குவிகம் இலக்கிய வாசலின் இரண்டாவது நிகழ்ச்சி இம்மாதம் 23 ஆம் தேதி. சனிக்கிழமை அன்று மாலை   6.30   மணிக்கு                 

 "நான் ரசித்த தி. ஜானகிராமன்" 

என்னும் தலைப்பில் கலந்துரையாடலாக நடைபெறவிருக்கிறது.

இடம்: பனுவல் புத்தக நிலையம், எண். 112, திருவள்ளுவர் சாலை, திருவான்மியூர் சென்னை  600041 (திருவான்மியூர் சிக்னல் – திருவான்மியூர் பேருந்து நிலையம் வழியில் BOMBAY DYEING SHOW ROOM அருகில் )

நிகழ்ச்சி கலந்துரையாடலாக வடிவமைக்கப்படுவதால், விருப்பமுள்ளவர்கள் தாங்கள் ரசித்த ஒரு படைப்பைப் பற்றி ஐந்து நிமிடங்களுக்கு மிகாமல் எல்லோருடனும் பகிர்ந்துகொள்ளலாம்.

நிகழ்ச்சியை ஒருங்கிணைக்க வசதியாக, பேசவிருக்கும் படைப்பின் தலைப்பை (மூன்று தலைப்புகள் குறிப்பிடவும்) மின்னஞ்சல் மூலம் முன்பாகவே தெரிவிக்கவும்,

பலர் ஒரே ரசிப்பைப் பற்றிப் பேசுவதைத் தவிiர்க்கவே இந்த முன்னேற்பாடு.! 

தங்களுக்கு அளிக்கப்படும் தலைப்பு  முன்னதாகவே தெரிவிக்கப்படும்.

தங்கள் இலக்கிய நண்பர்களுடன் இந்நிகழ்ச்சியில் கலந்துகொண்டு சிறப்பிக்க வேண்டுகிறோம்.

அன்புடன் சுந்தரராஜன் – கிருபானந்தன்

– குவிகம் இலக்கிய வாசல்

 மினனஞ்சல் :     ilakkiyavaasal@gmail.com

பக்கம் – 2

தில்லானா மோகனாம்பாள் -வாஷிங்டனில் திருமணம் ,துப்பறியும் சாம்பு கதைகளுக்கு உருவம் கொடுத்து உயிரைக் கொடுத்தவர் கோபுலு அவர்கள். ஏப்ரல் 30ந் தேதி நம்மை விட்டுப் பிரிந்துவிட்டார். 

தில்லானா மோகனாம்பாள்: 

துப்பறியும் சாம்பு: 

வாஷிங்டனில் திருமணம்:  

விளக்கெண்ணை குடிக்க வைக்கும்  காட்சி: 

ஸ்டேஷனில் ரயில் வருமுன் பிளாட்பாரக் காட்சி! 

தஞ்சையில் பிறந்து தஞ்சை கலாசாரத்தில் திளைத்தவர். ஆனந்த விகடனின் சிறந்த கார்ட்டூனிஸ்ட்டான மாலி அவர்களின் தாக்கத்தால் ஈர்க்கப்பட்டு விகடனில் பல ஆண்டுகள் பணியாற்றியவர். . கதைகள், கார்ட்டூன், துணுக்கு, சிரிப்பு இவற்றிற்கெல்லாம் அவர் வரைந்தது அவரின் தனித் தன்மையைப் படம் பிடித்துக் காட்டியது.  

கலைமாமணி பட்டம் பெற்றவர். 

சித்ர கலாரத்னா விருது, எம் ஏ சிதம்பரம் செட்டியார் பரிசு, முரசொலி பரிசு என்று பல விருதுகளைப் பெற்றவர். அதற்குத் தகுதியானவரும் கூட. 

கோபுலு அவர்களின் சிறப்புக்களைப் பாராட்ட  ஒரு அழகான கூட்டம், ஓவியர்கள் மணியம்  செல்வன், நாகராஜன்,  மாருதி, ட்ராட்ஸ்கி மருது, எழுத்தாளர் மாலன்,  ஜீவ சுந்தரி ( பெண் இனி பத்திரிகை   ஆசிரியர் ),சுபாஷினி   பங்குபெற திருவான்மியூர்  பனுவல் புத்தகாலயத்தில்  நடைபெற்றது. அதில் கேட்ட முத்துக்கள்:

– கோபுலு இரண்டு கையாலும் படம் வரைவாராம். அதுவும் ஸ்ட்ரோக் வந்து வலது கை முடியாமல் போன போது இடது கையால் வரைந்தாராம்.(ஸ்ட்ரோக் போடும் எனக்கே ஸ்ட்ரோக்கா? )

– சாவி -கோபுலு கூட்டணி ,( இங்கே போயிருக்கிறீர்களா?)  ஜெயகாந்தன் – கோபுலு கூட்டணி  (பாரிசுக்குப் போ , சில நேரங்களில் சில மனிதர்கள்,) கலக்கியதாம்.

– 20,000 க்கும் மேற்பட்ட ஜோக்குகளுக்குப் படம் வரைந்திருக்கிறாம்.  

அழும் உலகத்திற்குச்  சிரிப்பைப் பரிசாகத் தருவது தான் அவரது சித்தாந்தம் 

அவரது குடும்பத்திற்கு குவிகத்தின் அஞ்சலி!! 

.

பக்கம் – 4 

ஒரு ஊரிலே இருந்த வீடு ஆறு வீடு 

ஆறு  வீடும் பாழும் வீடு 

அதிலொரு வீட்டுக்கு ஓலையில்ல 

ஓலையில்லா வீட்டில் தான் 

இருந்த பெண்கள் ஆறு பெண்கள் 

ஆறு பெண்கள் பாழும் பெண்கள் 

அதிலொரு பெண்ணுக்குக்  காதே  இல்ல

காதில்லாப் பெண்ணுக்குத் தான் 

செய்த கம்மல் ஆறு கம்மல் 

ஆறு கம்மலும் பாழும் கம்மல் 

அதிலொரு கம்மலுக்குக்

கல்லே இல்ல 

கல்லில்லாக் கம்மலைத் தான் 

செய்த தட்டான் ஆறு தட்டான் 

ஆறு தட்டானும் பாழும் தட்டான் 

அதிலொரு தட்டானுக்குக்

கையே இல்ல 

கையில்லாத  தட்டானுக்கு  

கொடுத்த பணம் ஆறு பணம் 

ஆறு பணமும் பாழும் பணம் 

அதிலொரு  பணத்துக்கு அச்சே இல்ல 

கேட்டதெல்லாம் கட்டுக் கதை 

கட்டுக் கதையைக் கேட்டுக்கிட்டு 

திட்டம் போட்டு வீடு செல்வோம்! 

(எழுதியது: யாரோ) 

பக்கம் –  5 

படம் : நன்றி ; NDTV 

சொத்துக் குவிப்பு வழக்கில்  ஜெயலலிதா மற்றும் சசிகலா ,சுதாகரன்,இளவரசி உட்பட நால்வரையும்  விடுதலை செய்து கர்நாடக உயர்நீதிமன்றம் தீர்ப்பளித்தது.

அவருக்கு விதிக்கப்பட்டிருந்த அபராதத்  தொகையும் ரத்து செய்யப்பட்டுள்ளது. 

இதன்படி நீதிபதி குன்ஃகா வழங்கிய தீர்ப்பு தள்ளுபடி செய்யப்பட்டு விட்டது.  

 இருந்தபோதும் இதே வழக்கில் மேல்முறையீடு செய்யவும் அனுமதி வழங்கி உள்ளது.

அ.இ.அ. திமுகவின் தொண்டர்கள் இந்தத் தீர்ப்பை வரவேற்று இனிப்பு வழங்கி, பட்டாஸ் கொளுத்தி உற்சாகமாகக்  கொண்டாடி வருகிறார்கள்.

செல்வி ஜெயலலிதா: 

இந்தத்  தீர்ப்பு மனநிறைவை தருகிறது. என் மீது சுமத்தப்பட்ட அவதூறைத் துடைத்த தீர்ப்பு. அரசியல் எதிரிகள் என் மீது சுமத்திய பழியை துடைத்திட்ட தீர்ப்பு. நான் எந்தத் தவறும் செய்யாதவர் என்பதை இந்தத் தீர்ப்பு உறுதி செய்துள்ளது. புடம் போட்ட தங்கமாக நான் மீள இந்தத் தீர்ப்பு வழிவகை செய்துள்ளது 

தமிழிசை சௌந்தரராஜன் (பி.ஜே.பி ) 

நாங்கள் சட்டத்தை மதிக்கிறோம். இந்தத் தீர்ப்பை மதிக்கிறோம்.  

 தமிழ் மாநில காங்கிரஸ் தலைவர் ஜி.கே.வாசன்

 நீதிமன்றத்தின் தீர்ப்பை மதிக்கிறோம். தீர்ப்பை தீர்ப்பாக மட்டுமே பார்க்க வேண்டும். தீர்ப்பை அரசியலாக்கக் கூடாது

சுப்பிரமணியசாமி “அதிர்ச்சி”! மேல்முறையீடு செய்யப்போவதாகத் தகவல்! .

“இது இறுதித்தீர்ப்பல்ல”-கருணாநிதி

இது ஜனநாயகத்துக்கும் நீதிக்கும் கிடைத்த இழப்பு! – பா.மு.க. ராமதாஸ் 

நீதிபதி குமாரசாமியின் கணக்கில் தவறு இருக்கிறது. அதனால் மேல்முறையீடு செய்யவேண்டும் என்று பப்ளிக் பிராசிக்யூடர் ஆச்சார்யா கூறினார். 

கர்நாடக அரசு,  தீர்ப்பின் முழு விவரங்களையும் சட்ட நுணுக்கங்களையும் பரிசீலினை செய்த பிறகு மேல்முறையீட்டைப் பற்றித் தீர்மானிக்கப் படும் என்று கூறுகிறது. 

மே  10 அன்னை தினம் மே  11 அம்மா தினம் – அது மட்டுமல்ல  MUMMY RETURNS  – நெட்டில் சுட்டது!

பக்கம் – 7 

கொட்டடி கொட்டடி தாழம்பூ!

குனிஞ்சு கொட்டடி தாழம்பூ

 பந்தலிலே பாவக்கா

தொங்குதடி ஏலக்கா 

பய்யன் வருவான் பாத்துக்கோ 

பணம் கொடுப்பான் வாங்கிக்கோ 

சுருக்குப் பையில் போட்டுக்கோ 

வீராப் பட்டணம் போகலாம் 

வெள்ள இட்டிலி வாங்கலாம் 

சவுக்குத் தோப்பு போகலாம் 

சமச்சு வைச்சுத் தின்னலாம் 

புளிய மரத்துப் போகலாம் 

புளியங்கொட்டை பொறுக்கலாம் 

பனைமரத்துக்குப் போகலாம் 

பல்லாங்குழி ஆடலாம் 

(எழுதியது  யார் என்பது தெரியவில்லை) 

பக்கம் – 8 

டாக்டர்! நீங்க கொடுத்த சிரப்  சிறப்பு! எப்படி என் ஜோக்?

செருப்பு பிஞ்சிடும்! இது கி.வா .ஜ. அவர்களின் ஜோக்.

டாக்டர் ! எனக்கு அறிவு சுத்தமா இல்லாத மாதிரி தோணுது!

எப்பொழுதிலிருந்து இப்படி தோணுது?

விஸ்டம் டூத்தை எடுத்ததிலிருந்து!

டாக்டர்! என்கால்ல  ஆபரேஷன் பண்ணும் போது கால் வலிச்சா என்ன பண்ணுவீங்க?

சேர்ல உட்கார்ந்துகிட்டு ஆபரேஷன் பண்ணுவோம்!

காக்கா முட்டை படத்துக்கு தேசியவிருது வழங்கப்படும் போது கக்கா மூட்டை என்று சொன்னார்களாம்!

பக்கம் –  9 

தொங்குகின்ற தூளியிலே தூங்குகின்ற பாப்பாவே 

தொங்குகின்ற  நிலைதானே யுனையீன்ற பெற்றோர்க்கும் 

மண்ணுலகில் நடக்கின்ற சொல்லவொணா அவலங்கள் 

கண்டுகண்டு வெதும்பியவர்  தூங்கியே நாளாச்சு! 

இவ்வுலகில் நாமெல்லாம் இருப்பதுவோ சிலகாலம் 

இவ்வுண்மை புரிந்திருந்தும் பாரிந்த அலங்கோலம் 

நான்பெரிது நீபெரிதென பணப்பேயு மாட்டிடவே 

சண்டையிலே கழிக்கின்றோம் வாழ்க்கையிலே பெரும்பகுதி

கடவுளெலா   மொன்றெனவே நன்றாகத் தெரிந்தாலும் 

மதச்சண்டை ஜுவாலைகள் குழப்பங்கள் குமுறல்கள் 

ஜாதிபேத மிலையென்று எத்தனைதான் சொன்னாலும் 

ஜாதிகள்  பெயராலே பலப்பல  கட்சியிங்கு   

மக்களா இலையிவ  ரறிவற்ற மாக்களா 

துக்கமான மனதினிலே துளிர்விடும் சந்தேகம் 

இதையெலா முணர்கின்ற பருவம்நீ யடையும்வரை 

மெதுவாக இப்போதே முடியும்வரை தூங்கிவிடு  

பக்கம் – 10 

ஆறு காசு எண்ணை வாங்கி ஏலாலம்பர ஏலு – நான் 

அதிரசம் சுட்டுவைச்சேன்

ஏலாலம்பர ஏலு 

மாமியாரு தொட்டிருந்தா

ஏலாலம்பர ஏலு 

மயிரப் பிடிச் சண்டை செய்வ

ஏலாலம்பர ஏலு

மூத்தாரு தொட்டிருந்தா

ஏலாலம்பர ஏலு 

மூக்கறுத்து நாயங் கேப்ப

ஏலாலம்பர ஏலு 

மச்சினன் தொட்டிருந்தா

ஏலாலம்பர ஏலு 

மண்டை ஓடச்சி சந்தா செய்வ

ஏலாலம்பர ஏலு 

நாத்தனாரு  தொட்டிருந்தா

ஏலாலம்பர ஏலு 

ஓதட்ட அறுத்து நயம் கேட்ப 

மாமனாரு  தொட்டிருந்தா 

மண்டை ஓடைச்சி சந்தா செய்வ 

ஆம்படையான்  தொட்டிருந்தா 

ஆளும் பொருத்தாச்சே 

(வல்லியம்மாள் பாடியது )

பக்கம் – 11 

கங்கா ஸ்நானம் 

சின்னசாமியின் அக்கா சாகும்போது தான்  வாங்கின கடனை அடைக்கச் சொல்லி புருஷனின் நிலத்தை வித்து நாலாயிரம் ரூபாயை  அவனிடம் கொடுக்கிறாள். மூவாயிரத்து சொச்சம் கடன். பாக்கியை அவன் காசிக்குப் போக உபயோகித்துக்கோ என்ற கட்டளை வேற. 

சின்னசாமியும் பணத்தை  எடுத்துக்கிட்டு துரையப்பாவின் வீட்டுக்குப் போகிறான். ராத்திரி ஆனதால் காலையில் வரவு வச்சுக்கலாம் என்று சொல்கிறார். பணத்தை அவரிடம் கொடுத்துவிட்டு அவரின் உபசரிப்பில் நிம்மதியாகத் தூங்கினான். காலையில் வரவு வைக்கும் போது ‘அவர் பணத்தை எடு ’ என்றதும் அவனுக்குத் தூக்கிவாரிப் போட்டது. முதல் நாள் வாங்கி வைத்ததை மறந்துவிட்டாரா அல்லது விளையாடுகிறாரா? கடைசியில் அவர் வாங்கவே இல்லை என்று சாதித்துவிட்டார். பஞ்சாயத்து கோர்ட்டு என்று பலவாறு முயற்சித்தான் சின்னசாமி. ஊர்ப் பெரியவர் துரையப்பவாவை ஒண்ணும் செய்ய முடியவில்லை. கடைசியில் கடனோ கிடனோ வாங்கி அந்தக் கடனை மறுபடியும் அடைத்தான். 

அக்கா ஆசைப்படி சின்னசாமியும் அவன் மனைவியும் காசிக்குப்  போகிறார்கள். ஒரு வாத்தியார் வீட்டில் தங்கியிருக்கிறார்கள். அவர்கள்  கங்கையில் குளிக்கும் போது கேள்விப்படுகிறார்கள் அந்த துரையப்பாவும் காசிக்கு வந்து அவர்கள் தங்கியிருக்கும் அதே வாத்தியார் வீட்டில் தங்கியிருக்கிறார் என்று. 

திரும்ப அவன் முகத்தில் முழிப்பதா? அவன் பாவத்துக்கும் சேர்த்து கங்கையில் முழுக்குப் போட்டுவிட்டு அவன் அங்கே இருந்தால் வேறு ஜாகைக்குப் போக வேண்டும் என்று முடிவு கட்டுகிறார்கள்.

பக்கம் – 12 

பத்திரகிரியார் உண்மையில் ஒரு அரசர். பட்டினத்தாரின் பெருமைகளைக் கண்டு உணர்ந்து அவரது சீடராக திருவிடைமருதூர் கோவிலில் பிச்சைஎடுத்தவர். கிடைத்த உணவைக் குருவுக்குக் கொடுத்துத் தானும் உண்டு மீதியை ஒரு நாய்க்கும் கொடுப்பதை வழக்கமாகக் கொண்டவர். 

ஒருமுறை பட்டினத்தார் இவரைப் பற்றிச் சொல்லும் போது  "சோற்றுக்கட்டியையும் நாயையும் வைத்துக் கொண்டு சம்சாரியாக வாழ்கிறார்’“ என்று சொல்ல, பிச்சை எடுக்கும் திருவோட்டை நாயின்  தலையில் அடித்து அதற்கு முக்தி அளித்தார். அந்த நாய் ஒரு அரசகுமாரி வடிவில் வந்து அவரை மணந்து கொள்ள வேண்டியது.    ” எனக்கும்,  என் எச்சிலை உண்ட இவளுக்கும்  இந்தப் பிறவி நோய் வரலாமா “ என்று இறைவனை உருகி வேண்ட, ஒரு பெருஞ்சோதி வந்து இருவரையும் தன்னுள் ஒடுக்கி இருவருக்கும் முக்தி அளித்தது. 

அவர் குரு பட்டினத்தாருக்கு அதற்குப் பின்னரே முக்தி கிடைத்தது. 

இவரது  231 பாடல்கள்கள் அனைத்தும்  இரு வரிக் கண்ணிகள்.  எல்லாக் கண்ணிகளும் ‘எக்காலம்?’ என்ற கேள்வியுடன் முடியும். இந்த உலக மோக வாழ்வைத் துறந்து இறைவன் அடிசேரும் காலம் எக்காலம் என்றும், அந்தக் காலம்  விரைவில் வாராதா என்று ஏங்கும் சித்தர் தான் பத்திரகிரியார்.  

அவரது நெஞ்சுருக்கும்  கண்ணிகள் சிலவற்றைப் பார்போம்!

ஆங்காரம் உள்ளடக்கி ஐம்புலனைச் சுட்டறுத்துத்

தூங்காமல் தூங்கிச் சுகம் பெறுவது எக்காலம்?

கால் காட்டி கைகாட்டி கண்கள் முகம் காட்டி 

மால் காட்டும் மங்கையரை மறந்து இருப்பது எக்காலம்?

வெட்டுண்ட  புண்போல்  விரிந்த அல்குல் பைதனிலே 

தட்டுண்டு நிற்கை தவிர்வதுவும் 

ஆறாத புண்ணில் அழுந்திக் கிடக்காமல் 

தேறாத சிந்தனையைத்  தேற்றுவதும் எக்காலம்? 

தந்தை தாய் மக்கள் சகோதரரும் பொய்யெனவே

சிந்தை தனில் கண்டு திருக்கறுப்பது

எக்காலம்? 

தித்திக்கும் தெள்ளமிதைச் சித்தாந்தத்து உட்பொருளில் 

முத்திக்கு வித்தை முதல் நினைப்பது

எக்காலம்? 

மூல நெருப்பை விட்டு மூட்டி நிலா மண்டபத்தில் 

பாலை இறக்கி உண்டு பசி ஒழிவது

எக்காலம்? 

கல்லாய் மரமாய்க் கயலாய்ப்  பறவைகளாய்ப்

புல்லாய்ப் பிறந்த சென்மம் போதும் என்பது

எக்காலம்? 

அல்லும்  பகலும் என்றன் அறிவை அறிவால்  அறிந்து 

சொல்லும் உரை மறந்து தூங்குவதும் 

கருக்கொண்ட முட்டைதனை கடலாமை தான் நினைக்க 

உருக்கொண்ட வாறது போல் உனை அடைவது 

பிறப்பும் இறப்பும் சுற்றுப் பேச்சும் அற்று 

மறப்பும் நினைப்பும் அற்று மாண்டிருப்பது 

சித்தர்கள்  நம் நாட்டின் பொக்கிஷங்கள்!!

பக்கம் – 13 

வீட்டு மேல யாருன்னு கேட்டுக்கிட்டு வந்தான் 

கோட்டு சூட்டு போடாமலே  ஊட்டுக்குள்ளே வந்தான் 

தாட்பூட் தஞ்சாவூர்னு தேட்டை போட வந்தான் 

இடுப்பு மேல கையைவைச்சுத்  துடுக்குத் தனமா கேட்டான் 

காட்டாமணி செடி ஓடச்சி தோட்டத்துக்கு வந்தான் 

பட்டனைப்  போடாமலே சட்டை போட்டு வந்தான் 

வெட்டுக் கத்தி எடுத்துக்கிட்டுத்   துட்டுப் பறிக்க வந்தான் 

வேட்டுச்  சத்தம் போட்டுக்கிட்டு ரோட்டுமேலே வந்தான் 

பாட்டு ஒண்ணு பாடிக்கிட்டு ரூட்டுப் போட வந்தான் 

ஆட்டுக்குட்டி  கத்தும் போது முட்டுக்குத்தி நின்னான் 

சட்டிப் பானை தயிரையும் சப்புக் கொட்டித் தின்னான் 

இட்டுக் கட்ன பாட்டையெல்லாம் கட்டக்  குரலில் சொன்னான் 

 கட்டி வைச்ச  சோத்தை எல்லாம்  வெட்டி வெட்டித் தின்னான் 

 ஈட்டிக்காரன் போலவந்து  வட்டி போட்டுத் தின்னான் 

 எட்டி எட்டி பாத்துக்கிட்டு வெட்டித்தனமா நின்னான் 

ஏட்டிக்குமேல் போட்டியாக பாட்டு படிச்சு நின்னான் 

ஓட்டிவிட்ட மாட்டைப் போல சீட்டி அடிச்சு வந்தான் 

கட்டை வண்டி ஓட்டிக்கிட்டு நெட்டப் பயலா  வந்தான் 

கூட்டுக்குள்ளே குடியிருக்க  சேட்டை பண்ண  வந்தான்

மேட்டுக் குடி பாட்டன் போல கிட்டக் கிட்ட வந்தான் 

கிட்டக்கிட்ட வந்து என்னைத் தொட்டுகிட்டு நின்னான் 

பொட்டப் பய போல அவனும் வெக்கம் கெட்டு நின்னான் 

 அட்டை போல ஒட்டிக்கிட்டு லூட்டியடிக்க வந்தான் 

கோட்டை செவரைத்  தாண்டி அவன்   ஆட்டைப் போட வந்தான் 

வேட்டு வைச்சப்  பாறைபோல மாட்டிக்கிட்டுத்  துடிச்சான் 

சாட்டை ஒண்ணை வச்சுக்கிட்டு மாட்டை ஓட்ட வந்தான்

பட்டா சிட்டா இல்லாமலே வீட்டைக் கட்ட வந்தான் 

சீட்டுக்கட்டு ராசா போல  ஆட்டிக்கிட்டு வந்தான் 

சிட்டுக்குருவி லேகியத்தைத்  தொட்டு நக்கி வந்தான் 

சுட்டுப்போட்ட மீனைப் போல சூட்டைக் கிளப்ப வந்தான் 

திட்டம் போட்ட பயபுள்ளே ஆட்டம் ஆட  வந்தான் 

சேட்டையெல்லாம் காட்டிவிட்டு மூட்டைகட்டிப் போனான்

பொட்டப் புள்ளை என்மனசைத் துடிக்க விட்டுப்   போனான்!  

பக்கம் – 14 

தமிழ்த்தாய் வாழ்த்துடன் நிகழ்ச்சி தொடங்கியது !

குவிகம் இலக்கிய வாசலை முனைவர் திருப்பூர் கிருஷ்ணன் திறந்துவைத்தார் !

‘இலக்கியமும் நகைச்சுவையும்’  என்ற தனது முதல் நிகழ்ச்சியை “குவிகம் இலக்கிய வாசல்” முனைவர்  திருப்பூர் கிருஷ்ணன் அவர்களின் சீரிய தலைமையின் கீழ் அரங்கேற்றியது !

தனிநபர் புகழ்ச்சியை புறந்தள்ளி தமிழ்இலக்கிய நிகழ்ச்சியை மட்டுமே  முன்னிறுத்தி  குவிகம் இலக்கியவாசல் செயல்படும் என நம்பிக்கைத் தெரிவித்தும் அமைப்பாளர்கள் .சுந்தரராசன், கிருபானந்தன் அவர்களின் முயற்சியை ஊக்குவித்தும்  பேசிய திருப்பூர் கிருஷ்ணன் தமிழ் இலக்கியங்களிலே புதைந்துகிடக்கும் நகைச்சுவை நயங்களைப்   பார்வையாளர்களுடன் பகிர்ந்து கொண்டார் 

சுந்தரராசன் அனைவரையும்வரவேற்றார் !

கிருபானந்தன் நன்றி நவில தேசிய கீதத்துடன் நிகழ்ச்சி இனிதே நிறைவுற்றது !

பக்கம் – 15 

வாலி அவர்களின் நயமான பாடல் வரிகள் இவை. இந்தப் பாடல்களின் முதல் வரியையும் இடம்பெற்ற திரைப் படத்தையும் கண்டுபிடியுங்கள்!!

விடை  25ஆம் பக்கத்தில் 

1) பொன்மேனி  தேரசைய என்மேனி  தாங்கிவர

ஒன்றோடுஒன்றாய்க் கூடும்
காலமல்லவோ

நில்லென்று நாணம் சொல்ல
செல்லென்று ஆசை தள்ள 

நெஞ்சோடு நெஞ்சம் பாடும்
பாடல் சொல்லவோ? 

2) பல இடத்தில் பிறந்த நதிகள் 

ஒரு கடலில் வந்து சேரும் 

பல நிறத்தில் பூத்த மலர்கள் 

ஒரு மாலைபோல் உருமாறும் 

3) இதயம் என்றொரு ஏடெடுத்தேன்
-அதில் 

எத்தனையோ நான் எழுதிவைத்தேன் 

எழுதியதெல்லாம் உன்புகழ்
பாடும் 

எனக்கது போதும் வேறென்ன
வேண்டும் 

4) பாலூட்ட ஒரு பிள்ளை அழைக்கின்றது 

நான் படும்பாட்டை ஒருபிள்ளை
ரசிக்கின்றது

எனக்காக இரு நெஞ்சம் துடிக்கின்றது
 -இதில் 

யார் கேட்டு என்பாட்டை முடிக்கின்றது? 

5) பாசமென்றும் நேசமென்றும்
 வீடு என்றும் மனைவி என்றும் 

நூறு சொந்தம் வந்த பின்பும்
தேடுகின்ற அமைதி எங்கே 

6) ஆசையில் விளைந்த மாதுளங்
கனியோ

கனியிதழ் தேடும் காதலன்
கிளியோ  

உனக்கெனப் பிறந்தேன் உலகத்தை
மறந்தேன் 

உறவினில் வளர்ந்தேன் 

(இன்னும் வரும் )

பக்கம் – 16 

ச..சா.சி..

44. சக்கர நெறி நில் /  Honor your Lands Constitution.
45. சான்றோர் இனத்து இரு /  Associate with the noble.
46. சித்திரம் பேசேல் /  Stop being paradoxical.
47. சீர்மை மறவேல் /  Remember to be righteous.
48. சுளிக்கச் சொல்லேல் /  Don’t hurt others feelings.
49. சூது விரும்பேல் /  Don’t gamble.
50. செய்வன திருந்தச் செய் /  Action with perfection.
51. சேரிடம் அறிந்து சேர் /  Seek out good friends.
52. சையெனத் திரியேல் /  Avoid being insulted.
53. சொற் சோர்வு படேல் /  Don’t show fatigue in conversation.
54. சோம்பித் திரியேல் /  Don’t be a lazybones.

பக்கம் –  17 

அது என்ன பதினாறு?

பதினாறும் பெற்று பெருவாழ்வு வாழ்கவென 

வாழ்த்திவிட்டுபோனவரே 

அது என்ன பதினாறு

அதைச்  சொல்ல மாட்டீரோ !!

மணமக்கள் கேள்வியிது 

மகிழ்ச்சியுடன் பதில் சொல்ல

வேதாந்த மகரிஷியின் 

விளக்கமதை தெரிந்து கொள்வோம் !

இறையுணர்வும் , 

                அறநெறியும் 

                           கல்வியும்,

                                  செல்வமும்

                                         தானியமும் , 

                                               இளமையும் 

                                                   வலிமையும்,

                                                         துணிவும்,  

                                                        நன்மக்கட்பேறும்     

                                            அறிவில் உயர்ந்தோர் நட்பும் 

                                      அன்பும் , 

                             அகத்தவமும்

                         அழகும் , 

                   புகழும் 

            மனிதமதிப்பு நறுந்தொழுகும் பண்பும் 

  பொறையுடமை [பொறுமை]யும் 

                 எனும் பதினாறு பேறும் பெற்று 

போற்றலுக்கும் தூற்றலுக்கும் வாழ்த்துக்களே கூறி

மறைவிளக்கம் உயர் வாழ்வை மதித்து ஒழுக்கம் காத்து      

 மனையறத்தின் ஒளிவிளக்காய் வளம் ஓங்கி வாழ்க

இன்னொருவரின்  லிஸ்ட்!! 

அகிலமதில் நோயின்மை, கல்வி, தன, தானியம்,    

     அழகு, புகழ், அறம், வாழ்க்கைத் துணைநலம், இளமை,

அறிவு, சந்தானம், வலிவு, துணிவு, ஆண்மை, வெற்றி     

    ஆகும் நல்லூழ் விளக்கம் பதினாறும் பெறுவீர்.

சரி, அபிராம பட்டர்  அபிராமி அந்தாதியில் சொல்லும் பதினாறு பேறுகள்  என்னென்ன  தெரியுமா?

காளமேகப் புலவரின் தொகுப்பு என்னவோ?

துதிவாணி ,வீரம், விசயம், சந்தானம், துணிவு, தன,

மதிதானியம், செளபாக்கியம், போகம், அறிவு, அழகு

புதிதாம்பெருமை, அறம், குலம், நோவகல், பூண்வயது

பதினாறு பேறும் தருவாய் மதுரைப் பராபரனே.  

தேவநேயப் பாவாணர்  தமிழுக்குக் கிடைத்த பதினாறு பேற்றைப் பற்றி இப்படிக் குறிப்பிடுகிறார்!                                                              

இந்தக் கணினி உலகில் புதிய பதினாறு பேறு !

கலையாத மென்பொருளும், தளராத இணைய தளமும்,

கபடு வாராத கணினியும், உடையாத ஐபேடும்,

காசு தொலையாத கைபேசியும், பகிர்வு கேட்காத முகநூலும்,

சுற்றாமல் தொடரும் யூட்யூபும் ,ஸ்பேம் இல்லாத மின்னஞ்சலும்,

தொடர்ந்து வரும்  வைஃபையும்,ப்ரீயாய் வரும் ஆப்ஸும்,

 தனியே பேச ஹேன்ஸ்ப்ரீயும், கேட்பதைக் கொடுக்க  கூகிலும் , 

சா ட்செய்ய வாட்ஸ்அப்பும், எப்போதும் அனுப்ப  எஸ்‌எம்‌எஸ்சும் 

செல்ஃபி  எடுக்க  கேர்ள் பிரண்டும் 

அனைத்தையும் சார்ஜ் செய்ய மின்சாரமும் 

ஆகிய பதினாறும் பெற்று 

வாழ்வீர் நீவிர் மின்னணு உலகில்! 

பக்கம் – 18 

சொல்வனம் . ஓர் q அழகிய சிற்றிதழ் ! மாதமிருமுறை வெளிவரும் இணைய இதழ் !

இதுவரை 127 இதழ்கள் வந்துள்ளன. 

அவர்கள் குறிக்கோள்: 

கலைச் செல்வங்கள் யாவும் கொணர்ந்திங்கு சேர்ப்போம்!

படிக்க ருசிக்க இந்த இணைய தளத்துக்குச் செல்லவும் 

 http://solvanam.com/

சொல்வனத்தின் ஆசிரியர்களில் ஒருவரான ரவிசங்கர் அவர்களை ‘விருட்சம்’ இலக்கியக் கூட்டத்தில் உரையாடக் கேட்டோம். அவர் நடத்திய ‘பிரக்ஞை’ என்ற பத்திரிகையைப் பற்றி விவரமாகக் கூறினார். சொல்வனத்தைப் பற்றிக் குறிப்பிடும் போது உலகின் பல இடங்களிலிருந்து பலதரப்பட்ட கருத்துக்களைப் பரிமாறிக் கொண்டு மாத இருமுறை இதழாக வெளியிடுகிறோம் என்றார்.   

அரசியல் என்ற தலைப்பில் ஈராக்கில் ஜனநாயகம், பங்களாதேஷ் பயணம் ,  சிங்கப்பூர் லீ குவான் இயூ , குகை ஓவியங்கள், ஜப்பானில் இந்திய வணிகம் உலக வர்த்தக மாநாடு என்று எழுதுகிறார்கள்.

அறிவியல் என்ற தலைப்பில் மாயத் தோற்ற ஊக்கிகள், நோலாவின் இண்டர்ஸ்டெல்லார், இரு சுருள் வளைய சர்ச்சை,    இயற்கை விவசாயம், தூரயியங்கி,(டிரோன்கள் ),வீடியோ விளையாட்டுக்கள், ஆதி மானுட யோக முறைகள், எபோலா,  ஆயிரம் வருடங்கள் உயிர் வாழ்வது எப்படி என்று பல கோணத்தில் எழுதுகிறார்கள்.

இசை என்ற பகுதியில் இளையராஜாவின் ஷாமிதாப், டிசம்பர் சீசன் , ரஹ்மானின் திறமை, மன்னா டே,மாண்டலின் ஸ்ரீநிவாஸ்,  எஸ்.ஜானகியின் பத்மபூஷண் , இசை இல்லா இசை , கர்ணன் திரைப்படம், திமிறி நாயனம், காருக்குறிச்சி என்றெல்லாம் இசை மழை பொழிகிறார்கள். 

இலக்கியம் பகுதியில் அருமையான சிறுகதைகள்,கவிதைகள்  கிடாவெட்டு, ஸ்வப்னா வாசவத்தம், ஜெயகாந்தனுக்கு அஞ்சலி, காகங்கள் சுட்ட வடைகள், மொழிபெயர்ப்புக் கவிதைகள், கம்ப ராமாயணம் சித்திரங்கள்,  எஸ்.பொ , நாஞ்சில் நாதன் கவிதைகள், என்று எண்ணற்றவை

சமூகம் என்ற வலையில் புத்தக விமர்சனம், ஆண்-பெண் சிக்னல், பொறியியல் கல்விக்கு அப்பால், தஞ்சை விவசாயிகளின் சோகம், கூவம்- தாது வருஷப் பஞ்சத்தைப் போக்க வெட்டிய ஆறு, ஆபாச  விளையாட்டு, செயற்கைக் கருவூட்டல் ,ஊழல் ஒழிப்பு என்று பல முகங்கள். 

சுருக்கமாகச் சொன்னால்  

சொல்வனம் ஒரு  – விளம்பரப் பத்திரிகை அல்ல.விவரப் பத்திரிகை அல்ல. 

விளக்கப் பத்திரிகை ! .  

கருத்துப் பெட்டகம். !!

பக்கம் – 19 

எழுபதுகளின் இளைய தலைமுறை எழுத்தாளரான
இவர் சுஜாதா, சாவி மற்றும்
பலரால் சிறந்த படைப்பாளிகளில் ஒருவராக இனம் காணப்பட்டவர். சாவி இதழில் தமிழன் என்ற
பெயரில் கேள்வி-பதில் எழுதிக் கொண்டிருந்தவர். சாவி பத்திரிக்கைக்கு இவரும்
மாலனும் சேர்ந்து ஒரு இதழுக்கு ஆசிரியர்களாக  இருந்ததாக நினைவு.

இவரது பல கதைகளின் நாயகன், படித்த, பெரும்பாலும் வேலையற்ற அல்லது குறைந்த வரவில் வேலை பார்க்கும்
புத்திசாலியான தர்கரீதியாக அக்கால வாழ்க்கை நடைமுறைகளை எதிர்த்து வாதாடும் – (anti establishment)- இளைஞன் ஆக
இருப்பான். அதனால் அந்த காலகட்ட இளைஞர்கள் மிகவும் கவரப்பட்டார்கள் எனக் கூறலாம்.

இவரது “இன்று போய் ….” கதை
தன் அண்ணனைப்பற்றி தம்பியின் பார்வையில் சொல்லப்படுகிறது.

கல்யாணம் முடிந்து மனைவியுடன் வரும்
அண்ணாவைப் பற்றிய தம்பியின் கருத்தோடு கதை ஆரம்பிக்கிறது.

(வாழ்க்கையில்
எல்லாத்தையும் தோத்துட்டு, மன்னியை
மட்டும் கை பிடிச்சு அழைச்சுண்டு வந்த மாதிரி தோன்றியது)

கல்யாணத்திற்கு முன்பு இருந்த அண்ணா ..
தலை நிறைய முடி சிகரெட், எப்பவும்
ஏதாவதொரு புஸ்தகம்.

(ஆயிரம்
புஸ்தகமாவது படிச்சிருப்பான்)

வெளியில் கினம்பும்போதே தனக்குத் தெரிந்ததையெல்லாம்
இந்த உலகத்திற்கு எடுத்துச் சொல்ல நினைப்பது போலிருக்கும். மீட்டிங் எல்லாம்
பேசுவான். சமூகம், சினிமா, பத்திரிக்கை, இளைஞர்கள் எல்லாவற்றையும் தாக்குவதாக அவன் பேச்சு இருக்கும். கதையும்
எழுதுவான். இவன் கதையைப்பற்றி அம்மாவுடன் சண்டை. அப்பாவின் பூஜை ஸ்லோகம குறித்து
அவருடன் வாக்குவாதம்.

(உனக்குப்
புரியாத ஒரு மந்திரத்தை நீயும் சாமி, பூதம்னு இருபது வருஷமா சொல்லிக்கொண்டிருக்கியே.)

அண்ணா படிப்பை முடித்து இரண்டு வருடம்
ஆகியும் வேலை கிடைக்கவில்லை. அப்பாவும் ரிடையர் ஆகிவிடுகிறார். எல்லோரும் அவனுக்கு
வேலை கிடைப்பதை எதிர்பார்த்துக்கொண்டிருந்தார்கள்.

(அப்பா ரிடையராகி, சம்பளம் பென்ஷனாகி, ராத்திரியில் தயிர் மோராச்சு)

சகோதரியான சாந்திக்கு பி.யூ.சி. உடன்
படிப்பு நிறுத்தப்படுகிறது. சமயத்தில் சாந்தியின் கல்யாணத்திற்காக வைத்திருந்த
வெள்ளிப் பாத்திரங்களும் தங்க நகைகளும் அடகுக்கோ விலைக்கோ போகிறது.

இந்த சரிவுக்கெல்லாம் முன்பு, அதே தெருவிலிருக்கும் காயத்ரி என்ற
பெண் அண்ணாவால் ஈர்க்கப்படுகிறாள். தம்பி மூலமாக புத்தகம் வாங்குவதும் அதில் காதல்
கடிதம் வைத்து அனுப்புவதுமாக முயற்சி செய்கிறாள். அண்ணா கண்டுகொள்ளவே இல்லை. ஒரு
கடிதத்தையே தம்பி மூலம் கொடுத்து அனுப்புகிறாள்.

படித்துவிட்டு அலட்சியமாகச் சிரித்த
அண்ணா, தம்பியிடமே அவளைப் பார்க்கிற்கு
மாலையில் அழைத்து வரச் சொல்கிறான்.

பார்க்கில், தனக்கு அவளும், அவளுக்குத் தானும் லாயக்கில்லை என்றும், அவள்
எதிர்பார்ப்பது போன்ற கணவனாகத் தானிருக்க முடியாது என்றும் கூறிவிடுகிறான்.

(உன்னுடைய நடை, டிரெஸ் எல்லாமே, உனக்கு ஹெரால்ட் கார்
வெச்சுண்டிருக்கிற, தினம்
ஆபீசிலேந்து வந்த உடனே உன்னை ஷாப்பிங் அழைச்சுண்டுபோற, உன் சிரிப்புக்குத் தவம் கிடக்கிற, தன் கழுத்தில பட்டையைக் கட்டிண்டு உன் கையில் சங்கிலியைக் குடுத்துட்ட
ஒரு ஆம்பிளை தான் வேணும்! நீ அந்த மாதிரி டைப். நான் வேறு. நீ எதிர்பார்க்கிற
ஆளும் இல்லை நான். ஐ’ம்
சிம்பிள்!)

அண்ணாவிற்கு வேலை கிடைக்கவில்லை. இது
குடும்பத்தையே ஆட்டிவைக்கிறது. தெரு பூரா கடன். ஒருநாள் அடுத்த வேளை சாப்பாட்டிற்கே
இல்லை என்னும் நிலையும் வந்தது.

தானே முன்னுக்கு வந்த ஒரு பணக்காரர், தன் மகளுக்கு கஷ்டப்படுகிற
புத்திசாலியான கணவனைத் தேடிக்கொண்டிருப்பதாகவும், வேலையும் வாங்கிக்கொடுத்து தன் பெண்ணையும் தர விரும்புகிறார் என்று
அப்பாவின் நண்பர் கூறுகிறார்.

அண்ணா வழக்கம் போல வள் என்று
விழுகிறான்.

திடீரென்று ஒரு நாள் இரவு வீட்டுக்கு
வந்தவன் “நான் அந்தக் கல்யாணத்திற்கு சம்மதித்து
விட்டேன். நாளையிலிருந்து வேலைக்குப் போகிறேன்” என்கிறான்.

எல்லோருக்கும் அதிர்ச்சி, ஆனால் நிம்மதி. அண்ணா வேலைக்குப் போக
ஆரம்பிக்கிறான். அந்த பெரிய பணக்காரனின் ஒரே மகளுடன் திருமணமும் ஆகிவிடுகிறது.

அண்ணா மாறிவிடுகிறான். அடிக்கடி
முன்பக்கத்திலே இருக்கும் அறையில் மனைவியுடன் பேச்சு. ஒவ்வொரு நாளும் சாயங்காலம்
வெளியே அழைத்து போகிறான். மாதம் ஒரு புடவை. எல்லா வாரப் பத்திரிக்கைகளும்
வாங்கிப்போடுகிறான். எந்த மாதிரிப் படங்களை பார்க்கக்கூடாது என்று முன்பெல்லாம்
சொல்வானோ, அந்த மாதிரிப் படங்களுக்கு மனைவியோடு
போனான். எல்லோருடனும் அன்பாகப் பேசலானான். அண்ணா மாறிப்போய்விட்டான்.

(இடியட்! எனக்கு
தீடீர்னு அவனைப் பிடிக்காமல் போயிடுத்து. அவனிடம் இருந்த கோபம், கர்வம், அலட்சியம் இதெல்லாம்தான் அவனுக்குப் பொருத்தமா இருந்துதுங்கறது என்
அபிப்பிராயம். அப்போ அவன் முகத்தில ஒரு தேஜஸ் இருந்தது. இப்போ அசட்டுச் சிரிப்பு)

மனைவியின் தந்தை வந்தால் மிகவும்
மரியாதையாய் பேசுவான். அடிக்கடி ஐஸ் வைப்பான்.

(எல்லார்கிட்டேயும்
சண்டை போட்டு ஜெயிச்சவன், இப்ப ஒவ்வொரு ராத்திரியும் தோல்வியடைஞ்சு, காலையில் தலை குனிவாத் திரும்புற மாதிரி, ஒவ்வொரு ராத்திரியும் மன்னி ‘ இன்று போய் நாளை வா’ என்று
சொல்கிறமாதிரி எனக்குப்பட்டது.)

ஒருநாள் சிகரெட்
பிடித்துக்கொண்டிருக்கும் தம்பியின் எதிரில் அண்ணன் வந்து விடுகிறான். கையில்
சிகரெட்டை மறைத்துக்கொண்டு தம்பி சிரிக்கிறான். அண்ணனும் சிரித்துக்கொண்டே கடந்து
போகிறான். அவன் கையில் மல்லிகைப்பூ. குண்டு குண்டா வாழையிலைக்கு வெளியே
எட்டிப்பார்க்கும் மல்லிகை.

‘ நான் மீண்டும்
சிரித்தேன்’ என்று கதை
முடிகிறது.

ஆதர்சங்களும்,
தார்மீகக் கோபங்களும்  யதார்த்தத்தில் எப்படி
அடிபட்டுப் போய்விடுகின்றன என்பதைத்  தன் பாணியில் சித்தரிக்கிறார். 

குறிப்பிடும்படியாக எழுதிவந்த இவர் இளம் வயதிலேயே ஒரு விபத்தில் மரணமடைந்தது
சிறுகதை இலக்கியத்திற்கு ஓர் பேரிழப்பு.

இவரது மற்றொரு கதையை இணையத்தில் படிக்க

நாக்கு

பக்கம் – 20 

உத்தம வில்லன் 

எம்ஜியார்  கண்ணைக் கவர்ந்தார் என்றால் சிவாஜி கண்ணைக் கலங்க வைத்தார். அவர்களின் அடிச் சுவட்டில் ரஜினியும் கமலும் மாஸ் – கிளாஸ் என்ற வரைகோட்டில் பயணித்து வந்தனர். லிங்கா ரஜினிக்குச் சறுக்கல் என்றால் உத்தம வில்லன் கமலைப் பதம் பார்த்து விட்டது.  

கமல் படம் என்றதும் ஒருவித எதிர்பார்ப்பு இருக்கும். கமலே எழுதாமல் எழுதி, பாடாமல் பாடி, இயக்காமல் இயக்கி, தயாரிக்காமல் தயாரித்து  வெளியிட்ட  படம். இத்தனை  பாரத்தை தாங்காத அவரது முதுகு   முறிந்துவிட்டது என்றே சொல்லலாம். 

தாங்க முடியாத  சோகம் என்னவென்றால் கமல் தன் குருநாதர்     கே பாலச்சந்தரையும்  தேவையில்லாமல் கத்தவிட்டு சாகடித்துவிட்டார். இன்றைய மாமேதை கே விஸ்வநாத் இறுதிக் காட்சியில் கண்ணீர் விட்டு கமலின் காலில் விழத் துடிப்பது  ‘இந்த மாதிரி படம் எடுக்காதே’ என்று சொல்லத் தானோ என்னவோ? 

கதை என்னவென்றால் – திரைப்பட நாயகன் திரைக்குப் பின்னால் செய்யும் குற்றங்களை வெளிச்சம் போட்டுக் காட்டுவது தான்.  

பிரபல நடிகை ஒருவர் கூறியது ஞாபகம் வருகிறது ’ திரையில் நாயகன் -வாழ்க்கையில் வில்லன். திரையில் வில்லன் உண்மையில் நல்லவன். 

கமல் கோடிகளை இழக்கலாம். கோடான கோடி ரசிகர்களை இழக்கலாமா?  

காஞ்சனா -2 

இந்த இரண்டாம் த(தா)ரப் பேய்க்கு முதல் த(தா)ரப் பேயே தேவலை. அதுலே குழந்தைகளையும் பெரியவர்களையும் கவரக்  கொஞ்சம் சமாசாரம் இருந்தது. 

இதில் காமெடி என்ற பெயரில் விரசத்தின் எல்லைக்கே போயிருக்கிறார் லாரென்ஸ். 

இந்த திகில் படத்தில்  மிகப் பயங்கரமான காட்சி  க்ளைமாக்ஸ் தான். காஞ்சனா -3 வரப் போகிறது என்பது தான் பயத்தின் உச்ச கட்டம். 

மாசு கட்டுப்பாடு வாரியம் இந்த மாதிரி தூசுப் படங்களுக்குத் தடை விதித்தால் நல்லது.

வை ராஜா வை 

பணக்கார அப்பாவும்  பிரபலமான கணவனும் இருந்தா எப்படி வேணும்னாலும் படம் எடுக்கிறதா என்ன? 

அம்மா தாயே! உங்களுக்கு ஏன் இந்த ஐ‌டி பசங்க மேல இவ்வளவு கோவம்?அவிகளை ஏன் குடிகாரனா – பொம்பளைப் பொறுக்கியா காட்டறீக!

போதும்டா சாமி!  

பக்கம் – 23 

ஏப்ரல் 25, இந்தியாவின் அருகாமை நாடான நேபாளத்தில் மிகவும் கடுமையான பூகம்பம் தாக்கியது. எட்டாயிரத்திற்கும் மேற்பட்ட மக்கள் மடிந்தனர். பல்லாயிரக்கணக்கான மக்கள் காயம் பட்டு வீடுகளை இழந்து உடைமைகளை இழந்து தவிக்கின்றனர். பல பாரம்பரியம்  மிக்க கட்டிடங்கள் இடிந்து போயின. 

தொடர் நிலநடுக்கம் , கடும் மழை போன்றவை மீட்புப் பணியைத் தாமதப் படுத்தவும் செய்தன. இதன்  எதிரொலியாக  எவரெஸ்டில் பனிப்புயல் வேறு. சுற்றுலாப் பயணிகளின் தவிப்பு!

இந்திய அரசு முழு மூச்சில் உதவிப் பணியில் ஈடுபட்டுள்ளது. 

20,000 க்கும் மேற்பட்ட இந்தியர்கள் மீட்கப்பட்டு நலமாக வந்தனர்.

விஞ்ஞானிகள் இப்போது சொல்கிறார்கள்- நேபாளம் நிலநடுக்கத்தால்  தாக்கப்படும் என்பது முன்பே தெரிந்தது என்று. விஞ்ஞானிகளே! இனி இது போன்றவற்றைச் சற்று உரக்கச் சொல்லுங்கள்! மக்களாகிய நாமும் அவற்றையெல்லாம் காது கொடுத்துக் கேட்போம்!!  

குவிகமும் இயற்கை அளித்த வேதனைகளைப் பகிர்ந்து கொள்வதோடு ஐயாயிரம் ரூபாயை நமது பிரதமரின் நிவாரண நிதிக்கு அனுப்பியுள்ளது. 

ஆண்டு : 2                                                                   மாதம் : 5

Editor and Publisher’s office address:

S.Sundararajan
B-1, Anand Flats,
50 L B Road, Thiruvanmiyur
Chennai 600041
போன்: 9442525191  
email : ssrajan_bob@yahoo.com

ஆசிரியர் & பதிப்பாளர்  : சுந்தரராஜன்
துணை ஆசிரியர்     : விஜயலக்ஷ்மி
இணை ஆசிரியர்    :அனுராதா
ஆலோசகர்              :அர்ஜூன்
தொழில் நுட்பம்    : ஸ்ரீநிவாசன் ராஜா
வரைகலை             : அனன்யா

பக்கம் – 24