அல்லி, அங்கயர்க்கண்ணி மாமியிடம், “மாமி! ரொம்ப நாளுக்கு முன்னே ‘நடுவயது நம்பி’ என்ற தலைப்பில், சூரியன் இன்னும் 5 பில்லியன் வருடங்களில் மெர்குரி, வீனஸ், பூமி கிரகங்களை விழுங்கி ஏப்பம் விட்டு, பேரொளியைச் சிந்திவிட்டு, சிவப்புக் கோளமாக மாறும் என்று சொன்னேன் அல்லவா?” என்று பீடிகை போட்டாள்.
“ஆமாம் அதற்கென்ன”, என்றாள் மாமி.
“விஞ்ஞானிகள் இப்பொழுது அதை வேறு விதமாகச் சொல்கிறார்கள்” என்றாள் அல்லி.
“என்ன படத்தின் க்ளைமாக்சை மாத்தி விட்டார்களா” என்று மாமி புன்னகை பூத்தாள்.
அல்லியில் முகத்திலும் புன்னகை பரந்தது.
“ஆமாம் மாமி, சோகத்துக்கு பதில் சுபம் என்ற முடிவு” என்றாள்.
“சரி. சற்றுப் புரிகிற மாதிரி, கதையைச் சொல்லு” என்றாள் மாமி.
அல்லி ஆரம்பித்தாள்:
“சூரியனின் இழுப்புப் போர்: பூமி தப்பிப்பிழைக்குமா? இதுதான் கேள்வி!
- சூரியன் இன்னும் சுமார் 5 பில்லியன் ஆண்டுகளில் அதன் கருவில் உள்ள ஹைட்ரஜன் எரிபொருளைத் தின்று தீர்த்துவிடும். அப்போது அது ஒரு ‘சிவப்பு அரக்கன்’ (Red Giant) நட்சத்திரமாக மாறி, தற்போதைய அளவை விட நூற்றுக்கணக்கான மடங்கு விரிவடையும்.
- பூமியின் எதிர்காலம் இரண்டு முக்கியமான விளைவுகளுக்கு இடையிலான சமநிலையைப் பொறுத்தது:
- ஈர்ப்பு விசை (Tidal forces): சூரியன் விரிவடையும் போது ஏற்படும் ஈர்ப்பு விசைகள் பூமியை அதன் நெருப்புப் பிழம்பிற்குள் இழுக்க முயலும்.
- நிறை இழப்பு (Mass loss): சூரியன் அதன் வெளிப்புற அடுக்குகளை விண்வெளியில் உதிர்ப்பதால் அதன் எடை குறையும். இதனால் சூரியனின் ஈர்ப்புப் பிடி தளர்ந்து, பூமி பாதுகாப்பான தூரத்திற்கு (வெளிப்புற சுற்றுப்பாதைக்கு) நகர்ந்து செல்ல வழிவகுக்கும்.
- புதிய ஆய்வு: வானியலாளர்கள் L2 Puppis என்ற இறந்து கொண்டிருக்கும் நட்சத்திரத்தை ஆய்வு செய்ததோடு, மேம்படுத்தப்பட்ட கணித மாதிரிகளையும் பயன்படுத்தினர். இதன் மூலம், பூமி, சூரியனின் விரிவடையும் எல்லைக்கு சற்று வெளியே நகர்ந்து தப்பிப்பிழைக்க வாய்ப்புள்ளதாக அவர்கள் கருதுகின்றனர்.
- கோள்களின் நிலை: இந்த ஆய்வின்படி, புதன் (Mercury) மற்றும் வெள்ளி (Venus) ஆகிய கோள்கள் சூரியனால் விழுங்கப்படும் என்று எதிர்பார்க்கப்படுகிறது, ஆனால் பூமி பிழைக்கக்கூடும்.
- நிச்சயமற்ற நிலை: பூமியின் பாதுகாப்பு இன்னும் முழுமையாக உறுதிப்படுத்தப்படவில்லை. எதிர்கால சூரியன் எவ்வளவு நிறையை (mass) இழக்கும் என்பதைப் பொறுத்தே பூமியின் இறுதி விதி அமையும் என ஆராய்ச்சியாளர்கள் கூறுகின்றனர்.
சுருக்கமாகச் சொன்னால், சூரியன் அழியும் போது பூமி எரிந்து சாம்பலாகிவிடும் என்று முன்பு கருதப்பட்டது. ஆனால், புதிய ஆய்வுகள் பூமி சூரிய மண்டலத்தின் ஆழத்திற்குத் தப்பிச் செல்ல ஒரு வாய்ப்பு இருப்பதாகத் தெரிவிக்கின்றன.” என்ற அல்லி பெருமூச்சு விட்டாள்.
“ஒரு வேளை, அன்றைக்கு, கல்கி அவதாரம் எடுத்து பூமியைக் காப்பாரோ என்னவோ! சரி…சரி.. இன்னைக்கு நிம்மதியாகத் தூங்கலாம்” என்று சிரித்தாள் மாமி.
