நூலகங்களில் அறிவுக் கொள்ளை! எஸ் எஸ்

சிந்தை என்ற இணையதளத்தில் பெருமாள் முருகன் அவர்கள் வெளியிட்ட இந்தக் கட்டுரையின் மூலமாகத்தான், கோவையில் உள்ள பெரியார் அறிவுலக நூலகத்தில் கொள்முதல் செய்யப்பட்ட போலிப் புத்தகங்கள் உலகின் பார்வைக்குக் கொண்டுவரப்பட்டன.

தமிழ் அறிவுலகம் இத்தகைய செயல்களைக் கண்டு கொதித்தெழுந்திருக்கிறது.

நூலகங்களுக்குப் புத்தகங்களைத் தேர்ந்தெடுப்பவர்கள், தங்களுக்குத் தெரிந்தவர்களின் புத்தகங்களையும் பட்டியலில் சேர்ப்பது காலங்காலமாகத் தொடர்ந்துவரும் ஒரு வகையான ஊழல். இதை ஊழலின் முதல்படி என்று சொல்லலாம்.

நெல்லுக்குப் பெய்த மழை புல்லுக்கும் பெய்யும்

நூலகங்களுக்குப் புத்தகங்களை வாங்குவதில் கமிஷன் என்ற நடைமுறை உருவானது. இது ஊழலின் இரண்டாவது படி.

தரமற்ற புத்தகங்கள் பல நூலகங்களில் இடம்பெறத் தொடங்கின. இது மூன்றாவது படி.

இவை அனைத்தும் இதுவரை சில்லறை வியாபாரமாகவே நடைபெற்றுவந்தன.

ஆனால், இப்போது இது மொத்த வியாபாரமாக உருவெடுத்திருக்கிறது!

எழுதியவர் யார் என்பதைக்கூட வெளிப்படுத்த விரும்பாத சிலர், சொந்த அறிவைப் பயன்படுத்தாமல் செயற்கை நுண்ணறிவின் துணையுடன் உருவாக்கிய, புத்தகங்கள் என்றே சொல்லத் தகுதியற்ற குப்பைகளை நூலகங்களுக்கு மொத்தமாக விற்பனை செய்திருக்கிறார்கள் என்ற குற்றச்சாட்டு இப்போது எழுந்துள்ளது. 

இந்தச் சம்பவம்  இப்போது பெரும் சர்ச்சையாக வெடித்துக் கிளம்பியிருக்கிறது.

இது ஊழலின் உச்சகட்டம்!

வருங்காலத் தலைமுறையினரின் அறிவுலகில் தவறான தகவல்களையும், போலியான படைப்புகளையும் திணிக்கும் இத்தகைய அறிவுத் துரோகிகளை யாரும் மன்னிக்கக் கூடாது.

இந்த முறைகேடுகளைக் கண்டறிந்து, தவறு செய்தவர்கள் மீது உரிய நடவடிக்கை எடுக்க வேண்டும். இனிமேலாவது தரமான, அறிவார்ந்த, பயனுள்ள புத்தகங்கள் அதிக எண்ணிக்கையில் நூலகங்களில் இடம்பெற வேண்டும்.

நூலகங்கள் என்பவை வெறும் புத்தகக் கிடங்குகள் அல்ல; அவை ஒரு சமூகத்தின் அறிவுக் கருவூலங்கள்!

அவற்றையே ஊழலின் கூடாரமாக மாற்றிவிட அனுமதிக்கலாமா?

இத்தகைய முறைகேடுகள் மீண்டும் நிகழாமல் தடுத்து, நூலகங்களின் மாண்பைக் காப்பாற்றுவதற்கு என்ன செய்ய வேண்டும்? இதற்கான நடைமுறைத் தீர்வுகள் ஏதேனும் இருந்தால் சொல்லுங்கள்.

பெருமாள் முருகன் அவர்களின் அறிக்கை:  6 Nov 2026 

https://www.sindhai.com/essays/perumal-murugan-on-the-corruption-in-periyar-arivulagam-1387700

பெருமாள்முருகன் கடந்த திமுக ஆட்சியில் தீட்டப்பட்ட ’பெரியார் அறிவுலகம்’ என்னும் நவீன நூலகத் திட்டம் தற்போது முடிவு பெற்று முதல்வர் ஜோசப் விஜய்யால் 2026 அக்டோபர் 16 அன்று திறந்து வைக்கப்பட்டது. ஏழு ஏக்கர் பரப்பளவில் ஏறத்தாழ முந்நூறு கோடி ரூபாய் செலவில் ஏழு தளங்களைக் கொண்ட கட்டிடமாக இந்நூலகம் உருப்பெற்றுள்ளது. சென்னை அண்ணா நூற்றாண்டு நினைவு நூலகம், மதுரை கலைஞர் நூற்றாண்டு நினைவு நூலகம் போல இந்நூலகமும் பல்வேறு வசதிகளுடன் அமைக்கப்பட்டுள்ளது.

நூலகத்தின் முகப்பில் பெரியார் சிலை அற்புதமாக வடிவமைக்கப்பட்டுள்ளது. ’பெரியார் அறிவுலகம்’ செயல்பாட்டுக்கு வந்ததை ஒட்டிப் பல்வேறு சர்ச்சைகளும் தொடர்ந்துகொண்டிருக்கின்றன. அதைத் திறந்து வைத்த முதல்வர் ’திமுகவின் திட்டம்’ என்பதைப் பெயரளவுக்கேனும் குறிப்பிட்டுச் சொல்லவில்லை என விவாதம் நடைபெற்றது. பெரியார் பெயரிலான நூலகத்துக்கு ஆயுதபூஜை விடுமுறை பொருந்தாது என்னும் சர்ச்சைகளும் தொடர்ந்தன.

முன்னாள் முதல்வர் மு.க.ஸ்டாலின் அவர்கள் அந்நூலகத்தை 2026 நவம்பர் 4 அன்று பார்வையிட்டார். அன்று மாலை திராவிடர் கழகம் சார்பில் அவருக்குப் பாராட்டு விழாவும் நடைபெற்றுள்ளது. ஓர் ஆட்சியில் கொண்டுவரும் திட்டம் அந்த ஆட்சியிலேயே நிறைவு பெறும் என்று சொல்ல முடியாது. ஆட்சி மாற்றம் ஏற்பட்டு அடுத்த ஆட்சியில் நிறைவு பெறுவதும் அதன் பலன் யாருக்கு என்னும் விவாதம் அரசியல் அரங்கில் நடைபெறுவதும் சாதாரணம். இவையெல்லாம் ஒருபக்கம் இருக்கட்டும்.

பிரம்மாண்டமாக உருவாகும் ஒவ்வொன்றும் உள்ளீடற்ற வெற்றுக் கட்டிடங்களாகச் சரிந்து போவதுதான் தமிழ்நாட்டின் பொதுவிதி. சரிவு தொடங்கி வீழ்ச்சியடையச் சிலகாலம் எடுத்துக்கொள்ளும். ஆனால் பெரியார் அறிவுலகத்தின் தொடக்கமே வீழ்ச்சியாக அமைந்துவிடும் போல. சாதனையில் யாருக்குப் பங்கு அதிகம் என்னும் விவாதம் நடந்துகொண்டிருக்கும் சூழலில் நூலகத்தின் உள்ளே போய்ப் பார்த்தவர்கள் பெரும் அதிர்ச்சியில் உறைந்து போயிருக்கிறார்கள். போட்டித் தேர்வர்கள், மாணவர்கள், பொதுமக்கள் என எல்லாத் தரப்புக்கும் பயன்படும் வகையில் நூல்கள் இங்கே இருக்கின்றன என்று சொல்கிறார்கள். நூல்கள் வாங்க வல்லுநர்களின் பரிந்துரை எல்லாம் பெறப்பட்டதாகவும் தெரிகிறது. ஆனால் வாங்கியுள்ள நூல்கள் எத்தகையவை?

நான்காம் தளத்தில் உள்ள தமிழ் நூல்களைச் சான்றுக்குப் பார்ப்போம். ’அகல்விளக்கு பதிப்பகம்’ வெளியிட்ட கிட்டத்தட்ட 1,800 நூல்கள் (ஆம், மெனக்கெட்டு எண்ணிப் பார்த்தோம்) அலமாரிகளை அலங்கரிக்கின்றன. ஒருசில தவிர எல்லாம் கெட்டி அட்டை போடப்பட்டவை. நாற்பது ஆண்டு காலமாக இலக்கிய உலகில் புழங்கிவரும் எனக்கு 1800 நூல்களை வெளியிட்டுள்ள ’அகல்விளக்கு பதிப்பகம்’ அறிமுகம் ஆகவில்லை. என் வாசிப்புத்தளம், அறிவுத் தேடல் அவ்வளவு சுருங்கியது போலும்.

’நாலடியார் வாழ்வின் வழிகாட்டி’ (ஆசிரியர்: சூர்யா பாலு) என்னும் முந்நூறு பக்க நூலின் விலை ரூ.1445/- மட்டும்தான்! ஒவ்வொரு நூலின் விலையும் இப்படித்தான். பிற பதிப்பகங்கள் எல்லாம் முந்நூறு பக்க நூலுக்கு முந்நூற்று ஐம்பது ரூபாய்தான் விலை வைக்கிறார்கள். பிழைக்கத் தெரியாதவர்கள்!

சரி, இத்தனை விலையுள்ள நூல்கள் பெரும் உழைப்பில் அரிய செய்திகளைக் கொண்டு எழுதப்பட்டிருக்கும் என்று கருதி உள்ளே பிரித்துப் பார்த்தால் மேலும் அதிர்ச்சி. ’நாலடியார் வாழ்வின் வழிகாட்டி’ என்னும் நூல் இப்படித் தொடங்குகிறது:

‘நாலடியார், தமிழின் முக்கியமான கவி மற்றும் தத்துவ ஞானி. அத்துடன் உலகம் முழுவதும் அறியப்பட்ட தமிழ் இலக்கியத்தின் தொலைநோக்கிய அணுகுமுறை போன்றவராக வாழ்ந்தவர். அவர் தனது பாடல்களிலும் கவிதைகளிலும் மனித வாழ்க்கையின் உண்மைகளை மிக எளிமையாகவும் ஆழமாகவும் விளக்கியுள்ளார்.’

இதை வாசித்து தலைசுற்றிப் போனேன். கிட்டத்தட்டப் பதினைந்து ஆண்டுகள் தமிழ் இலக்கியக் கல்வியை முறையாகப் பயின்றும் முப்பது ஆண்டுகள் அக்கல்வியைப் பயிற்றுவித்தும் வந்த எனக்கு நாலடியார் ஒரு கவிஞர், தத்துவஞானி என்பது தெரியவில்லையே. பெயர் தெரியாத சமண முனிவர்கள் எழுதிய நாலடி வெண்பாக்கள் நானூற்றின் தொகுப்புத்தான் நாலடியார் என்று படித்து வந்திருக்கிறேனே, அது பொய்யா? இத்தனை ஆண்டுகள் கழித்து சூர்யா பாலு என்பவரும் அகல்விளக்கு பதிப்பகமும் இப்படி ஓர் உண்மையைக் கண்டுபிடித்திருக்கிறார்கள். இந்த உண்மையை நூலின் பிற்குறிப்பாகவும் போட்டிருக்கிறார்கள். நூல் முழுவதும் இப்படிப்பட்ட உண்மைகளால் நிறைந்து வழிகிறது. அந்தக் கருமாந்திரத்தை வாசிக்கும் பொறுமையும் எடுத்துச் சொல்லும் ஆற்றலும் எனக்கில்லை.

ஏதோ ஒருநூல் இப்படி அமைந்துவிட்டது போலும் என்று இன்னொரு நூலை எடுத்துப் புரட்டிப் பார்த்தோம். ’தேவ் நிலன்’ என்னும் நானறியாத அல்லது யாரும் அறியாத தமிழறிஞர் எழுதிய ’மதுரைக் காஞ்சி ஒரு இலக்கியப் பயணம்.’ இதுவும் முந்நூறு பக்கம் கொண்ட 1395/- ரூபாய் விலை போடப்பட்ட நூல். இதிலிருந்து சிறுபகுதியைப் பார்க்கலாம்: ’மதுரைக்காஞ்சி என்பது மதுரைக் கூழத்திப் பெருவழுதி என்ற புலவர் பாடிய 782 செய்யுள்களை உள்ளடக்கிய கவிதைத் தொகுப்பாகும்.’ (ப.5).

அரசர் மதுரைக் கூழத்திப் பெருவழுதி உண்மையில் ஒரு தீர்க்க தரிசனத்துடன் கூடிய வீர அரசன். இவர் யுத்தங்களில் வெற்றி பெற்றதோடு யுத்தத்திற்குப் பிறகு ஏற்படும் சமூக பொருளாதார பக்க விளைவுகளையும் கையாளும் திறன் பெற்றிருந்தார்’ (ப.13). இப்படித்தான் நூல் முழுவதும் அமைந்திருக்கிறது. யாரப்பா, இந்தக் கூழத்திப் பெருவழுதி? மதுரைக் காஞ்சியின் ஆசிரியர் மாங்குடி மருதனார் என்று படித்திருக்கிறேன். அவர் புலவர்தான். அரசர் அல்லர். இந்நூலை எழுதிய ’தமிழறிஞர்’ தேவ் நிலன் எங்கிருந்து புதிய உண்மைகளைக் கண்டுபிடித்தார்? ஒன்றும் விளங்கவில்லையே.

பழந்தமிழ் இலக்கியம்தான் இப்படி. இருபதாம் நூற்றாண்டுக்கு வந்தால் பாரதியார்தானே முக்கியமான கவிஞர்? ’பாரதியார் கதைகள்’ என்றொரு நூல். இது பாரதியார் எழுதிய கதைகளைக் கொண்ட நூலா அவர் கதைகளைப் பற்றிய நூலா? ஒன்றும் விளங்கவில்லை. ஆசிரியர் பெயர்: மனிஷா சரவணன். ’சாதனையின் முகம்’ என்றொரு கதையைப் பாரதியார் எழுதியிருக்கிறாராம். பாரதியாரின் எழுத்துக்களைப் புதிது புதிதாகக் கண்டுபிடித்துக்கொண்டுவரும் ய.மணிகண்டன் போன்ற பாரதி ஆய்வாளர்கள்தான் இதை உறுதிப்படுத்த வேண்டும். அக்கதை என்னவாம்? ’

மதுரை நகரில் பிறந்த இராமன் சாதாரண குடும்பத்தைச் சேர்ந்தவன். அவன் வாழ்க்கைப் பயணம் தொலைந்திருந்தது. அதிகமான வேலை இல்லாத காலத்தில் அவன் செருப்புச் சூடிகளை விற்கும் தொழிலில் பணி செய்கின்றான். அவன் சாதாரண வாழ்க்கையில் மிகவும் அழுத்தமான ஒருவராக வாழ்ந்தது. ஆனால் அவன் மனதில் எப்போதும் ஒரு விருப்பம், ஒரு கனவு இருந்தது – நல்ல கல்வி, உயர்ந்த வாழ்வு மற்றும் முன்னேற்றம்.’ (ப.138).

இதுதான் பாரதியாரின் மொழிநடையா? இப்படியும் தமிழ் உண்டா? என்னே, தமிழுக்கு வந்த சோதனை!

ஜோதி ஹரிஹரன் என்பவர் எழுதிய ’கீழடி செப்பும் வரலாறு’ என்னும் நூலில் அங்கே கிடைத்த சிற்பமாக பெரிய நந்தியின் புகைப்படம் இடம்பெற்றுள்ளது. ஜோதி ஹரிஹரன் தொல்லியல் ஆய்வாளராக இருக்கக் கூடும். அவரே களத்தில் இறங்கி யாரும் அறியாத இரவில் அந்நந்தியைக் கண்டுபிடித்துத் தானே தூக்கிக்கொண்டு வந்திருக்க வேண்டும்.

தனலட்சுமி அர்ஜுன் என்பவர் எழுதிய ’தமிழ்நாடு ஒரு பார்வை’ நூலில் வரும் அரிய தகவல்களைப் பாருங்கள்:

’தமிழ்நாட்டின் முதன்மை முதலமைச்சராக முத்துவேலு சுப்பையா அய்யர் (1947) இருந்தார். அவர் அத்தியாவசியமான முதன்மை தலைமையிலும் சட்டப்பேரவையில் பெரிய தாக்கத்தை ஏற்படுத்தினார்… அதன் பிறகு 1952-ம் ஆண்டில் இருந்து திராவிட கிழக்கின் அரசியல் வீரவாகிய மு.க.இராமசாமி முக்கிய அரசியல் தலைவராக நின்றார். அவரின் வேலையை பிறகு காமராஜர் (1954 – 1963) எடுத்தார்.’ (ப.108)

நூல் முழுவதும் இப்படித்தான். இத்தனை காலம் தமிழர்கள் அறியாத தகவல்கள்! அகல்விளக்கு பதிப்பகத்தின் எல்லா நூல்களும் இப்படித்தான். இவற்றை எழுதிய ஆசிரியர்களின் பெயர்கள் : ஜோதி சரவணன், ஜோதி ஹரிஹரன், ஜோதிலட்சுமி அன்பழகன், நிவேதா அன்பழகன், தாமரை பன்னீர், ராணி பன்னீர், தாமரை கார்த்தி, தாமரை சிவா, தாமரை முரளி, சூர்யா பாலு, மங்களேஸ்வரி பாலு, விஜய பாலு, விஜய ஆதித்தன், திரிஷா விஜய், மோனிகா சூர்யா, மோனிகா ரவி, பிருந்தா சேதுராமன், தர்ஷினி சேதுராமன், மனிஷா சரவணன், மனிஷா தினேஷ், திவ்யா தினேஷ்.

இப்பதிப்பகம் வெளியிட்டுள்ள சில நூல்களின் தலைப்புகளையும் பாருங்கள்.

நகர நீர் மேலாண்மை: பொதுமக்களின் உரிமை – கீர்த்தி கோவிந்த்

நகரத்து நெடுஞ்சாலை கவனிகள் – மாலதி சேதுராமன்

நகரத்தின் ஊசல்: மாசுபாடும் மனித வாழ்வும் – கார்த்திகா அவினாஷ்

நகரம் விழுங்கும் இயற்கை – மனிஷா ராம்சரண்

நகரமும் நம்பிக்கையும்: பொதுப் பாதுகாப்பின் சவால்கள் – மது சக்தி

நகர நீர் சுகாதாரம்: பொதுநலத்தின் அவசியம் – தாமரை கார்த்தி

நகர நீர் சட்டங்கள்: பொதுநலப் போராட்டம் – சக்தி சூர்யா

நகர நீர் கல்வி: சமூக விழிப்புணர்வு – கார்த்திகா அவினாஷ்

நகர நீர் எதிர்காலம்: சமத்துவ உலகம் – ஜோதி ஹரிஹரன்

நகர நீர் அமைப்புகள்: வரலாற்றுப் பார்வை – ஜோதி ஹரிஹரன்

நகர நீர் ; பொதுத்துறை வெற்றி – கீர்த்தி கோவிந்த்

அகல்விளக்கு பதிப்பகம் போலவே பீனிக்ஸ் பதிப்பகம் வெளியிட்டுள்ள நூல்களும் நூற்றுக்கும் மேல் அலமாரிகளில் இடம்பெற்றுள்ளன. இவையும் மேற்காட்டிய நூல்களோடு போட்டியிடத் தக்கவை. இன்னும் பிரித்து அடுக்காத புத்தகப் பெட்டிகள் நூற்றுக்கணக்கில் இருப்பதாகத் தெரிகிறது. அவற்றில் எத்தகைய பூதங்கள் ஒளிந்திருக்கின்றனவோ? ஆங்கில நூல்களில் என்னவெல்லாம் இருக்கின்றனவோ?

எப்படியாயினும் சரி, நூல் கொள்முதலில் மாபெரும் ஊழல் நடைபெற்றிருக்கிறது என்பது உறுதி. அது கோடிக்கணக்கில் இருக்கும் என்றும் தோன்றுகிறது. தொழில்நுட்பம் மேம்படாத செய்யறிவு மூலம் நூல்கள் உருவாக்கப்பட்டுள்ளன. நூலாசிரியர் பெயர்கள் எல்லாம் பொய்ப்பெயர்கள். நூலில் akalvilakkupathipagam@gmail.com என்னும் மின்னஞ்சல் முகவரி கொடுக்கப்பட்டுள்ளது. அது இந்நூல் விநியோகத்துக்காக உருவாக்கப்பட்டது போலும். கைப்பேசி எண் எதுவும் இல்லை.

போலிநூல்களை விநியோகித்துக் கோடிக்கணக்கில் ஊழல் செய்தவர் யார்? இதன் பின்னணியில் இருக்கும் அரசியல் என்ன? யாருக்குப் பணம் போய்ச் சேர்ந்திருக்கிறது? இப்படி இன்னும் எத்தனை எத்தனை நூல்கள் விநியோகிப்பட்டிருக்கின்றன? ஊழலில் ஈடுபட்ட அனைவர் மீதும் உடனடியாக நடவடிக்கை மேற்கொள்ள வேண்டும். விசாரணைக் குழு அமைத்து நடைபெற்ற மோசடிகளை மக்கள் பார்வைக்குக் கொண்டுவர வேண்டும். அதற்கு முன் அந்நூல்களை எல்லாம் நூலக அலமாரிகளில் இருந்து அகற்ற வேண்டும்.

– பெருமாள்முருகன் எழுத்தாளர்

இந்தியாவில் ஊழல்

 

இந்தியாவில் ஊழல் என்ற ஒரு விக்கிபீடியா பக்கம் உள்ளது. அதிலிருந்து சில கருத்துக்கள்.

 2005ஆம் ஆண்டின் ஆய்வின் படி 62 சதவிகிதத்திற்கும் மேற்பட்ட இந்தியர்களுக்கு இலஞ்சம்  கொடுப்பது  – வழக்கம் 2025  ல் இந்தியா ட்ரான்சிபரன்சி இன்டர்நேஷனலின் ஊழல் மலிவு எண்ணில் (Corruption Perceptions Index) 182  நாடுகளுள் 91  வது இடத்தில் இந்தியா இருந்தது.

லைசன்ஸ் முறை ஊழலுக்கு அஸ்திவாரம். 

குற்றவாளி கும்பல்களுக்கு அரசியல்வாதிகளால், அரசியல் கட்சிகளால் மற்றும் அரசு செயலர்களால் கொடுக்கப்படும் ஆதரவினால் ஊழல் எல்லா இடங்களிலும் நிறைந்திருக்கிறது. 

லாரி உரிமையாளர்கள் ஆண்டுதோறும் 22,200 கோடி  லஞ்சம் செலுத்துகிறார்கள்

அரசாங்க கட்டுப்பாட்டு அதிகாரிகள் 43% மற்றும் போலீஸ் 45% லஞ்சப் பணத்தை பங்கு போட்டுக்கொள்கின்றன

அரசாங்க அதிகாரிகள், தேர்ந்தெடுக்கப்பட்ட அரசியல்வாதிகள், நீதித்துறை அதிகாரிகள், ரியல் எஸ்டேட் மேம்பாட்டாளர்கள் மற்றும் சட்ட அமலாக்க அதிகாரிகள் சட்டவிரோத வழிகளில் நிலத்தை பெற்று, மேம்படுத்தி விற்கிறார்கள்

இந்தியாவில் கடந்த காலங்களில் வெளிவந்த மிகப்பெரிய ஊழல்கள் மற்றும் நிதி மோசடிகளின் பட்டியல் கீழே தரப்பட்டுள்ளது:
• 2ஜி ஸ்பெக்ட்ரம் ஊழல் 
• தெலுகி முத்திரைத்தாள் ஊழல் (Telgi Scam)
• சத்யம் கணினி ஊழல் (Satyam Scam)
• பஞ்சாப் நேஷனல் வங்கி மோசடி (PNB Scam)
• ஹர்ஷத் மேத்தா பங்குச்சந்தை ஊழல் (Harshad Mehta Scam)
• பொதுநலவாய விளையாட்டுப் போட்டிகள் ஊழல் (Commonwealth Games Scam)
• போஃபர்ஸ் ஊழல் (Bofors Scam)
• விஜய் மல்லையா கடன் மோசடி வழக்கு
• பீகார் கால்நடைத் தீவன ஊழல் (Fodder Scam)
• ஏ.பி.ஜி. ஷிப்யார்ட் வங்கி மோசடி (ABG Shipyard Fraud)

தமிழகத்தில் மிகப் பெரிய ஊழல்கள் : 

• ஜெயலலிதா சொத்துக்குவிப்பு வழக்கு (Disproportionate Assets Case):
• கலர் டி.வி. கொள்முதல் வழக்கு (Colour TV Case):
• கிரானைட் ஊழல் (Granite Scam):
• நகராட்சி நிர்வாகம் மற்றும் குடிநீர் வழங்கல் துறை ஊழல் 
• ஊரக வளர்ச்சி மற்றும் கனிமவளம் ஊழல் 
• எரிசக்தித் துறை ஊழல் 
• டாஸ்மாக் (TASMAC) ஊழல் 
• பத்திரப்பதிவு மற்றும் நெடுஞ்சாலைத் துறை ஊழல்