நீலம் – கதைக்கவிதை- எஸ் எஸ்

வட்டமாக அமர்ந்திருந்தார்கள் பத்துக் கல்லூரி மாணவிகள்.

நடுவில் நம் நாயகி! 

 நாயகி  கேட்டாள் – நீலம் என்றால் என்னடி ?

ஒவ்வொருத்தியா சட்டுன்னு சொல்லுங்கடி!

சரியா நான் நினச்சதைச் சொன்னா 100 ரூபாய் பரிசு! 

குளத்தில் செதுக்கிய செதில்கல் போல கேள்வி
தட்டாமாலை சுற்றலை பதில்கள்

காதலின் உடை – நீலம் 
இல்லை காமத்தின் நிழல் -நீலம் 
சே சே வானத்தின் ஒளி -நீலம் 
ஏன் கடலின் முகமாக இருக்கக்கூடாது?ஓ நீல வானம் 
உறிஞ்சி உண்ணும் மாம்பழம்? – நீலம்  மாம்பழம் 
மார்பில் சங்கிலியில் இழையும் கல் ? நீலக்கல் 
நம்ம நாட்டு விளையாட்டு? ப்ளூ வேல்
ரகசிய சினிமா – நீலப் படம் 
லல்லா? – ராமர் நீல நிறம்? 
கீதா நாயகன்? – ராமர் 

முதல் சுற்றில் ஒன்று கூட சரியில்லை ! அடுத்த சுற்று போகலாம்!

ஆணின் குறியீடு ? – நீலம் 
ஏய் ! கண்டத்தில் சிக்கிய விஷம்? – நீல கண்டம் 
நம்ம ஜாதிப் பேய் ? நீலி 
பாம்பின் விஷம் – உடம்பில் நீலம் 
யவனன் கண் – நீலக் கண் 
மழையில் மின்னும் மின்னல்? – நீல மின்னல் 
சவக்களை ? – நீலம்  பாய்ந்தது 
குவளைப் பூ – நீலம் 
ஊட்டி மலை – நீலமலை 
புதுசா வந்த டிவிடி ப்ளேயர்? – ப்ளூ ரே 

அடுத்த சுற்றும் தோல்வி .. மூன்றாவது சுத்து ?

காலர்? ப்ளூ காலர் 
எப்போதாவது வரும் நிலவு – ப்ளூ மூன் 
விலங்கு ஆஸ்பத்திரி – ப்ளூ கிராஸ் 
சட்டை மாறன் திரை விமர்சனம் – ப்ளூ காலர் 
சமஸ்கிருத மலர் – நீலோத்பலம்
காலையில் தெறிக்கும் வெறுப்பு – மார்னிங் ப்ளூ  
இந்திராகாந்தியின் மரணம் காரணம் – ப்ளூ ஸ்டார் 
சேது கட்டிய வானரன் – நீலன் 

கட்டட வரைபடம் புளூ பிரிண்ட் ?

பேனாவின் விந்து – நீல மை

ஊகும் .எல்லாம் தப்பு . நான்காவது சுற்று?

X இல் டிக் ?  நீலம் 
நரி மாறிய கலர் – நீல நரி 
விரிந்த மயிலின் கழுத்து  – நீலம் 
துணி வெளுக்கும் – சொட்டு நீலம்  டோய் 
குழந்தையின் சின்றோம் – blue baby
ஜால்ரா மாணவன் – Blue eyed boy 
இந்தியா கிரிக்கெட் – ப்ளூ பாய்ஸ் 
எங்கிருந்தோ குதிப்பது?  Bolt from blue
மலையாளத் தமிழ் இலக்கியவாதி ? நீல பத்மநாபன் 
சஞ்சீவரெட்டி –  நீலம் 

இதுவும் இல்லையா? அவ்வளவுதாண்டி ! எல்லா நீலத்தையும் கொட்டிவிட்டோம்!

நீ நினைச்ச நீலம் என்ன?

அம்மாடி  இத்தனை நீலமா , செல்லங்களா?ஆனா எனக்குத் தெரிஞ்ச  நீலம் யாரும் சொல்லல! 

அது என்னடி?

நீலம்! என் நாய்க்குட்டியின் பேரு !

எல்லோரும் சேர்ந்து நீல சாயத்தை அவள் மேல் கொட்டி மொத்தினார்கள் !