நடுப்பக்கம் – சந்திரமோகன்

“அதாம்மா! அச்சம் என்றால் பிறரைக் கண்டு பயப்படுதல், நாணம் என்றால் வெட்கப்படுதல், மடம் என்றால் மடமை, அறிவீனம்” எனக் கூறிக் கொண்டிருக்கும் பொழுது என் முதுகில் யாரோ ஓங்கி தட்டுவதை உணர்ந்து திரும்பிப் பார்த்தேன்.

துவைத்து மடித்து வைத்து கட்டிய நான்கு முழ வேட்டி. ஓரிரு இடங்களில் கைத் தையல் போடப்பட்டிருந்தது. அது போல துவைத்து காய வைத்த கயிற்றுத் தடத்துடன் வெள்ளை அரைக் கை சட்டை. சட்டைக் கை முழங்கையை மறைத்திருந்தது. பார்த்திருக்க வில்லையென்றாலும் கவர்ச்சி நிறைந்த முகத்தில் நரைத்த மீசையை பார்த்தவுடன் அதிர்ச்சி குரலில் தெரிய ‘ஐயா! நீங்களா?” என்றேன்.
அமைதியான முறுவலுடன் “ஆம்” என்றார் ‘ இந்தியாவின் சொத்து’ என காந்தி மகானால் அழைக்கப் பட்ட ஜீவா அவர்கள்.
‘என்ன ஐயா! இவ்வளவு தூரம்’ என்றேன். ‘நீங்கள் பெயர்த்தியுடன் பேசிக் கொண்டிருந்தது என் காதுகளில் விழுந்தது. நெஞ்சு பொறுக்க வில்லை, உடன் வந்தேன்’ என்றார்.
‘குழந்தையுடன் சற்று விளையாடினேன் ஐயா’ என்றேன் நான்.
“ விளையாட்டிற்கு கூட சரியானதைச் சொல்லிக் கொடுக்கலாமே, பாரதி பாப்பாவை ‘ஓடி விளையாடச் சொல்லி ஓய்ந்து இருக்கலாகாது, கூடி விளையாடு’ என்றெலாம் சொல்லிக் கொடுக்க வில்லையா? எங்கே, அச்சொற்களுக்கு சரியான விளக்கம் இப்பொழுது கூறுங்கள் பார்க்கலாம்” என்றார் ஜீவா அவர்கள்.

“ ஐயா! நான் எப்படி, நீங்கள்தான் ‘புதுமைப் பெண்’ பற்றி நிறைய பேசியுள்ளீர்கள், நீங்களே கூறுங்கள்” என்றேன் அடி பட்ட முதுகைத் தடவிக் கொண்டே.

மேலும்’ இந்த நற் குணங்கள் பெண்களுக்கு அவசியம் என் சங்க இலக்கியங்கள் கூறுகின்றன குழந்தை” என்றார் ஜீவா அவர்கள் கனிவோடு.

‘ பின்ன என்ன தாத்தா, இந்த மூன்று குணங்களும் பெண்களுக்கு மட்டும்தானா, ஆண்களுக்கு வேண்டாவா? ‘பிறப்பொக்கும் எல்லா உயிர்க்கும்’ என வள்ளுவர் பாடி உள்ளாரே’ என்றாள் அவள்.
தன்னை மறந்து கல கலவென சிரித்தார் ஜீவா அவர்கள்.

“ நான் அதைத்தான் கூற வந்தேனம்மா. சங்க இலக்கியமான தொல்காப்பியம் ‘பெருமையும் அறிவு வலிமையும் ஆண்பாலர்க்கு உரியவை. அச்சம், நாணம், மடம் என்ற இயல்புகள் எப்பொழுதும் பெண்பாலார்க்கு உரியவாம் எனக் கூறுகிறது”

வள்ளுவர் கூட எந்த குறளிலும் ஆணும் பெண்னும் சரிசமமென்று கூற வில்லை. மாறாக பல இடங்களில் பெண்ணிற்கு சில கட்டுப் பாடுகளை அறிவுரையாக கூறுகிறார்.

அவை அனைத்திற்கும் பதில் கூறும் விதமாய் பாரதியின் ‘புதுமைப் பெண் “ நாணமும் அச்சமும் நாய்கட்கு வேண்டுமாம் ஞானம் நல்லறம் வீர சுதந்திரம் பேணும் நற்குடிப் பெண்ணின் குணங்களாம்” எனக்  கார சாரமாய் கோபத்தைக் கொட்டுகிறாள்.

உன்னை பாரதியின் புதுமைப் பெண்ணாக காண ஆசைப் படுகிறேனம்மா’ எனக்கூறிய அவர்
‘ஒன்றைக் கவனமாகக் கேள், அனுபவம் தாய்ப் பால் போன்றது; சிந்தனை பசுவின் பால் போன்றது; நூல் படிப்பு புட்டிப் பால் போன்றது. நூலறிவை விட சிந்தனை அறிவும், சிந்தனை அறிவை விட அனுபவ அறிவும் சிறந்தது என்பதை மனதில் வைத்து நடந்து கொள்ளம்மா” என கூறிக் கொண்டே மறைந்தது அம்மாபெரும் மனிதம்.

திகைத்து நின்றோம் என் பெயர்த்தியும் நானும்.