு !

இந்த  வீடியோ சும்மா ஜாலிக்காக! நல்லா கலாய்ச்சிருக்காங்க !

நன்றி: Headlines Today

 

2014 தமிழ்த் திரைப்படம் -ஒரு கண்ணோட்டம்                 (Action King )

2014 இல் வழக்கத்துக்கு மாறாக நிறைய நல்ல படங்கள் வந்துள்ளன.  எல்லா வருடங்களிலும் ரஜினி அஜீத் சூர்யா தனுஷ் படங்கள் வரும். ஹிட் ஆகும். ஆனால் இந்த வருஷம்  சில நல்ல புதுமையான   படங்கள் வந்துள்ளன .அவை ஹிட்டும்  ஆகியிருக்கின்றன. 

சரி இந்த வருடம் வந்த சிலபடங்களைப் பற்றி   டாப் 10 பாணியில் பேசுவோம் 

லிங்கா 

image

தலைவர் படம் என்ற எதிர்பார்ப்பைக் கொஞ்சம் குறைச்சிக்கிட்டு போனதினாலே சுமார் ரகத்தில் லிங்காவைச் சேர்க்க முடிந்தது. இல்லைன்னா ????  ரஹ்மான் பாட்டு எதுவும் மனசிலே நிக்கலை. ரஜினியின் பழைய படங்களை மிக்ஸியில் அரைத்து தோசை ஊத்தியிருக்கிறார் கே. எஸ் ரவிகுமார். சாரி தலைவரே. தோசை வேகவில்லை. 

பத்துக்கு நாலு 

அரிமா நம்பி: 

image

நல்ல விறுவிறுப்பான திரைக்கதை. வித்தியாசமான  திருப்பங்கள்.செதுக்கியதைப் போன்ற பாத்திரங்களும் வசனங்களும். விக்ரம் பிரபு மற்றும் மற்ற நடிகர்  நடிகைகள் இன்னும் கொஞ்சம் நல்லா நடிச்கிருக்கலாம். தொய்வு இல்லாமல் போகிறதுக்காக டைரக்டரைப் பாராட்டலாம்.  டூயட் பாடற   வழக்கத்தை யாராவது மாத்தினால் தேவலை. 

பத்துக்கு ஆறு.   

யாமிருக்க பயமே: 

image

திகிலும் காமெடியும் கலப்பது தமிழ் சினிமாவின் புது ட்ரெண்ட்.  நிறைய இடங்களில் பயமும் குபீர் சிரிப்பும் வருகின்றன என்றாலும் அவை எதிர்பார்த்த மாதிரி தான் இருக்கின்றன, நிறைய பேரின் நடிப்பு சுமார் ரகத்துக்கு கீழே! நல்ல முயற்சி.

பத்துக்கு ஏழே கால் . 

வாயை மூடிப் பேசவும்: 

image

புதுமையான கனவுக் கதை. சின்னச் சின்னப்   பாத்திரங்களும் நல்லா பண்ணியிருக்காங்க. குறும்படத்தை பெரிய படமா எடுத்திருக்கற சிரமம் பார்க்கும் போது தெரியுது.சுந்தரலிங்கம் சார்! தமிழ் சினிமாவுக்கு செம புதுமையான வரவு. 

பத்துக்கு ஏழு.    

மெட்ராஸ்: 

image

இந்தப் படத்தின் ஹீரோ சுவர் தான். அந்தப் பாணியில் சொன்னால் பழைய சுவத்துக்குப் புதுப் பெயிண்ட் அடித்திருக்கிறார்கள். அங்கே அங்கே கலர் சூப்பரா இருந்தாலும் நிறைய இடங்களில் பெயிண்ட் சாயம் போயிருக்கு. ஏம்ப்பா! இந்த தமிழ் பேசற ஹீரோயின்கள் எல்லாம் எங்கே போயிட்டாங்க? ஒண்ணு ரெண்டு பாட்டு கேட்க நல்லாவே இருக்கு. 

பத்துக்கு ஆறே முக்கால் . 

கதை திரைக்கதை வசனம் இயக்கம் 

image

வித்தியாசமா எடுக்கணும்னு முடிவு பண்ணி எடுத்த இந்தப் படத்தை பார்த்திபன் நல்லாவே கொண்டு போயிருக்கிறார்.எல்லாத்தையும் தலை மேல் போட்டுக்கிட்டு  நடிப்பில் கொஞ்சம் கோட்டை விட்டிருக்கிறார். அருமையான முயற்சி. 

பத்துக்கு ஏழு.

காவியத் தலைவன் 

image

நல்ல தரமான காலப் பின்னணி . நல்ல திறமையான நடிகர்கள்.சூப்பரான ரஹ்மானின் இசை. கண்ணைக் கவரும் உடைகள். அருமையான ஒளிப்பதிவு. இத்தனை ‘நல்ல’ க்கள் நிறைய இருந்தும் படம் பார்த்துவிட்டு வெளியில் வரும் போது நல்லா  இருந்ததா என்றால் இல்லை என்று தான் சொல்லவேண்டும். ஏன் ? டைரக்டரைக் கேட்க வேண்டிய கேள்வி.     கதையோட கருவும் 1930 வருட நாடகப் பின்னணியும்  சரியா ஒட்டவில்லை. 

பத்துக்கு ஏழேகால்    

தெகிடி:

image

புதுமைச் சரக்குடன் விறுவிறுப்பையும் சரியா கலந்து கொடுத்திருக்கிறார்கள். முக்கியக் கதா பாத்திரங்கள் நன்றாகவே நடித்திருக்கிறார்கள். ‘விண்மீன் விழியில்’ பாட்டும் எடுத்த விதமும் ரொம்ப நாளைக்குப் பிறகு திரும்பிப்  பார்க்க வைக்கின்றன. எடிட்டர் கொஞ்சம் கத்திரி போட்டிருந்தால் இன்னும் நன்றாக இருந்திருக்கும் 

பத்துக்கு ஏழே முக்கால்.   

சதுரங்க வேட்டை: 

image

எடிட்டிங் என்றால் இந்தப் படத்தைப் பார்த்துத் தான் கத்துக்கணும் . திரைக்கதையும் வசனமும் காமெடியை அல்லாக்க  தூக்கிவிடுது. ஊ ழலைப் பற்றி மக்களுக்கு விழிப்புணர்வு வரணும் என்பதற்காக எடுத்த படம் இல்லை. ஆனால் அது இயல்பா மக்களுக்குப் போய்ச் சேர்வது தான் இதன் பெரிய வெற்றி. நடிப்பு இன்னும் கொஞ்சம் சிறப்பாக இருந்து க்ளைமாக்ஸ் இன்னும் கொஞ்சம் வித்தியாசமாக இருந்தா படம் எங்கேயோ போயிருக்கும். 

பத்துக்கு எட்டு.  

ஜிகிர்தண்டா: 

image

2014இல் டாப் படம் இது. இதுவரைக்கும் நாம் பாக்காத கதை /திரைக்கதை . டைரக்டர் கார்த்தி சுப்பராஜ்  சூப்பரா கலக்கிட்டீங்க! ஒரு ரவுடி படம் ‘மாஸ்’ படமாக மட்டுமில்லே ‘கிளாஸ்’ படமாகவும் இருக்க முடியும்னு நிரூபித்த படம்.அதே மாதிரி படத்தை சீரியஸா எடுத்து போகாம காமெடியில் காவடி கட்டினது ரொம்ப ரொம்ப சூப்பர். சாதாரண ரவுடியை  சினிமா களத்தைப் பார்த்து மியூசிக், லைட்டிங்க், ஒலிப்பதிவு எல்லாம் பிச்சு ஒதரவிட்டு பின்னாடி அவனோட தனி ஸ்டைலைக் கொண்டு வந்திருக்கிறார் டைரக்டர். அசால்ட்டா  திரிந்த ரவுடி சேதுவை ஒரு  முத்திரை ஹீரோவா மாத்தின விதம் இன்னும் பல வருஷம் கழிச்சுப் பார்த்தாலும் தமிழ்ப் படத்தின் திருப்புமுனையா  நிலைச்சு நிக்கும் .    

பத்துக்கு ஒன்பது.

பார்க்காமல் கேள்வி ஞானத்தை  மட்டும் வைத்து சொல்ல அனுமதித்தால், 


கோச்சடையான்  – பத்துக்கு மூணு. 
ரம்மி                        – பத்துக்கு நாலு 
முண்டாசுப்பட்டி  – பத்துக்கு  ஐந்து 
கப்பல்                      – பத்துக்கு ஐந்து 
பிசாசு:                     – பத்துக்கு ஆறு 
கயல்                      – பத்துக்கு ஆறரை  

 
மற்ற மாஸ் படங்கள் – ஜில்லா, வீரம், அஞ்சான் ,மான் கராத்தே, கத்தி இதுக்கெல்லாம் என்ன மார்க் போட்டாலும் ரசிகர்கள் மாலை போட்டு அபிஷேகம் செய்து பார்க்கத் தான் போறாங்க! 

2015இல் படம் எடுக்கும் நண்பர்களுக்கு ஒரு வேண்டுகோள்: 

– வித்தியாசமா எடுங்க!

– புத்திசாலி மக்களை ( அவர்கள் தான் மெஜாரிட்டி) கவர ரூம் போட்டு யோசிச்சுக் கதை எழுதுங்க!

– ஃபார்முலா 44 கதை வேணாமே!

– தமிழ்ப்  படத்தின் தரத்தைக் கொஞ்சம் முன்னுக்குக் கொண்டு வாங்க!

– பாத்திரங்களைப்   புதுப் பாணியில் செதுக்குங்க!

– பாலச்சந்தருக்கு அப்புறம் ஹீரோயின் படங்களையே காணோம். நல்ல தமிழ் பேசத்தெரிந்த ஹீரோயின்களை வைத்து ஹீரோயினை மையமாகக் கொண்ட படமும் எடுங்கள்! 

– விறுவிறுப்பா எடிட்டிங் பண்ணுங்க. 

–  ஒண்ணரை மணி நேரத்தில் படத்தை முடிங்க! 

– தேவையில்லாத  பாட்டு பைட் எல்லாம் வேணாங்க!

இதெல்லாம் சொல்லறது ஈஸி கண்ணா!  செஞ்சு பார்டா என்று சொல்றீங்களா! 

எங்க  ஆசையைச் சொல்லிப்புட்டோம். அப்பறம் உங்க விருப்பம்!! 

வாலண்டைன் தின ஸ்பெஷல் – ஒரு காதல் கானா 

பாடலைக் கேட்க  மேலே கிளிக் செய்யவும் 

image

காலேஜ் வாசல் டீ கடையில நின்னு
காத்துக் கெடந்து தினமும் தின்னு பன்னு
காதல் வந்து மனசு எல்லாம் மண்ணு
ஒரு லுக் விட மாட்டியா நீ  கண்ணு

ராசாத்தி கண்ணு ராசாத்தி கண்ணு திரும்பிப்  பாரம்மா
இல்லே நானும் தேடி போக வேணும் டாஸ்மாக் பாரம்மா

போன மாதம் கிழமை வெள்ளி
பாத்து  இருந்தேன் எந்தன் ஜோலி
தலை நெறைய வாசனை மல்லி
கடைக்கு வந்தா  ஸ்கூட்டியை தள்ளி

அவ  டயறு மட்டும் ஆக வில்லை பஞ்சர்
என் ஹார்ட் டியூபு வீக் ஆகி டார்ச்சர்

ராசாத்தி கண்ணு ராசாத்தி கண்ணு திரும்பிப்  பாரம்மா
இல்லே நானும் தேடி போக வேணும் டாஸ்மாக் பாரம்மா

உன் அண்ணன்கிட்டே வாங்கி மொத்து
ஆக மாட்டேன்  காதல் பரத்து
ஜெய்ப்பேன் நீ என் காதல் சொத்து
நான் சூரியவம்ஸம் சரத்து

அட வாங்கித் தாறேன் கோல்டு பேங்கிலு செயினு
வில் யு பி மை ஸ்வீட்டு வேலன்டைனு

ராசாத்தி கண்ணு ராசாத்தி கண்ணு திரும்பிப்  பாரம்மா
இல்லே நானும் தேடி போக வேணும் டாஸ்மாக் பாரம்மா


காலேஜ் வாசலில் காத்து கெடக்கும் ஆளு
என் ஹீரோ நீயி, நான்தான் உன்னோட கேர்ளு
அப்பன் கிட்டே வந்து பொண்ணு கேளு – நீ 
தாலி கட்டு, பார்த்து முகூர்த்த நாளு

ராசாத்தி கண்ணு ராசாத்தி கண்ணு லவ்வு பண்ணிட்டேன்
என் ராசா உந்தன் வேலன்டைனு நானும் ஆகிட்டேன்

image

ஐ  – ஒரு அனாடமி  (ராசாத்தி கண்ணு )

‘ஐ’ என்றால் அது ஐந்து என்றால்
அதன் விமர்சனமும் ஐந்து பரிணாமத்தில் …

image

1. இது ஒரு ஷங்கர் படம்


ஷங்கர் படம் என்றாலே சிலவற்றை எதிர்பார்க்கலாம்.அந்த Checklist வைத்து இந்தப் படத்தைப் பார்ப்போம்
அளவில்லாத பிரம்மாண்ட பட்ஜெட்             -செக்
ஹிட் ஹைடெக் பாடல்கள்                              -செக்
சூப்பர் சினிமாட்டோக்ராஃபி                              -செக்
இதுவரை பார்த்திராத இடங்கள்                      -செக்
புதுமையான சண்டைக் காட்சிகள்                  -செக்
பானைப்பாட்டு , பூக்கள் நிறைந்ததே பாட்டு   -செக்
ஒன்றுக்கு மேற்பட்ட வில்லன்கள்                  -செக்
கொடூரமாகப் பழி வாங்கும் படலம்                -செக்
வலுவான கதை, திரைக்கதை                           – sorry மிஸ்ஸிங்


2. கதை, திரைக்கதை, நடிகர்கள்


பொதுவாக ஒரு பெரிய நாட்டளவுப் பிரச்சினையை ஷங்கர் தீர்த்து வைப்பார். ஆனால் இதில் ஒரு தனிமனிதன் பிரச்சினையைக் கையாண்டிருக்கிறார்.


ஒரு பாடி பில்டரின் புதுமையான கதை.அவரின் மிஸ்ட ர் இந்தியா கனவு, அதற்காக உடம்பை தயார் செய்யும் முயற்சிகள் எல்லாம் காட்டி இருக்கிறார். 
ஆனால் அவர்களின் சக்தி,முதலீடு எல்லாம் அந்த கட்டு மஸ்தான உடம்பு தான் என்பதை இன்னும் கொஞ்சம் மனதில் நிற்கும்படியாகக் காட்டியிருக்கலாம்.


ஹீரோவின் உருவம் மாறுவது ஒரு முக்கியமான கட்டம். அந்த காட்சிகளில் இன்னும் கொஞ்சம் நேரம் செலவழித்திருந்தால் பார்ப்பவரின் மனதைத் தொட்டிருக்கும். அங்கே டைரக்டர் கோட்டை விட்டுவிட்டார்.


மேலும் முன்னும் பின்னுமாக நகரும் திரைக்கதையால், முதலிலிலேயே மாறுபட்ட ஹீரோவை பார்த்ததால், அந்த மாற்றம் தரும் பஞ்ச் மிஸ் ஆகிறது.


ஷங்கரின் எல்லா படங்களிலுமே ஒன்றிரண்டு நெகிழ வைக்கும் டைலாக் ,காட்சி வரும். இதிலும் இருக்கு – , சந்தானத்தின் கண்ணிலேயே கண்ணீர் வரும் அளவுக்கு. ஆனால் நம்மால் ஏனோ ரசிக்க முடியவில்லை.


அடுத்தது இது தான் நடக்கும் என்றும், இவர் தான் முக்கிய வில்லன் என்றும் எல்லோராலும் எளிதாக யூகிக்க முடியும் என்று ஷங்கரால் ஏனோ யூகிக்க முடியவில்லை.  எல்லோருக்கும் எளிதாக புரிந்த வில்லன்களின் சதித் திட்டத்தை, 80 களில் வரும் படம் போலே, அவர்களே விரிவாக விளக்குவது சற்று எரிச்சலைத் தருகிறது.

image


ஹீரோயின் ஒரு பெரிய பிளஸ் பாயிண்ட் தான். ஒரு மாடலாக வருவதால், பல விதமான, குறைவான உடைகளில் வந்தாலும், கண்ணுக்கு உறுத்தாமல் அழகாக இருக்கிறார். தமிழர்களின் மனதில் கவர்ச்சிக் கன்னி கோடி லைக்ஸ் வாங்குவார் என்பதில் ஆச்சர்யம் இல்லை. சில இடங்களில் நடிக்கவும் செய்திருக்கிறார்.


காமெடிக்கு சந்தானம்.  முன் பாதியில் பல இடங்களில் சிரிக்க வைக்கிறார்.  ஆனால் பின்பகுதியில் சீரியஸ் டைமில் காமெடி கொஞ்சம் ஓவரா தான் இருக்கு.  பவர் ஸ்டாரும் சில இடங்களில் வந்து, விழுந்து விழுந்துச்  சிரிக்க வைக்காவிட்டாலும் , சில ஸ்மைல்களை அள்ளிச் செல்கிறார்.


வில்லன்களில் சில பேர் அனாவசியம். சண்டைக் காட்சிகள், சினிமாட்டோக்ராஃபி மற்றும் காட்சி இடங்கள் மிக பிரமாதம். ஒவ்வொரு ஷாட்டையும் பார்க்கப் பார்க்க அழகு.  காமிராமேனுக்கு ஒரு தனி ஷொட் டு. அடுத்த வெகேஷன் எல்லோரும் சீனா லொகேஷன் போனால் ஆச்சரியம்  இல்லை !.


புதுமையாக இருக்க வேண்டும் என்பதற்காக புது வகையான சதி மற்றும் பழி வாங்கும் யுக்திகள் என்று டைரக்டர் காட்டி இருக்கிறார். ஆனால் முகம் சுளிக்கும் வகையில்  கொடூரமாக இருக்க வேண்டுமா  என்பது யோசிக்க வேண்டிய விஷயம் .


3. இசை, பாடல்கள்


ரஹ்மானின் இசை இதில் கொ டி கட்டிப் பறக்கிறது.  தலைவர் படத்தில் சற்று கோட்டை விட்ட ரஹ்மான் இதில் விட்ட இடத்தைப்  பிடித்திருக்கிறார்.


ஏற்கனவே பாடல்களெல்லாம் மெகா ஹிட். இசை மற்றும் பாடியவர் குரல் கேட்டு எல்லோரும் மெரசலாயிட்டோம். பாடல்களை படம் ஆக்கிய விதமும் அபாரம். 


4. ஐ என்றால்?


தமிழிலே ‘ஐ’ என்கிற சொல்லுக்கு அர்த்தங்கள் பல. அதை ஒரு பாட்டுலே மதன் கார்கி ரொம்ப ரொம்ப ஐ(ஹை) யாக சொல்லி இருக்கிறார்

“ ஐ என்றால் அது அழகு என்றால் அந்த ஐ களின் ஐ அவள் தானா ?”

“ ஐ என்றால் அது தலைவன் என்றால் அந்த ஐ களின் ஐ அவன் நீயா?”

கதையைப் பொறுத்தவரை ‘ஐ’ இரண்டு இடத்துலே முக்கியமா வருது.

 ஹீரோ ஹீரோயின் லவ் பண்ணுவதற்குக் காரணம் – ஐ (ஒரு பெர்ஃப்யூம்) 

அதே மாதிரி வில்லன் ஹீரோவை அட்டாக் பண்ணுவதும் – ஐ (ஒரு வைரஸ்)


5. அதற்கும் மேலே ‘I’ என்றால் ‘நான்’ என்கிறார் விக்ரம்

image

சினிமாத் துறையில் விக்ரமின் அர்ப்பணிப்புப் பற்றி எல்லோரும் அறிந்தது தான். ஒரு படத்தில் ஒரு கெட்டப்பில் வந்தால், அடுத்த படத்தில் வேற கெ ட்டப்புக்குக் கடுமையா உழைக்கும் ஒரு நேர்மையான நடிகர் . ஆனால் இந்த படத்தில் அதற்கும் மேலே  ஒரே படத்தில் மூன்று விதமான கெட்டப்பில் வருகிறார். 


விக்ரம் in ஐ என்பதை விட இது விக்ரமின் ஐ 


முதலில் ஒரு பாடி பில்டர் – இதற்காக நல்ல கட்டு மஸ்தான உடம்பை தயார் செய்திருக்கிறார். மிஸ்டர் இந்தியா போட்டிக்காக எண்ணை தடவிய உடம்போடு  போஸ் குடுக்கும் விக்ரமின் உழைப்பை நன்றாகப் பாராட்ட வேண்டும். 


அடுத்து ஒரு ஹேண்ட்ஸம் மாடல் – மோதலில் லுக் மாறுவது, பிறகு பாடி லாங்குவேஜ் என்று நம்பும்படியாக இருக்கிறது. இங்கு டைரக்டருக்கும் பாராட்டுகள் சொல்ல வேண்டும். 

ஹீரோயின் அவரை காதலிக்கிறேன் என்று சொல்லும் போது, கூல் மாடல் லுக்குடன், அப்பாவியாக சென்னை தமிழில் “லிங்கேசா நம்பாதே நம்பாதே ” என்று ஓடும் காட்சி அருமை. பூக்களே,ஆய்லா பாட்டில் அவரைப் பார்த்து, அவர் நடிக்க வந்து 10 ஆண்டுகள் கழித்து பிறந்த பெண்கள் கூட, தங்கள் பாய்ஃப்ரெண்ட் இவர் போல் இருக்க வேண்டும் என்று சொல்லும்படி வைத்து விட்டார்.


கடைசியாக கூனன் – இதற்காக மேக்கப் மட்டும் போதுமென்று இல்லாமல் எடையைக் குறைத்து, அந்த பாத்திரத்துக்கு ஏற்றபடி தன்னையே உருமாற்றி இருக்கிறார்.


அதனால் விக்ரமின் நடிப்பு, உழைப்பு, body builder physique, ஹேண்ட்ஸம்  லுக், கூனிக்  குறுகிய கோலம் எல்லாம் காண கண்டிப்பாக ஐ பார்க்கலாம்.


ஆனால் கதை, திரைக்கதை என்று பார்த்தால்     ??

image


ஆகமொத்தம் இந்த ‘i’ ஃபிசிக்ஸ்ஸில் வரும் கரண்ட்டாக இல்லாமல் கணிதத்தில் வரும் கற்பனையாகத் தான் இருக்கிறது.

படத்தைப் போலவே இந்த விமர்சனமும் நீ…..ண்டு  விட்டது!