தற்சமயம்
சிறுமி சோப்பு நுரைக் குமிழில்
விளையாடுகிறாள்
வண்ண வண்ண பலூன்கள்
அவை இனிமை மறைந்தாலும்.
பிரதி பலிப்பு
மொட்டை மாடியில்
கண்ணாடி விரிசலென
வெய்யில்
ஜவ்வரிசி வடகம்
நேற்று
அந்தத் தோட்டப் பூ தேன் மிக்கது
சிலிர்த்தது பொன் வண்டு
அது
தோட்டக்காரனை இன்று அறிந்தது.
கூடு
எப்படி இந்தக் கூட்டில்
எது வழியே
எங்கிருந்து
எப்படி என்றெல்லாமே
பதிலுடன் கூடிய வினாக்களோ
இல்லையோ
கேளுங்களேன் சற்று
ஏனென்பதை மட்டும்.
வாதை
சலசலக்கும் கீற்றுகள்
இரையும் மனம்
மௌன வாய்.
ஆயாசம்
இளஞ் சிவப்பு பாதங்கள்
ஊன்றிய கட்டைச் சுவர்
ஒரே முனை நோக்கித் தவம்
எதிரெதிரே பார்க்கையில்
கோதும் சிறகு
ஆயாசப் பேடை
மீறல்
அவ்வப்போது கரையை சிறிதாக
மீறுவதில் உனக்கு
எத்தனை கேள்விகள்
குவிகம் மின்னிதழ் (மாத இதழ்) 