சமீபத்தில் நேபாள நாட்டிற்கு ஒரு குழுவாக சுமார் 30 பேர் சுற்றுலா சென்று வந்தோம். எல்லோரும் அறுபது வயதிற்கு மேற்பட்ட இளைஞர்கள்! நீண்ட வரலாற்றுப் பெருமை உடைய நாடு நேபாளம். ‘இந்து நாடு’ என்றே அறியப்பட்ட காலமும் உண்டு. நவீனத்துவத்தின் மாற்றங்கள் பரவியிருந்தாலும், நேபாள மக்களின் பாரம்பரியமும், கலாச்சாரமும் ஆங்காங்கே இன்றும் தென்படுகின்றன!

இமயமலை அடிவாரத்தில் அமைந்துள்ள அழகிய நாடு! ‘இமாலய ராஜ்ஜியம்’ என்றும் அழைக்கப்படுகின்றது. இந்துக்களின் புகழ் பெற்ற ஆன்மிகத் தலங்களான பசுபதிநாத் கோவில், சங்கு நாராயணன் கோயில் மற்றும் முக்திநாத் கோயில்கள் இங்குதான் உள்ளன. பௌத்தர்களின் புனித தலங்களாக லும்பினி, பௌத்தநாத்து மற்றும் கபிலவஸ்துவும் இங்கு உள்ளன. நேபாள, இந்திய எல்லையில் உள்ள லும்பினி, புத்தர் பிறந்த இடம் என்பது குறிப்பிடத்தக்கது.