நம் கேள்வி – சாய் பதில்
1. கேள்வி:
ஜெயமோகனின் விஷ்ணுபுரம் எப்படி?
சாய் பதில்:
படிக்க ஆரம்பிப்பது கொஞ்சம் கஷ்டம். புரிவது கொஞ்சம் சிரமம். அதையெல்லாம் கடந்து விட்டீர்கள் என்றால் அது நாவல் அல்ல; தனி உலகம் என்பதை உணர்ந்து கொள்வீர்கள். படித்து முடித்தால் விஷ்ணுபுரத்தை விட்டுத் திரும்ப மனம் வராது. படிக்கத் தொடங்கினால் மற்ற வேலைகளை மறந்துவிடுவீர்கள்!
2. கேள்வி:
நூலக ஊழலைத் தடுக்க என்ன வழி?
சாய் பதில்:
நூலகங்களைத் திறந்து வைத்தால் மட்டும்போதாது . அதில் உள்ள புத்தகங்களையும் கிறந்து பார்க்கவேண்டும்.
நிர்ணயிக்கப்பட்ட குழு என்னென்ன புத்தகங்களைத் தேர்ந்தெடுத்திருக்கிறது என்பதைப் பொதுமக்கள் பார்க்கக்கூடிய வெப் சைட்டில் போடவேண்டும்.
பொதுமக்கள் ஆட்சேபனை தெரிவிக்கும் புத்தகங்களை மறு பரிசீலனை செய்யவேண்டும்.
அதன்பின் , வாங்கிய புத்தகங்களின் பட்டியலையும் அதே வெப் சைட்டில் போடவேண்டும்.
நூலகங்களில் இருக்கும் அனைத்துப் புத்தகங்களின் பட்டியலும் வெப் சைட்டில் தெரியவேண்டும்.
இதெல்லாம் செய்தால் ஊழலை ஒழிக்க முடியுமா? கொஞ்சம் குறையலாம்.
இதெல்லாம் முடியாதா? பேசாமல் ‘நூலகத்தில் ஊழல்’ என்று A I மூலம் ‘சிவன் பிள்ளையார்’ அல்லது ‘நயன் டீன்’ என்ற புனைபெயரில் புத்தகம் எழுதி எல்லா லைப்ரரிக்கும் 10 பிரதிகள் அனுப்பலாம்.
3. கேள்வி:
புது ராமாயணப் படத்தின் சிறப்பு என்ன?
அர்ஜூனின் ரீல்ஸ் பாருங்க! க்ளிக் பண்ணுங்க !
4. கேள்வி: தமிழில் பிரபலமான கவர்ச்சி நூல் எது?
சாய் பதில்: எல்லா எழுத்தாளர்களும் தொட்டிருக்கிறார்கள். ஜெயகாந்தன் (ரிஷி மூலம், சினிமாவுக்குப் போகிற சித்தாள்) புஷ்பா தங்கதுரை, அறிஞர் அண்ணா, சாண்டில்யன், சுஜாதா , சாரு நிவேதிதா, தி ஜா , சில பெண் எழுத்தாளர்கள், இன்றைக்கு முகநூலில் கதை எழுதும் பலர் எல்லாரும் ஆபாசம் என்று முத்திரையைக் குத்தாமல் குத்தியிருக்கிறார்கள்.
ஆனால் எழுதப்பட்ட நூல்களைவிட, ஆபாசமாகப் பேசும் சிலருடைய பேச்சுகள்தான் அதிகப் பிரபலம்!
5. கேள்வி: அனிருத் – காவ்யா திருமணத்திற்கு எப்படி வாழ்த்து சொல்வது?
சாய் பதில்: அனிருத் இசையில் காதல் இனிக்கட்டும்; காவ்யா வாழ்க்கையில் கவிதை மலரட்டும்! இருவரின் வாழ்க்கையும் என்றும் டூயட்டாக ஒலிக்கட்டும்! தேனோடு கலந்த தெள்ளமுதம் மாதிரி , இசையோடு கலந்த கிரிக்கெட்டுமாக கோடி கோடியாய் இனிமையாக வாழட்டும்.
